சிவகங்கை மாவட்டத்தில் சரித்திரப் பதிவேட்டு ரவுடியான சுள்ளான் மதனின் கொலை வழக்கில் காவல்துறை தீவிர நடவடிக்கைகளை மேற்கொண்டு வருகிறது. இதுவரை 13 பேர் கைது செய்யப்பட்டுள்ள நிலையில், சமூக வலைதளங்களில் பரவிய வன்முறைத் தூண்டுதல் பதிவுகளுக்கு எதிராகவும் கடும் நடவடிக்கை எடுக்கப்பட்டுள்ளது.

ஒக்கூர் அருகே புதுப்பட்டி கிராமத்தைச் சேர்ந்த 26 வயதான மதன் என்கிற சுள்ளான் மதன் மீது கொலை, கொலை முயற்சி உள்ளிட்ட பல வழக்குகள் நிலுவையில் இருந்தன. 2024 ஆம் ஆண்டு ஜூன் மாதம் மதுரை மாவட்டம் கரடிப்பட்டியைச் சேர்ந்த சகோதரர்கள் ஜெயசூர்யா மற்றும் சுபாஷ் ஆகியோர் கொல்லப்பட்ட வழக்கில் அவர் கைது செய்யப்பட்டு குண்டர் சட்டத்தின் கீழ் சிறையில் அடைக்கப்பட்டார். 

அக்டோபர் 7 அன்று ஜாமீனில் வெளியே வந்த அவர், அக்டோபர் 18 அன்று மேலமங்கலத்தில் நடைபெற்ற வடமாடு மஞ்சுவிரட்டு நிகழ்ச்சியில் தனது காளையுடன் கலந்துகொண்டார். அப்போது இருசக்கர வாகனங்களில் வந்த ஒரு கும்பல் அவரை விரட்டிச் சென்று அருகிலுள்ள கரும்புத் தோட்டத்தில் வைத்து வாள், அரிவாள் போன்ற ஆயுதங்களால் சரமாரியாக வெட்டிக் கொலை செய்தது.

இதையும் படிங்க: "பழிக்குப்பழி..!! சீரழிக்கும் ரீல்ஸ்..! சுள்ளான் மதன் கொலை வழக்கில் புதிய தகவல்..!

சிவகங்கை நகர் காவல் நிலையத்தில் வழக்கு பதிவு செய்யப்பட்டு, மாவட்ட காவல் கண்காணிப்பாளர் அபிஷேக் குப்தா உத்தரவின்படி ஆறு தனிப்படைகள் அமைக்கப்பட்டன. சம்பவம் நடந்த 12 மணி நேரத்திற்குள் பிரதீப், பாலமுருகன், பாபு ஆகியோர் கைது செய்யப்பட்டனர். தொடர் விசாரணையில் சந்தோஷ், ஜெயமாணிக்கராஜ், முத்துசூர்யா, விக்னேஷ், மிதுன் மாணிக்கம், அஜித்குமார், சந்துரு உள்ளிட்டோர் பிடிபட்டனர். 

நேற்று அதிபதி ராஜா, மணிகண்டன், விஜய் ஆகிய மூவரும் கைது செய்யப்பட்டதால் மொத்த எண்ணிக்கை 13 ஆக உயர்ந்தது. விசாரணையில் இந்தக் கொலை பழிவாங்கும் நோக்கில் நடந்ததாகத் தெரியவந்துள்ளது. மதனின் நண்பர் சம்பந்தப்பட்ட முந்தைய கொலை வழக்கில் ஏற்பட்ட பகைதான் காரணம் எனக் கைதானவர்கள் வாக்குமூலம் அளித்துள்ளனர். மேலும் சிலர் தேடப்பட்டு வருகின்றனர்.

இதற்கிடையே சமூக வலைதளங்களில் இரு தரப்பினரும் ஒருவருக்கொருவர் மிரட்டல் விடுக்கும் வகையிலும் வன்முறையைத் தூண்டும் வகையிலும் பதிவுகளை வெளியிட்டனர். சைபர் கிரைம் பிரிவு கண்காணித்து 74 இன்ஸ்டாகிராம் மற்றும் 3 பேஸ்புக் கணக்குகள் உள்ளிட்ட 77 கணக்குகளை முடக்கியது.

இதுதொடர்பாக 24 வழக்குகள் பதிவு செய்யப்பட்டு நான்கு பேர் கைது செய்யப்பட்டுள்ளனர். சமூகப் பதற்றத்தை ஏற்படுத்தும் பதிவுகளைத் தொடர்ந்து வெளியிடுவோர் மீது கடும் சட்ட நடவடிக்கை எடுக்கப்படும் என சிவகங்கை காவல்துறை எச்சரித்துள்ளது.

இதையும் படிங்க: சிவகங்கையில் பழிக்கு பழி கொலை: ரவுடி சுள்ளான் மதன் ஓட ஓட விரட்டி வெட்டி கொலை!