கரப்பான் பூச்சி ஜனதா கட்சியின் செப்டம்பர் 5 போராட்டத்திற்கு தடை விதிக்க உச்சநீதிமன்றம் மறுத்துவிட்டது. நீட் தேர்வு வினாத்தாள் கசிவு மற்றும் பிற முறைகேடுகளுக்கு எதிராக நாடு முழுவதும் மாணவர்கள் நடத்திய போராட்டங்களில் ஈடுபட்டவர்கள் மீது பதிவு செய்யப்பட்ட வழக்குகளை அரசு வாபஸ் பெறாததைக் கண்டித்து இந்தப் போராட்டம் அறிவிக்கப்பட்டிருந்தது. டெல்லியில் இந்தியா கேட் பகுதியில் இருந்து தொடங்கி டெல்லி காவல்துறை தலைமையகத்தை நோக்கி அமைதியான பேரணி நடத்தப்படும் என்று கட்சி தரப்பில் தெரிவிக்கப்பட்டிருந்தது.

நீட் யுஜி தேர்வு தொடர்பான முறைகேடுகள் குறித்து கடந்த ஜூன் மாதம் தொடங்கிய போராட்டம் ஜூலை மாதம் வரை நீடித்தது. ஜந்தர் மந்தரில் தொடர்ந்து நடைபெற்ற இந்தப் போராட்டம் பல மாநிலங்களுக்கும் பரவியது. ஜூலை 20 அன்று நாடாளுமன்றத்தை நோக்கி நடந்த பேரணியில் மோதல்கள் ஏற்பட்டன. அதைத் தொடர்ந்து அரசுடன் பேச்சுவார்த்தை நடைபெற்றது. ஜூலை 25 அன்று அரசு சில உறுதிமொழிகளை அளித்ததை அடுத்து போராட்டம் வாபஸ் பெறப்பட்டது. மாணவர்கள் மீதான வழக்குகளை திரும்பப் பெறுவது உள்ளிட்ட உறுதிமொழிகள் அப்போது அளிக்கப்பட்டதாக கட்சி தரப்பில் கூறப்பட்டது.ஆனால் அந்த உறுதிமொழிகள் முழுமையாக நிறைவேற்றப்படவில்லை என்றும், பல மாணவர்கள் மீதான வழக்குகள் இன்னும் நிலுவையில் உள்ளன என்றும் கரப்பான் பூச்சி ஜனதா கட்சி குற்றம்சாட்டியது.

இதனால் மீண்டும் போராட்டத்திற்கு அழைப்பு விடுக்கப்பட்டது. செப்டம்பர் 5 ஆம் தேதி ஆசிரியர்கள் தினத்தன்று இந்தியா கேட்டில் இருந்து தொடங்கும் பேரணியில் நீட் தேர்வு காரணமாக உயிரிழந்த மாணவர்களின் குடும்பத்தினரும், முந்தைய போராட்டங்களில் பாதிக்கப்பட்டவர்களும் முன்னிலை வகிப்பார்கள் என்று அறிவிக்கப்பட்டது. மாணவர்கள் மற்றும் இளைஞர்கள் அதிக எண்ணிக்கையில் கலந்துகொள்ள அழைப்பு விடுக்கப்பட்டது.இந்தப் போராட்ட அறிவிப்புக்கு எதிராக உச்சநீதிமன்றத்தில் மனு தாக்கல் செய்யப்பட்டது. டெல்லியில் சட்டம் ஒழுங்கு சீர்குலைய வாய்ப்புள்ளது என்றும், வரவிருக்கும் பிரிக்ஸ் உச்சிமாநாட்டை முன்னிட்டு உணர்திறன் மிக்க பகுதிகளில் பெரும் அளவிலான போராட்டங்களை கட்டுப்படுத்த வேண்டும் என்றும் மனுவில் கோரப்பட்டது. முன்னாள் காவல்துறை அதிகாரி ஒருவர் தாக்கல் செய்த இந்த மனுவில், அனுமதி இல்லாமல் உணர்திறன் மிக்க பகுதிகளில் போராட்டம் நடத்தக் கூடாது என்றும் கோரப்பட்டிருந்தது.இந்த மனுவை விசாரித்த உச்சநீதிமன்ற அமர்வு, போராட்டத்திற்கு தடை விதிக்க மறுத்துவிட்டது. தலைமை நீதிபதி சூர்யகாந்த் தலைமையிலான அமர்வு, அனைவரும் பொறுப்புடன், அமைதியாக மற்றும் சட்டத்திற்கு உட்பட்டு நடந்துகொள்வார்கள் என்ற அனுமானத்தின் அடிப்படையில் செயல்படுவதாகத் தெரிவித்தது.

இதையும் படிங்க: “எங்கள் குரலை ஒடுக்க முயற்சி!” சுதந்திர தினத்தில் கணக்கு முடக்கப்பட்டதாக சிஜேபி புகார்!

தற்போதைய நிலையில் ஏதேனும் அசம்பாவிதம் நடக்கும் என்று கருதும் அளவுக்கு எந்த உறுதியான காரணமும் இல்லை என்று நீதிபதிகள் சுட்டிக்காட்டினர். சட்டம் ஒழுங்கைப் பேணுவது அரசு மற்றும் காவல்துறையின் பொறுப்பு என்றும், அவர்கள் தங்கள் கடமையை சரிவர நிறைவேற்றுவார்கள் என்றும் எதிர்பார்ப்பதாக அமர்வு தெரிவித்தது.போராட்டம் தொடர்பான வழக்கை செப்டம்பர் 10 ஆம் தேதிக்கு ஒத்திவைத்த நீதிமன்றம், மத்திய அரசு மற்றும் டெல்லி காவல்துறைக்கு நோட்டீஸ் அனுப்பியது. முந்தைய போராட்டங்களில் ஏற்பட்ட வன்முறை மற்றும் காவல்துறை நடவடிக்கைகள் தொடர்பாக அமைக்கப்பட்ட உயர் அதிகாரக்குழுவிடம் தங்கள் கவலைகளைத் தெரிவிக்க மனுதாரருக்கு அறிவுறுத்தப்பட்டது. அமைதியான போராட்டத்திற்கு அரசியலமைப்பு உரிமை உள்ளது என்ற நிலையில், இரு தரப்பினரும் சட்டத்தை மதித்து நடந்துகொள்ள வேண்டும் என்றும் நீதிமன்றம் வலியுறுத்தியது.இந்த உத்தரவால் செப்டம்பர் 5 ஆம் தேதி திட்டமிடப்பட்டுள்ள போராட்டம் நடைபெற வழி ஏற்பட்டுள்ளது. 

இதையும் படிங்க: ஜந்தர் மந்தர் சீசன் 2 விரைவில்! CJP தலைவர் அபிஜித் தீப்கே அறிவிப்பு!