தமிழக அரசின் சமூக நலத்துறை சார்பில் பெண்களின் திருமண நன்னாளில் வழங்கப்படும் 'அண்ணன் சீர் திட்டத்தின்' கீழ் பலன் பெற விரும்பும் பயனாளிகளுக்கு ஆதார் ஆவணத்தைச் சமர்ப்பிப்பது கட்டாயமாக்கப்பட்டுத் தமிழ்நாடு அரசு அதிகாரப்பூர்வ உத்தரவை வெளியிட்டுள்ளது.

தமிழகத்தில் பெண்களின் திருமணத்தை ஊக்கப்படுத்தவும், அவர்களின் வாழ்வாதாரத்திற்கு உதவவும் தமிழக அரசின் சமூக நலத்துறை சார்பில் 'அண்ணன் சீர் திட்டம்' செயல்படுத்தப்பட்டு வருகிறது. இத்திட்டத்தின் கீழ் தகுதியான பயனாளிகளுக்குத் திருமண நன்னாளில் தமிழக அரசின் சீர்வரிசையாக 8 கிராம் தங்க நாணயமும், ஒரு பட்டுப் புடவையும் வழங்கப்பட்டு வருகின்றன.

இந்நிலையில், இத்திட்டத்தின் பலன்கள் தகுதியான உண்மையான பயனாளிகளுக்கு மட்டுமே முறையாகச் சென்றடைவதை உறுதி செய்யும் நோக்கிலும், போலி விண்ணப்பங்களைத் தவிர்க்கும் வகையிலும் பயனாளிகள் தங்களின் ஆதார் விவரங்களை இணைப்பது தற்போது கட்டாயமாக்கப்பட்டுள்ளது.

இதையும் படிங்க: ரேஷன் கார்டு வெச்சிருக்கீங்களா..!! நாளைக்கு மிஸ் பண்ணிடாதீங்க..!! தமிழக அரசு முக்கிய அறிவிப்பு..!!

அரசு வெளியிட்டுள்ள வழிகாட்டுதல்களின் முக்கிய விவரங்கள்:

ஆதார் கட்டாயம்: இத்திட்டத்தின் கீழ் பயன்பெற விரும்பும் மணப்பெண்கள் மற்றும் பயனாளிகள், தங்களின் முக்கிய அடையாள ஆவணமாக ஆதார் அட்டையைச் சமர்ப்பிக்க வேண்டும்.

ஆதார் இல்லாதவர்களுக்கான நடைமுறை: இதுவரை ஆதார் பெறாத பயனாளிகள், அதற்கு உடனடியாக விண்ணப்பித்து, அந்தப் பதிவுச் சான்றைக் (Enrolment Slip) கொண்டு திட்டத்திற்கு விண்ணப்பிக்கலாம்.

ஆதார் ஒதுக்கீட்டுக்கான மாற்று ஆவணங்கள்: ஆதார் பதிவு மற்றும் சரிபார்ப்பு முறைகளுக்குப் புகைப்படத்துடன் கூடிய வங்கிக் கணக்குப் புத்தகம், பான் அட்டை (PAN Card), கடவுச்சீட்டு (Passport), குடும்ப அட்டை (Ration Card), வாக்காளர் அடையாள அட்டை, மகாத்மா காந்தி தேசிய ஊரக வேலை உறுதித் திட்ட அட்டை (100 நாள் வேலை அட்டை), புகைப்படத்துடன் கூடிய கிசான் பாஸ்புக், ஓட்டுநர் உரிமம் (Driving License), வட்டாட்சியர் உள்ளிட்ட சான்றொப்ப அதிகாரிகளால் வழங்கப்பட்ட புகைப்படத்துடன் கூடிய சான்றிதழ் அல்லது அரசால் அங்கீகரிக்கப்பட்ட ஏதேனும் ஒரு அதிகாரப்பூர்வ அடையாளச் சான்றிதழை இணைத்துப் பயனாளிகள் விண்ணப்பிக்கலாம்.

பயோமெட்ரிக் அங்கீகாரத் தோல்விக்குத் தீர்வு: பயனாளிகளின் கைரேகை உள்ளிட்ட பயோமெட்ரிக் விவரங்களின் தரம் குறைவாக இருப்பதாலோ அல்லது தொழில்நுட்பக் காரணங்களாலோ ஆதார் அங்கீகாரம் (Biometric Authentication) தோல்வியடையும் பட்சத்தில், அவர்கள் திட்டப் பலன்களை இழந்துவிடாமல் இருக்க மாற்று வழிமுறைகள் மற்றும் சிறப்புச் சரிபார்ப்பு நடவடிக்கைகளை மேற்கொள்ளவும் அலுவலர்களுக்கு அறிவுறுத்தப்பட்டுள்ளது.

தகுதியுடைய பயனாளிகள் உரிய ஆவணங்களுடன் விண்ணப்பித்து இத்திட்டத்தின் பலன்களைப் பெற்றுக்கொள்ளலாம் எனத் தெரிவிக்கப்பட்டுள்ளது.

இதையும் படிங்க: 1.28 லட்சம் குழந்தைகளுக்கு தாய்மாமன் தங்க மோதிரம்: தமிழக அரசின் மெகா திட்டம் தொடக்கம்!