தூத்துக்குடி-நெல்லை தேசிய நெடுஞ்சாலையில் தாமிரபரணி ஆற்றின் மேலே அமைந்துள்ள வல்லநாடு பாலங்களின் சேதத்தை சீரமைக்கவும், அதனை கட்டியதில் முறைகேட்டில் ஈடுபட்டவர்கள் மீது உரிய நடவடிக்கை எடுக்கவும் கோரி உயர்நீதிமன்ற மதுரை அமர்வில் வழக்கு தொடரப்பட்டது. இந்த வழக்கை விசாரித்த நீதிபதிகள் வேல்முருகன், கே.கே.ராமகிருஷ்ணன் அமர்வு, தேசிய நெடுஞ்சாலைகள் மக்களின் பயன்பாட்டுக்காக இலவசமாக ஒன்றும் வழங்கப்படவில்லை, பொதுமக்கள் கட்டணம் செலுத்தியே பயன்படுத்துகின்றனர் எனக் கருத்து தெரிவித்தனர்.

நெல்லை மாவட்டத்தைச் சேர்ந்த சிதம்பரம், பெர்டின் ராயன் ஆகியோர் தாக்கல் செய்த மனுவில், நெல்லை-தூத்துக்குடி இடையிலான தேசிய நெடுஞ்சாலையில் தாமிரபரணி ஆறு கடப்பதால், தூத்துக்குடி மாவட்டம் வல்லநாடு அருகே இரண்டு தடத்திலும் 25 கோடி மதிப்பீட்டில் அமைக்கப்பட்ட பாலம் கடந்த 2012ஆம் ஆண்டு திறக்கப்பட்டது எனக் குறிப்பிடப்பட்டுள்ளது. 100 ஆண்டுகள் உத்தரவாதம் அளித்த நிலையில் 2017ஆம் ஆண்டிலேயே நெல்லை-தூத்துக்குடி செல்லும் பாலத்தில் 10 அடி நீளத்திற்கு கான்கிரீட் பாலத்தில் விரிசல் ஏற்பட்டு ஓட்டை விழுந்தது.

பாலம் பலமிழந்துள்ளதால் எந்த நேரமும் இடிந்து விழும் அபாயம் உள்ளதாகவும், தரமற்ற பொருட்களைக் கொண்டு பாலங்கள் கட்டப்பட்டுள்ளதாகவும் மனுவில் தெரிவிக்கப்பட்டது. எனவே, பலமிழந்துள்ள பாலங்களை அகற்றிவிட்டு தரமான புதிய பாலங்கள் கட்டவும், சம்பந்தப்பட்டவர்கள் மீது நடவடிக்கை எடுக்கவும் உத்தரவிட வேண்டும் எனக் கோரப்பட்டது.இந்த மனுவை விசாரித்த நீதிபதிகள், இந்த வழக்கில் தேசிய நெடுஞ்சாலைத் துறையின் திட்ட இயக்குனர், ஒப்பந்ததாரர் ஆகியோரைக் காப்பாற்றவே முயற்சி நடக்கிறது எனக் குறிப்பிட்டனர்.

இதையும் படிங்க: தடை இருந்தும் இந்தியப் பொருட்களுக்கு பாக்.-ல் அதிகரிக்கும் மவுசு.. 69% உயர்ந்த வர்த்தகம்! எப்படி சாத்தியம்?

கனரக வாகனங்கள் சென்றதால் பாலம் சேதமடைந்துள்ளது என்றால், கனரக வாகனங்கள் செல்லும் அளவிற்கு சிறந்த பாலம் அமைக்கப்பட்டிருக்க வேண்டும் அல்லது கனரக வாகனங்களுக்குத் தனிவழி அமைக்கப்பட்டிருக்க வேண்டும் எனக் கருத்து தெரிவித்தனர். மேலும், முறையாகப் பராமரிக்கவில்லை என்றால் நீதிமன்றம் நிபுணர் குழுவை அமைக்க நேரிடும் என எச்சரித்த நீதிபதிகள், அறிக்கை தாக்கல் செய்ய உத்தரவிட்டு வழக்கை ஒத்திவைத்தனர்.

இதையும் படிங்க: அறநிலையத்துறை அதிகாரிகள் இடமாற்றத்தல் கடும் அதிருப்தி! நிர்வாக நலன் காரணமா? துறை வட்டாரங்கள் விளக்கம்!