சிவகங்கை அருகே மேலமங்கலம் கிராமத்தில் உள்ள கரும்புத் தோட்டத்திற்குள் வைத்து, பல்வேறு கொலை மற்றும் கொலை முயற்சி வழக்குகளில் தொடர்புடைய பிரபல ரவுடி சுள்ளான் மதன் (24) என்பவரை மர்ம கும்பல் ஓட ஓட விரட்டி கொடூரமாக வெட்டிக் கொலை செய்த சம்பவம் அப்பகுதியில் பெரும் பதற்றத்தையும் அதிர்ச்சியையும் ஏற்படுத்தியுள்ளது.

சிவகங்கை மாவட்டம் புதுப்பட்டியைச் சேர்ந்த சுள்ளான் மதன் மீது பல்வேறு காவல் நிலையங்களில் கொலை மற்றும் கொலை முயற்சி வழக்குகள் நிலுவையில் உள்ளன. குறிப்பாக, சிவகங்கை அருகே கொல்லங்குடியில் கடந்த 2024 ஆம் ஆண்டு ஜூன் 30 அன்று ஜெயசூர்யா மற்றும் சுபாஷ் என்ற இரு உடன்பிறந்த சகோதரர்கள் கொடூரமாகக் கொலை செய்யப்பட்ட வழக்கில் இவர் முக்கியக் குற்றவாளியாகக் கைது செய்யப்பட்டார். தொடர்ந்து இவர் மீது குண்டர் தடுப்புச் சட்டம் பாய்ந்த நிலையில், சிறையில் அடைக்கப்பட்டிருந்தார்.

இந்நிலையில், கடந்த மாதம் நீதிமன்ற நிபந்தனை ஜாமீனில் வெளியே வந்த சுள்ளான் மதனை மற்றொரு தரப்பு தொடர்ந்து நோட்டமிட்டு வந்துள்ளது. இன்று சிவகங்கை அருகே உள்ள மேலமங்கலம் கிராமத்தில் வடமாடு மஞ்சுவிரட்டுப் போட்டி நடைபெற்றது. இந்தப் போட்டியைக் காண்பதற்காக சுள்ளான் மதன் மேலமங்கலத்திற்கு வந்துள்ளார்.

இதையும் படிங்க: உச்சக்கட்ட பதற்றம்...!! - சிவகங்கையையே மிரளவிட்ட இரட்டைக்கொலையில் ‘திடுக்’ திருப்பம்... வெளியானது அதிர்ச்சி தகவல்...!

அவர் அங்கு வந்திருப்பதை முன்கூட்டியே அறிந்து திட்டமிட்டுப் பின்தொடர்ந்து வந்த பயங்கர ஆயுதங்களை ஏந்திய மர்ம கும்பல் ஒன்று, திடீரென அவரைச் சுற்றி வளைத்தது. அவர்களிடம் இருந்து தப்பிக்க உயிரைக் கையில் பிடித்துக்கொண்டு ஓடிய சுள்ளான் மதனை, அங்குள்ள கோவில் அருகிலிருந்த கரும்புத் தோட்டத்திற்குள் விரட்டிச் சென்று சரமாரியாக வெட்டிப் படுகொலை செய்துவிட்டு அந்தக் கும்பல் அங்கிருந்து தப்பி ஓடியது.

தகவலறிந்து சம்பவ இடத்திற்கு விரைந்து வந்த சிவகங்கை நகர் காவல் நிலைய போலீசார், இரத்த வெள்ளத்தில் சடலமாகக் கிடந்த சுள்ளான் மதனின் உடலைக் கைப்பற்றி, உடற்கூறு ஆய்வுக்காகச் சிவகங்கை அரசு மருத்துவக் கல்லூரி மருத்துவமனைக்கு அனுப்பி வைத்தனர். இந்தச் சம்பவம் இரட்டைச் சகோதரர்கள் கொலை வழக்கின் தொடர்ச்சியாகப் பழிக்குப் பழியாக அரங்கேற்றப்பட்டதா அல்லது வேறு ஏதேனும் முன்விரோதம் காரணமா என்ற கோணத்தில் வழக்குப் பதிவு செய்து, தப்பியோடிய மர்ம நபர்களைத் தனிப்படை அமைத்துப் போலீசார் தீவிரமாகத் தேடி வருகின்றனர்.

இதையும் படிங்க: கொடுங்கையூரில் நேர்ந்த துயரம்... விஷவாயு தாக்கி இருவர் பலி..! தொடர் விசாரணை..!!