தமிழ்நாட்டின் ராமேஸ்வரம் மீனவர்களை இலங்கை கடற்படை எல்லை தாண்டி மீன்பிடித்ததாகக் கூறி தொடர்ந்து கைது செய்து வருவது பெரும் பரபரப்பை ஏற்படுத்தியுள்ளது. கடந்த சில மாதங்களில் மட்டும் 60-க்கும் மேற்பட்ட மீனவர்கள் கைது செய்யப்பட்டு, அவர்களின் விசைப்படகுகள் பறிமுதல் செய்யப்பட்டுள்ளன. இதனால் மீனவ குடும்பங்கள் வாழ்வாதாரத்தை இழந்து தவிக்கின்றனர்.
ராமநாதபுரம், தூத்துக்குடி, நாகப்பட்டினம் உள்ளிட்ட மாவட்டங்களைச் சேர்ந்த மீனவர்கள் பாக் நீரிணையில் பாரம்பரியமாக மீன்பிடித்து வருகின்றனர். ஆனால், இலங்கை கடற்படை அவர்களை அத்துமீறி கைது செய்வதுடன், படகுகளை அரசுடைமையாக்குவது, அபராதம் விதிப்பது, மீன்பிடி வலைகளை சேதப்படுத்துவது போன்ற அட்டூழியங்களை செய்து வருகிறது. கடந்த ஜூலை மாதம் 28-ம் தேதி ராமேஸ்வரம் மற்றும் பாம்பனைச் சேர்ந்த 14 மீனவர்கள் கைது செய்யப்பட்டனர். இதேபோல், ஆகஸ்ட் 9-ம் தேதி 7 மீனவர்கள் கைது செய்யப்பட்டு மன்னார் நீதிமன்றத்தில் ஆஜர்படுத்தப்பட்டனர்.
இதையும் படிங்க: சொந்த ஊரில் மண்ணைக் கவ்விய ஜெகன் மோகன் ரெட்டி... தட்டித்தூக்கிய தெலுங்கு தேசம் கட்சி...!
இதைக் கண்டித்து, ராமேஸ்வரம் மீனவர்கள் கடந்த 11ம் தேதி முதல் காலவரையற்ற வேலைநிறுத்தப் போராட்டத்தில் ஈடுபட்டுள்ளனர். 700-க்கும் மேற்பட்ட விசைப்படகுகள் கரையில் நிறுத்தப்பட்டு, 10,000-க்கும் மேற்பட்ட மீனவர்கள் வேலை இழந்துள்ளனர். ஆகஸ்ட் 15-ல் உண்ணாவிரதமும், 19-ல் ரயில் மறியலும் திட்டமிடப்பட்டுள்ளன.
தமிழக முதல்வர் மு.க. ஸ்டாலின், மத்திய வெளியுறவுத் துறை அமைச்சர் ஜெய்சங்கருக்கு கடிதம் எழுதி, கைதான மீனவர்களையும் படகுகளையும் விடுவிக்க நடவடிக்கை எடுக்க வலியுறுத்தியுள்ளார். இலங்கை சிறையில் 88 மீனவர்கள் உள்ள நிலையில், இப்பிரச்சினைக்கு நிரந்தர தீர்வு காண மத்திய அரசு உரிய நடவடிக்கை எடுக்க வேண்டும் என மீனவ சமூகம் கோரிக்கை விடுத்துள்ளது.
இந்நிலையில் ராமேஸ்வரத்தைச் சேர்ந்த ஏழு மீனவர்களை இலங்கை மன்னார் நீதிமன்றம் இன்று நிபந்தனைகளுடன் விடுதலை செய்துள்ளது. இவர்கள் எல்லை தாண்டி மீன்பிடித்ததாகக் கூறி இலங்கை கடற்படையால் கைது செய்யப்பட்டு, மன்னார் நீதிமன்றத்தில் ஆஜர்படுத்தப்பட்டனர். நீதிமன்றம் ஒவ்வொரு மீனவருக்கும் தலா 1.75 லட்சம் ரூபாய் அபராதம் விதித்து, அதனை செலுத்தினால் விடுதலை செய்யப்படுவார்கள் என உத்தரவிட்டது. மேலும் அபராதத்தை கட்டத் தவறினால் ஆறு மாதம் சிறை தண்டனை விதிக்கப்படும் என்று நீதிபதிகள் எச்சரிக்கை விடுத்துள்ளனர்.
இந்த விடுதலை முடிவு மீனவர்களுக்கு ஆறுதல் அளித்தாலும், அபராதத் தொகையைச் செலுத்துவது அவர்களுக்கு பொருளாதார சுமையாக உள்ளது. மீனவர் பிரச்சினைக்கு நிரந்தரத் தீர்வு காண மத்திய, மாநில அரசுகள் உடனடி நடவடிக்கை எடுக்க வேண்டும் என மீனவ சமூகம் கோரிக்கை விடுத்துள்ளது.
இதையும் படிங்க: #BREAKING: தூய்மை பணியாளர்களுக்கு சிறப்பு திட்டங்கள்… தமிழக அமைச்சரவையில் முடிவு