தமிழ்நாடு அரசு, தமிழ்நாடு ஒருங்கிணைந்த வளர்ச்சி மற்றும் கட்டிட விதிகள் 2019-இல் திருத்தங்கள் செய்து அரசாணை வெளியிட்டுள்ளது. இந்த மாற்றங்கள் கட்டிட உயரம், வணிகப் பயன்பாடு மற்றும் பார்க்கிங் விதிமுறைகள் தொடர்பானவை. இவை கட்டுமானத் துறைக்கு வசதிகளை ஏற்படுத்தும் என எதிர்பார்க்கப்படுகிறது.முக்கிய மாற்றம் கட்டிட உயர வரம்பு. அதிக உயரம் இல்லாத கட்டிடங்களுக்கான வரம்பு 18.30 மீட்டரில் இருந்து 19.50 மீட்டராக உயர்த்தப்பட்டுள்ளது. இதனால் ஸ்டில்ட் பிளஸ் ஐந்து தளங்கள் அல்லது தரைத்தளம் பிளஸ் ஐந்து தளங்கள் கொண்ட கட்டிடங்கள் இந்தப் பிரிவில் அடங்கும். முன்பு உயர வரம்பு காரணமாக பல கட்டுமானங்கள் கடுமையான விதிகளுக்கு உட்பட்டு நிறைவு சான்றிதழ் பெறுவதில் சிரமம் ஏற்பட்டது.

புதிய வரம்பால் குடியிருப்புகளில் கூரை உயரம் அதிகரித்து காற்றோட்டம் மற்றும் அழகியல் மேம்படும். சாலை அகலம், தளப்பரப்பு குறியீடு, பின்னடைவு போன்ற பிற விதிகள் தொடர்ந்து பொருந்தும்.வணிகப் பயன்பாட்டில் தளர்வு அறிவிக்கப்பட்டுள்ளது. சென்னை பெருநகரப் பகுதியில் 12 மீட்டர் அல்லது அதற்கு மேற்பட்ட அகலமுள்ள சாலையை ஒட்டிய இடங்கள் வணிகப் பயன்பாட்டு மண்டலமாகக் கருதப்படும். சென்னைக்கு வெளியே 9 மீட்டர் அல்லது அதற்கு மேற்பட்ட சாலையை ஒட்டிய இடங்களுக்கு இந்த அனுமதி பொருந்தும். இதனால் மறுவகைப்படுத்தல் விண்ணப்பங்கள் குறையும்.

மாநாட்டு அரங்குகள், பலதள பார்க்கிங், ஒற்றைத் திரை ஏசி சினிமாக்களுக்கு குறைந்தபட்ச சாலை அகலம் 12 மீட்டர். கல்யாண மண்டபங்கள் போன்றவற்றுக்கு மாநகராட்சி பகுதிகளில் 15 மீட்டர், பஞ்சாயத்துகளில் 12 மீட்டர். நட்சத்திர ஹோட்டல்கள் மற்றும் மால் வளாகங்களுக்கு 18 மீட்டர் சாலை அகலம் தேவை.ஐடி நிறுவனங்கள், ஐடி சேவைகள் மற்றும் உயிர் தகவலியல் மையங்களுக்கான பார்க்கிங் விதியும் மாற்றப்பட்டுள்ளது. 75 சதுர மீட்டர் தளப்பரப்பிற்கு ஒரு கார் பார்க்கிங் இடம் கட்டாயம். முன்பு 50 சதுர மீட்டருக்கு ஒரு இடம் இருந்தது. இரு சக்கர வாகனங்களுக்கு 50 சதுர மீட்டருக்கு ஒரு இடம். இது வணிகக் கட்டிட விதிகளுடன் இணைக்கப்பட்டுள்ளது.

இதையும் படிங்க: பழங்குடியின மாணவர்களுக்கு ஹேப்பி நியூஸ்..!! தமிழக அரசு வெளியிட்ட அதிரடி அறிவிப்பு!! என்ன தெரியுமா..??

இதனால் பார்க்கிங் இடங்கள் குறைந்து கட்டுமானப் பரப்பு அதிகரிக்க வாய்ப்புள்ளது.மற்ற அம்சங்களில், ஹோட்டல்களில் ஓட்டுநர்களுக்கான தங்கும் வசதி கட்டாயம். மின்சார வாகன சார்ஜிங் வசதிகள் குறிப்பிட்ட குடியிருப்புகளில் அறிமுகம். 50-க்கும் மேற்பட்ட அலகுகள் உள்ள கட்டிடங்களில் பார்வையாளர் பார்க்கிங்கில் பாதிக்கு வேக சார்ஜிங் தேவை. மாற்றுத்திறனாளிகள் மற்றும் முதியோருக்கான அணுகல் வசதிகள் மேம்படுத்தப்பட்டுள்ளன. திறந்த சமையலறைகள் அனுமதிக்கப்பட்டுள்ளன. சென்னையின் நீர்நிலை மீள்நிரப்புதல் பகுதிகளில் குறிப்பிட்ட கட்டிடங்களுக்கான உயரம் 9 மீட்டரில் இருந்து 14 மீட்டராக உயர்த்தப்பட்டுள்ளது.

இதையும் படிங்க: "ரியல் எஸ்டேட்"..! ரெராவில் அதிரடி மாற்றம்..! புதிய உறுப்பினர்கள் நியம‌னம்.!