டாக்டர் பாபாசாகேப் அம்பேத்கர் முன்னெடுத்த அரசியல் கல்விச் சிந்தனையை அடித்தளமாகக் கொண்டு, டாக்டர் ஏ.பி.ஜே. அப்துல் கலாம் பெயரிலான புதிய அரசியல் பயிற்சி மையம் தொடங்கப்படுவதாகவும், தங்களது இயக்கத்தின் உறுப்பினர்கள் எண்ணிக்கை 21 லட்சத்தைக் கடந்து புதிய மைல்கல்லை எட்டியுள்ளதாகவும் 'வி தி லீடர்ஸ்' அறக்கட்டளையின் நிறுவனரான கே. அண்ணாமலை தெரிவித்துள்ளார்.

இது தொடர்பாக அவர் தனது அதிகாரப்பூர்வ எக்ஸ் (ட்விட்டர்) தளத்தில் வெளியிட்டுள்ள தொடர் பதிவுகளில் குறிப்பிட்டிருப்பதாவது இந்தியாவில் முதன்முறையாக, 1956-ஆம் ஆண்டு டாக்டர் பாபாசாகேப் அம்பேத்கர் அவர்கள் அரசியல் கற்றுத் தருவதற்கான பயிற்சி மையம் ஒன்றைத் தொடங்கினார். எனினும், அவரது மறைவுக்குப் பின்னர் அந்த இயக்கம் தொடர முடியாமல் போனது.

இந்நிலையில், மறைந்த முன்னாள் குடியரசுத் தலைவர் டாக்டர் ஏ.பி.ஜே. அப்துல் கலாம் அவர்களின் பெயரிலான 'Centre for Ethics & Politics' குறித்த அறிவிப்பை வெளியிடுவதற்கு முன்பாக, அவரது குடும்பத்தினரிடம் உரிய முறைப்படி அனுமதி பெற்றோம். டாக்டர் அம்பேத்கர் அவர்கள் முன்னெடுத்த அரசியல் கல்விச் சிந்தனையை அடித்தளமாகக் கொண்டு, ஐயா அப்துல் கலாம் அவர்களின் கனவுகளை மக்கள் இயக்கமாக மாற்றி, அரசியலை வெறும் அதிகாரத்திற்கான கருவியாகப் பார்க்காமல், சமூக மாற்றத்திற்கான வழியாகக் கருதும் புதிய தலைமுறைத் தலைவர்களை உருவாக்குவதே நமது முதன்மையான நோக்கம்.

இதையும் படிங்க: வீ தி லீடர்ஸ் வேட்பாளர்கள் தயார்! எப்போது அறிவித்தாலும் உள்ளாட்சித் தேர்தலில் போட்டி உறுதி! அண்ணாமலை அதிரடி!

அதேபோல், நமது 'வி தி லீடர்ஸ்' அறக்கட்டளையின் (We The Leaders Foundation) உறுப்பினர்கள் மற்றும் தலைவர்களின் எண்ணிக்கை தற்போது 21 லட்சத்தைக் கடந்து சாதனை படைத்துள்ளது. இது அடுத்தடுத்து 30 லட்சம், 40 லட்சம் என வளர்ந்து, நிச்சயம் 50 லட்சத்தையும் கடக்கும்.

தொடக்கத்தில் நம்மிடம் இருந்த அதே உத்வேகம், அர்ப்பணிப்பு மற்றும் போராட்டக் குணம் இறுதி வரை தொடர வேண்டும். இது ஒரு புரட்சிகரமான மக்கள் இயக்கம். இந்த இயக்கத்தின் புனிதமான நோக்கத்தையும் உணர்வையும் காப்பது நம் ஒவ்வொருவரின் கடமையாகும். மாற்றத்திற்கான இந்தப் பயணம் எதிர்காலத்தில் இன்னும் பல லட்சம் ஆளுமைமிக்க தலைவர்களை உருவாக்கட்டும் என்று அவர் குறிப்பிட்டுள்ளார்.

இளைஞர்களிடையே நெறிமுறை சார்ந்த அரசியலை ஊக்கப்படுத்தவும், சமூக நலனில் அக்கறை கொண்ட இளம் தலைவர்களை உருவாக்கவும் 'வி தி லீடர்ஸ்' அறக்கட்டளை மூலம் முன்னெடுக்கப்படும் இந்த முயற்சி பொதுவெளியில் பரவலான கவனத்தைப் பெற்றுள்ளது.

இதையும் படிங்க: APJ அப்துல் கலாம் பிறந்தநாளில் வீ த லீடர்ஸ் அண்ணாமலையின் அதிரடி முயற்சி! இளைஞர்களை குறிவைத்து புதிய நகர்வு!