பள்ளிகளில் பயிலும் மாணவிகளின் மாதவிடாய் சுகாதார மேலாண்மை (Menstrual Hygiene Management) தொடர்பாக உச்ச நீதிமன்றம் பிறப்பித்த உத்தரவை முழுமையாகச் செயல்படுத்தும் வகையில், தமிழ்நாடு அரசு பள்ளிக் கல்வித்துறை சார்பில் விரிவான வழிகாட்டு நெறிமுறைகள் வெளியிடப்பட்டுள்ளன.

பள்ளிகளில் பயிலும் பெண் குழந்தைகளின் கல்வி இடைநிற்றலைத் தடுக்கவும், அவர்களின் உடல்நலம் மற்றும் சுகாதாரத்தைப் பாதுகாக்கவும் உச்ச நீதிமன்றம் வழிகாட்டியிருந்தது. இதனைத் தொடர்ந்து, தலைமைச் செயலகத்தின் வழிகாட்டுதலின்படி பள்ளிக் கல்வித்துறை அனைத்து அரசு, அரசு உதவிபெறும் மற்றும் தனியார் பள்ளிகளுக்கும் சுற்றறிக்கை அனுப்பியுள்ளது.

அதில், அனைத்துப் பள்ளிகளிலும் மாணவிகளுக்கு உரிய நீர் இணைப்புடன் கூடிய தனித்தனி கழிப்பறைகள் இருப்பதை நிர்வாகம் கட்டாயம் உறுதி செய்ய வேண்டும் என்றும், மாணவிகளுக்கு மறுசுழற்சி செய்யத்தக்க இலவச நாப்கின்கள் தடையின்றி வழங்கப்பட வேண்டும் என்றும் தெரிவிக்கப்பட்டுள்ளது.

இதையும் படிங்க: ஆவின் பாலுக்கு ஆதார் அட்டையா? தமிழக அரசுக்கு சிபிஐ எச்சரிக்கை!

மேலும், பருவமடைதல், மாதவிடாய் சுகாதாரம் மற்றும் இளம் பெண்களைப் பாதிக்கும் பிசிஓஎஸ் குறைபாடுகள் குறித்து மாணவிகளிடையே மருத்துவர்கள் மூலம் விழிப்புணர்வை ஏற்படுத்த வேண்டும் என அறிவுறுத்தப்பட்டுள்ளது. மாற்றுத்திறன் கொண்ட மாணவிகள் எளிதில் அணுகத்தக்க வகையில் சாய்தளங்கள், கைப்பிடிகள், சோப்பு, நீர் மற்றும் கைகழுவும் வசதிகளுடன் கழிப்பறைகள் முறையாகப் பராமரிக்கப்பட வேண்டும் என்றும் சுற்றறிக்கையில் குறிப்பிடப்பட்டுள்ளது.

பள்ளிகளில் அமைக்கப்பட்டுள்ள இந்த அனைத்து அடிப்படைச் சுகாதார வசதிகளும் தினசரி தூய்மையாகவும் முறையாகவும் செயல்படுவதை அந்தந்தப் பள்ளித் தலைமை ஆசிரியர்களே நேரடியாக ஆய்வு செய்து உறுதி செய்ய வேண்டும் எனப் பள்ளிக் கல்வித்துறை திட்டவட்டமாக உத்தரவிட்டுள்ளது.

இதையும் படிங்க: தலைமை செயலகமே இருளில் மூழ்கியது! அறிவிக்கப்படாத மின்வெட்டுக்கு அன்புமணி ராமதாஸ் கண்டனம்!