வாஷிங்டன்: ஈரான் மீதான போர் இரண்டு மாதங்களைத் தாண்டிய நிலையில், அமெரிக்கா மற்றும் ஈரான் இடையே போரை முடிவுக்கு கொண்டு வரும் 14 அம்ச ஒப்பந்தத்தில் விரைவில் கையெழுத்திடும் வாய்ப்பு உருவாகியுள்ளது. தற்போது அமலில் உள்ள தற்காலிக போர் நிறுத்தத்தை நிரந்தரமாக்கும் வகையில் இரு தரப்பும் நெருங்கி வருவதாக செய்திகள் தெரிவிக்கின்றன.

அமெரிக்க அமைதிப் பேச்சுக் குழுவில் உள்ள ஸ்டீவ் விட்காப் மற்றும் ஜாரெட் குஷ்னர் ஆகியோர் ஈரானிய அதிகாரிகளுடன் நேரடியாகவும், மத்தியஸ்தர்கள் வாயிலாகவும் தீவிர பேச்சுவார்த்தை நடத்தினர். இதன் விளைவாக 14 அம்சங்கள் கொண்ட ஒரு புரிந்துணர்வு ஒப்பந்தம் உருவாகியுள்ளது. அமெரிக்காவை தளமாகக் கொண்ட ‘ஆக்ஸியோஸ்’ செய்தி நிறுவனம் இதை வெளியிட்டுள்ளது. விரைவில் இந்த ஒப்பந்தம் கையெழுத்தாகும் என எதிர்பார்க்கப்படுகிறது.

ஒப்பந்தத்தின் முக்கிய அம்சங்கள் வருமாறு: இரு நாடுகளுக்கும் இடையிலான மோதல்களை அதிகாரப்பூர்வமாக முடிவுக்கு கொண்டு வருதல், ஹார்முஸ் ஜலசந்தியில் பாதுகாப்பான கடல் போக்குவரத்துக்கு ஈரான் உத்தரவாதம் அளித்தல், அமெரிக்க கடற்படையின் முற்றுகையை விலக்குதல், யுரேனியம் செறிவூட்டலை ஈரான் 15 ஆண்டுகளுக்கு நிறுத்தி வைத்தல், உயர் செறிவூட்டப்பட்ட யுரேனியத்தை அகற்றுதல், அமெரிக்கா படிப்படியாக பொருளாதாரத் தடைகளை நீக்குதல் மற்றும் முடக்கப்பட்ட ஈரானிய நிதிகளை விடுவித்தல் ஆகியவை அடங்கும்.

இதையும் படிங்க: ஈரானுக்கு ரெண்டே வழிதான் இருக்கு!! பேச்சுவார்த்தையா? போரா? முடிவுபண்ணிக்குங்க! ட்ரம்ப் மிரட்டல்

ஒப்பந்தத்தில் கையெழுத்திட்ட பிறகு 30 நாட்கள் அவகாசம் வழங்கப்படும். மேலும், சில முக்கிய அம்சங்கள் குறித்து ஈரானின் இறுதி கருத்தை அறிய அமெரிக்கா 48 மணி நேர கால அவகாசம் அளித்துள்ளது. போர் தொடங்கியதில் இருந்து இரு தரப்பும் இவ்வளவு நெருக்கமாக பேச்சுவார்த்தை நடத்துவது இதுவே முதல் முறையாகும்.

இந்த ஒப்பந்தம் நடைமுறைக்கு வந்தால், மத்திய கிழக்கு பகுதியில் நீண்டகாலமாக நிலவும் பதற்றம் குறையும் என எதிர்பார்க்கப்படுகிறது. உலக சந்தையில் எண்ணெய் விலை ஏற்ற இறக்கம் குறையவும், பிராந்திய நாடுகளுக்கு பாதுகாப்பு அதிகரிக்கவும் இந்த ஒப்பந்தம் வழிவகுக்கும் என அரசியல் பார்வையாளர்கள் தெரிவிக்கின்றனர். 

இதையும் படிங்க: ஈரானின் பொருளாதாரம் வீழ்ச்சி அடைந்து வருகிறது! கச்சா எண்ணெய்யில் வருமானம் இல்லை!! ட்ரம்ப் சூசகம்!