மேற்கு வங்காள சட்டப்பேரவைத் தேர்தலில் பாஜகவிடம் தோல்வியைத் தழுவிய திரிணாமுல் காங்கிரஸ் கட்சியின் உள்ளாட்சி மோதல்கள் இப்போது பெரும் நிதி முறைகேடு விவகாரமாக வெடித்துள்ளது. மம்தா பானர்ஜி தலைமையிலான கட்சி, தேர்தல் நிதி மேலாண்மை தொடர்பாக உட்கட்சி பூசலில் சிக்கிய நிலையில், அதிருப்தி எம்.எல்.ஏ.க்கள் கொல்கத்தா போலீசாரிடம் புகார் அளித்தனர். இதனால் கட்சியின் நிதி பரிவர்த்தனைகள் மீது தீவிர விசாரணை தொடங்கியுள்ளது.

புகாரில், “கட்சியின் வங்கிக் கணக்குகளில் உள்ள பல நூறு கோடி ரூபாயின் ஆதாரம் சந்தேகத்திற்குரியது. சட்டவிரோத பண வசூல், நேர்மையற்ற நிதிப் பரிமாற்றங்கள் உள்ளன” என அதிருப்தி எம்.எல்.ஏ.க்கள் குற்றம் சாட்டினர். இந்தப் புகாரின் அடிப்படையில் கொல்கத்தா சைபர் குற்றப்பிரிவு போலீசார் உடனடியாக திரிணாமுல் காங்கிரஸின் மூன்று முக்கிய வங்கிக் கணக்குகளை முடக்கினர். இந்த நடவடிக்கை கட்சியின் உயர்மட்டத்தில் பெரும் பரபரப்பை ஏற்படுத்தியுள்ளது.

இதற்கிடையே, மத்திய அமலாக்கத்துறை (ED) அதிகாரிகளும் வழக்கைத் தீவிரப்படுத்தினர். கொல்கத்தாவில் உள்ள ‘கேர்வெல் ஏவியேஷன்’ ஹெலிகாப்டர் நிறுவனம் உள்பட ஐந்து இடங்களில் அதிரடி சோதனை நடத்தினர். சோதனையின் அடிப்படையில், பண மோசடி தடுப்புச் சட்டத்தின்கீழ் திரிணாமுல் காங்கிரஸ் கட்சியின் அதே மூன்று வங்கிக் கணக்குகளை அமலாக்கத்துறையும் முடக்கியது. இந்தக் கணக்குகளில் மொத்தம் ரூ.440.42 கோடி இருப்பு இருப்பதாக அதிகாரிகள் உறுதிப்படுத்தினர்.

இதையும் படிங்க: தமிழகம் முழுவதும் 18 இடங்களில் அமலாக்கத்துறை அதிரடி சோதனை..!! காரணம் என்ன..??

முதற்கட்ட விசாரணையில் அதிர்ச்சியூட்டும் தகவல்கள் வெளியாகியுள்ளன. 2023 ஏப்ரல் முதல் 2026 ஜூன் வரையிலான காலகட்டத்தில் கட்சிக் கணக்கில் இருந்து சுமார் ரூ.160 கோடி பல்வேறு பரிவர்த்தனைகள் மூலம் கைமாறியுள்ளது தெரியவந்துள்ளது. இந்தத் தொகையைப் பயன்படுத்தி சொகுசு விமானங்கள் மற்றும் ஹெலிகாப்டர்கள் வாங்கப்பட்டு, பின்னர் அவற்றை திரிணாமுல் காங்கிரஸ் கட்சிக்கே வாடகைக்கு விட்டதாக போலியான கணக்குகள் தயாரிக்கப்பட்டு பெரும் முறைகேடு நடைபெற்றதாக விசாரணையில் தெரியவந்துள்ளது.

இந்த முறைகேடுகள் தேர்தல் நிதி திரட்டல், அரசியல் செலவுகள் மற்றும் தனிப்பட்ட நலன்களுக்காக பயன்படுத்தப்பட்டிருக்கலாம் என அதிகாரிகள் சந்தேகிக்கின்றனர். மேற்கு வங்காள அரசியலில் பெரும் அதிர்வலைகளை ஏற்படுத்தியுள்ள இந்த விவகாரம், திமுகவின் உள் பூசல்களை மேலும் தீவிரப்படுத்தும் என எதிர்பார்க்கப்படுகிறது. அமலாக்கத்துறை விசாரணை தொடரும் நிலையில், கட்சியின் மூத்த தலைவர்கள் மற்றும் நிதி பொறுப்பாளர்கள் மீது நடவடிக்கை எடுக்கப்படலாம் என தகவல்கள் வெளியாகியுள்ளன.

இந்தச் சம்பவம் மேற்கு வங்காள அரசியலில் நிதி ஒழுங்குமுறை மற்றும் வெளிப்படைத்தன்மை குறித்த கேள்விகளை எழுப்பியுள்ளது. தேர்தல் ஆணையம் உள்ளிட்ட அமைப்புகளும் இது தொடர்பாக கண்காணிப்பை அதிகரிக்கலாம் என அரசியல் விமர்சகர்கள் தெரிவிக்கின்றனர். 

இதையும் படிங்க: பணமோசடி வழக்கில் வீணா விஜயனுக்கு மீண்டும் சம்மன்: ஜூன் 29-ல் ஆஜராக அமலாக்கத்துறை உத்தரவு!