2026-ம் ஆண்டு தமிழக சட்டசபை தேர்தலில் தமிழக வெற்றிக் கழகம் ரூ.19.81 கோடி செலவு செய்துள்ளதாக தேர்தல் ஆணையத்திடம் தாக்கல் செய்துள்ள கணக்கில் தெரிவிக்கப்பட்டுள்ளது. இதே தேர்தலில் திமுக ரூ.197.84 கோடியும், அதிமுக ரூ.112.39 கோடியும் செலவு செய்துள்ளதாக கட்சிகள் தாக்கல் செய்துள்ள அறிக்கைகளில் குறிப்பிடப்பட்டுள்ளது. இதன்மூலம் திமுகவின் அறிவிக்கப்பட்ட தேர்தல் செலவில் சுமார் பத்தில் ஒரு பங்கையே தவெக செலவு செய்திருப்பது தெரியவந்துள்ளது.

தேர்தல் அறிவிக்கப்பட்டது முதல் வாக்குப்பதிவு முடியும் வரையிலான காலகட்டத்தில் கட்சிகள் மேற்கொண்ட செலவுகளை தேர்தல் ஆணையத்திடம் சமர்ப்பிக்க வேண்டும். அந்த அடிப்படையில் தாக்கல் செய்யப்பட்டுள்ள தவெகவின் செலவு கணக்கில், கட்சியின் பொதுத் தேர்தல் பிரசாரத்துக்காக சுமார் ரூ.19.4 கோடி செலவிடப்பட்டதாக தெரிவிக்கப்பட்டுள்ளது.

தவெக தலைவர் விஜய்யின் விமானப் பயணத்துக்காக ரூ.3.55 கோடி செலவிடப்பட்டுள்ளதாக கணக்கில் குறிப்பிடப்பட்டுள்ளது. மார்ச் 14 முதல் ஏப்ரல் 28 வரை விமானப் பயணம் தொடர்பாக பல்வேறு நிறுவனங்களுக்கு பணம் செலுத்தப்பட்டதாகவும் அறிக்கையில் தெரிவிக்கப்பட்டுள்ளது.

இதையும் படிங்க: வீடியோ இருந்தும் விசாரணை நிறுத்தம்... வீரமணி விவகாரம்..! திமுகவை வெளுத்த அமைச்சர் நிர்மல் குமார்..!!

பொதுக்கூட்டங்கள் மற்றும் ரோடு ஷோக்களுக்காக ரூ.2.06 கோடியும், பிரசாரப் பொருட்களுக்காக சுமார் ரூ.40.55 லட்சமும் செலவிடப்பட்டுள்ளதாக தவெக கணக்கு கூறுகிறது. செய்தித்தாள், மின்னணு ஊடகம் மற்றும் வானொலி உள்ளிட்ட ஊடக விளம்பரங்களுக்காக சுமார் ரூ.6.35 கோடி செலவிடப்பட்டுள்ளது.

அதேநேரத்தில், சமூக வலைதளங்களைப் பயன்படுத்தி மேற்கொள்ளப்பட்ட ஆன்லைன் பிரசாரத்துக்காக கட்சி தரப்பில் தனியாக எந்த செலவும் காட்டப்படவில்லை என அறிக்கையில் குறிப்பிடப்பட்டுள்ளது. மேலும், தவெக போட்டியிட்ட தொகுதிகளில் வேட்பாளர்களுக்காக கட்சி சார்பில் நேரடி செலவு எதுவும் காட்டப்படவில்லை என்றும் தகவல் வெளியாகியுள்ளது.

தேர்தல் அறிவிக்கப்பட்டபோது தவெக கணக்கில் ரூ.3.03 கோடி தொடக்க இருப்பு இருந்ததாகவும், தேர்தல் காலத்தில் பல்வேறு வழிகளில் ரூ.7.02 கோடி வருவாய் கிடைத்ததாகவும் தெரிவிக்கப்பட்டுள்ளது.

விஜய் போட்டியிட்ட பெரம்பூர் மற்றும் திருச்சி கிழக்கு தொகுதிகளுக்கு தலா ரூ.40 லட்சம் செலவு செய்யப்பட்டதாக கணக்கில் தெரிவிக்கப்பட்டுள்ளது. 2026 சட்டசபை தேர்தலில் தவெக 233 தொகுதிகளில் போட்டியிட்டது என்பது குறிப்பிடத்தக்கது.

இதனிடையே, திமுக தாக்கல் செய்த கணக்கில் மொத்த தேர்தல் செலவு ரூ.197.84 கோடியாகவும், அதிமுகவின் செலவு ரூ.112.39 கோடியாகவும் தெரிவிக்கப்பட்டுள்ளது. திமுக மட்டும் செய்தித்தாள், தொலைக்காட்சி மற்றும் சமூக ஊடக விளம்பரங்களுக்கு ரூ.70 கோடி செலவிட்டதாக அதன் அறிக்கையில் கூறப்பட்டுள்ளது.

கட்சிகள் தேர்தல் ஆணையத்திடம் தாக்கல் செய்துள்ள இந்த கணக்குகள், தேர்தல் பிரசாரத்துக்காக ஒவ்வொரு கட்சியும் அதிகாரப்பூர்வமாக அறிவித்துள்ள செலவுகளை மட்டுமே பிரதிபலிக்கின்றன என்பது குறிப்பிடத்தக்கது.

இதையும் படிங்க: ஸ்வீட் அங்கிள்... அப்டேட் ஆகுங்க! ஒப்பாரி வைக்காதீங்க! ஸ்டாலினை குறிவைத்து தவெக ஐடி விங் சரமாரி தாக்கு!