வாக்கு என்பது ஜனநாயகத்தின் மிகப்பெரிய ஆயுதம் என்றும், அநீதிக்கும் அதிகாரத் திமிருக்கும் எதிராக மக்கள் வாக்களிக்கத் தயாராக இருக்க வேண்டும் என்றும், தங்களை பக்கா மாஸ் என்று சொல்லிக்கொள்ளும் தவெகவினர் இடைத்தேர்தலில் வாக்குக்கு ரூ.6,000 பணம் கொடுப்பது ஏன் என்றும் நாம் தமிழர் கட்சியின் தலைமை ஒருங்கிணைப்பாளர் சீமான் மிகக் காரசாரமாகக் கேள்வி எழுப்பியுள்ளார். திருப்பூர் மாவட்டம் தாராபுரம் சட்டமன்ற இடைத்தேர்தலில் நாம் தமிழர் கட்சியின் சார்பில் போட்டியிடும் வேட்பாளர் கார்த்திகாவை ஆதரித்துப் பிரச்சார நிறைவு நாளில் நடைபெற்ற பிரம்மாண்ட பொதுக்கூட்டத்தில் சீமான் ஆற்றிய உரை அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.

கூட்டத்தில் பேசிய சீமான், பதவி ஆசைக்காகத் தாங்கள் பெற்ற பதவிகளைத் தூக்கியெறிந்துவிட்டுச் சென்றவர்களுக்கு மக்கள் எக்காலத்திலும் மீண்டும் அந்தப் பதவியைத் தரக்கூடாது என்று எச்சரித்தார். எங்கு போய் நின்றாலும் மக்கள் தங்களுக்கு வாக்களிப்பார்கள் என்று வாக்காளர்களை மிகக் கேவலமாக எடைபோடுகிறார்கள் என்று சாடிய அவர், திமுக, அதிமுக, தவெக எனப் பிற கட்சிகளுக்குப் பல நூறு சட்டமன்ற உறுப்பினர்கள் இருக்கும் நிலையில், 16 ஆண்டுகளாக வீதி வீதியாக மக்களுக்காகக் களத்தில் நின்று போராடும் தங்களுக்கு ஒரேயொரு முறை வாய்ப்பளித்துச் சட்டமன்றத்திற்கு அனுப்பி வைத்தால் உண்மையான மாற்று அரசியலை மக்கள் உணர்வார்கள் என்றார். தகுதி இல்லாதவரை நிறுத்த உங்கள் மகன் ஒன்றும் தற்குறி அல்ல என்றும், களத்தில் நிற்கக்கூடிய கார்த்திகா மிகுந்த தகுதி வாய்ந்த வேட்பாளர் என்றும் பெருமிதத்துடன் குறிப்பிட்டார்.

விவசாயிகளின் அவலநிலையைச் சுட்டிக்காட்டிய அவர், உலகத்தில் உள்ள அனைவரும் தாங்கள் உற்பத்தி செய்யும் பொருட்களுக்குத் தாங்களே விலையை நிர்ணயிக்கும் சூழலில், விவசாயியால் மட்டும் தான் விளைவித்த பொருளுக்கு உரிய விலையை நிர்ணயிக்க முடியாமல் விஷம் குடித்து மாளும் நிலை தொடர்வதாக வேதனை தெரிவித்தார். செல்போனுக்கும் காருக்கும் ரூ.100 கோடியில் திட்டம் போடும் ஆட்சியாளர்களிடம், நீருக்கும் சோற்றுக்கும் எவ்வித தொலைநோக்குத் திட்டமும் இல்லை என்றும், விவசாயத்தை முதன்மைப்படுத்தும் கூட்டுப்பண்ணைத் திட்டத்தை நாம் தமிழர் கட்சி மட்டுமே கையில் வைத்துள்ளது என்றும் திட்டவட்டமாகத் தெரிவித்தார்.

இதையும் படிங்க: முதல்வர் விஜய் ரோடு ஷோ பாதையில் போராட்டம்: நாம் தமிழர் கட்சி வேட்பாளர் கார்த்திகா உட்பட நிர்வாகிகள் கைது!

தவெக தலைவர் விஜய்யின் பிரச்சாரங்களைக் கடுமையாக விமர்சித்த சீமான், திரைக்கவர்ச்சி என்பது விரைவில் மங்கிவிடும் என்றும், இனக்கவர்ச்சி மட்டுமே எக்காலத்திற்கும் நிலைத்து நிற்கும் என்றும் முழங்கினார். விஜய்யைப் பார்க்கக் கூட்டம் வரலாம், ஆனால் தனது முகத்தைப் பார்க்க மக்கள் வரவில்லை, தான் பேசும் புரட்சிகரக் கருத்துகளைக் கேட்கவே மக்கள் கூடுகிறார்கள் என்றும், காசு கொடுக்காமல் லட்சக்கணக்கான மக்களைத் திரட்டும் ஒரே இயக்கம் நாம் தமிழர் கட்சி மட்டுமே என்றும் தெரிவித்தார். ஆறு மாத ஆட்சியில் மிகப்பெரிய சாதனை படைத்துவிட்டதாகக் கூறிக்கொள்ளும் தவெகவினர், இடைத்தேர்தலில் எதற்காக வாக்காளர்களுக்கு ரூ.6,000 வரை பணப்பட்டுவாடா செய்ய வேண்டும் என்று அடுக்கடுக்கான கேள்விகளை எழுப்பினார்.

மேலும், மதுராந்தகம் மற்றும் தாராபுரத்தில் தவெக வேட்பாளர்கள் தங்களது சொந்தப் பதவி ஆசைக்காக விலகி இந்த இடைத்தேர்தலை மக்கள் மீது திணித்துள்ளதாகக் குறிப்பிட்ட அவர், மக்கள் பணத்தைத் தொட மாட்டேன் என்று கூறிவிட்டு ஊழல்வாதிகளைச் சேர்த்துக் கொண்டு கும்மியடிப்பதே தவெகவின் வேலை என்று சாடினார். தங்களுக்கு ஆட்சி மாற்றம் நோக்கம் அல்ல என்றும், ஆள் மாறினாலும் ஆட்சி முறை மாறாது என்பதால், பழைய கட்டடத்திற்கு வெள்ளை அடிக்கும் சீர்திருத்தவாதிகளாக இல்லாமல், அழுகிப்போன பழைய அமைப்பை அடியோடு தகர்த்துவிட்டுப் புதிய புரட்சிகர ஆட்சி முறையை உருவாக்குவதே தங்களது இலக்கு என்றும் பிரகடனம் செய்தார்.

இறுதியாக, பிறப்பொக்கும் எல்லா உயிர்க்கும் என்ற கொள்கையையும் கொடியையும் திருடிக் கொண்டவர்கள் எம்எல்ஏ-க்களைத் திருட மாட்டார்களா என்று கேள்வி எழுப்பிய சீமான், திராவிடக் கட்சிகளுடனோ மற்றவர்களுடனோ ஒருபோதும் கூட்டணி இல்லை என்றும், 2029 சட்டமன்றத் தேர்தலிலும் தனித்தே களம் காண்போம் என்றும் தெரிவித்தார். மின் கட்டணத்தை மூன்று மடங்கு உயர்த்திவிட்டுத் தேர்தல் நேரத்தில் இலவசத் திட்டங்களை அறிவித்து மக்களை ஏமாற்றுபவர்களுக்கு மக்கள் தங்களது விவசாயி சின்னத்திற்கு வாக்களித்துச் சாட்டையடி கொடுக்க வேண்டும் என்று சீமான் அறைகூவல் விடுத்தார்.

இதையும் படிங்க: ஓட்டுக்கு ரூ.6000...! தாராபுரத்தில் பணப்பட்டுவாடா ஜோர்..! நாதக வேட்பாளர் கார்த்திகா புகார்..!!