தமிழ் திரையுலகின் முன்னணி நட்சத்திரமான நடிகர் சிவகார்த்திகேயன், தனது அகில உலக சிவகார்த்திகேயன் நற்பணி இயக்கத்தின் மாவட்ட நிர்வாகிகளை நேரில் சந்தித்துப் புகைப்படம் எடுத்துக்கொண்ட நிகழ்வு கோலிவுட் வட்டாரத்தில் பெரும் கவனத்தை ஈர்த்துள்ளது.

சென்னை போரூர் அருகே உள்ள தனியார் மண்டபத்தில் சிவகார்த்திகேயன் நற்பணி இயக்கம் சார்பில் மாநில அளவிலான நிர்வாகிகள் சந்திப்பு நிகழ்ச்சி பிரம்மாண்டமாக நடைபெற்றது. தமிழ்நாட்டின் பல்வேறு மாவட்டங்களிலிருந்தும், அண்டை மாநிலங்களிலிருந்தும் வந்திருந்த மாவட்ட, நகர, ஒன்றிய மற்றும் கிளை அளவிலான நற்பணி இயக்க நிர்வாகிகள் மற்றும் ஆயிரக்கணக்கான ரசிகர்கள் இந்நிகழ்ச்சியில் ஆர்வத்துடன் கலந்துகொண்டனர்.

நிகழ்ச்சிக்கு வருகை தந்த நடிகர் சிவகார்த்திகேயன், மேடையில் நற்பணி இயக்க நிர்வாகிகள் ஒவ்வொருவரையும் தனித்தனியாக அழைத்து நலம் விசாரித்து, அவர்களுடன் இன்முகத்துடன் பிரத்யேகமாகப் புகைப்படங்கள் எடுத்துக்கொண்டார்.

இதையும் படிங்க: அஜித் ரசிகர்கள் புதிய அரசியல் கட்சி துவக்கம்! உளுந்தூர்பேட்டையில் உருவானது தமிழக மக்கள் கழகம்!

மேலும், பொதுமக்களுக்குப் பயனளிக்கும் வகையிலான இரத்த தான முகாம்கள், ஏழை எளிய மாணவர்களுக்கான கல்வி உதவிகள் மற்றும் மருத்துவ உதவிகள் உள்ளிட்ட சமூக நலப் பணிகளைத் தொடர்ந்து தொய்வின்றி முன்னெடுக்க வேண்டும் என்று நிர்வாகிகளுக்கு அவர் அறிவுறுத்தினார்.

சமீபத்தில் நடிகர்கள் தனுஷ் மற்றும் சூர்யா ஆகியோர் தங்களது ரசிகர் மன்ற நிர்வாகிகளைத் தொடர்ந்து சந்தித்துப் புகைப்படங்கள் எடுத்துக்கொண்டது சமூக வலைதளங்களில் பேசுபொருளானது.

அதனைத் தொடர்ந்து தற்போது நடிகர் சிவகார்த்திகேயனும் தனது நற்பணி இயக்க நிர்வாகிகளை ஒருங்கிணைத்து பிரம்மாண்ட சந்திப்பை நடத்தியுள்ளது ரசிகர்களிடையே உற்சாகத்தை ஏற்படுத்தியுள்ளதுடன், திரையுலகிலும் பரவலான கவனத்தைப் பெற்றுள்ளது.

இதையும் படிங்க: திரை கவர்ச்சி மங்கும், இன கவர்ச்சி பொங்கும்: தவெக, திமுக, அதிமுகவுக்கு எதிராக சீமான் ஆவேசம்!