தமிழக சட்டப்பேரவையில் திமுக முன்னாள் அமைச்சர் பி.கே. சேகர் பாபு, சென்னை நகரின் வெள்ளப் பாதுகாப்பு தொடர்பாக கவன ஈர்ப்பு தீர்மானம் கொண்டு வந்து பேசினார். இந்த ஆண்டு வடகிழக்கு பருவமழை கடந்த ஆண்டுகளை விட அதிகமாக இருக்கும் என ஆராய்ச்சியாளர்களும் சமூக ஆர்வலர்களும் எச்சரித்துள்ளதாக அவர் சுட்டிக்காட்டினார். 1997 மற்றும் 2015 ஆம் ஆண்டுகளில் ஏற்பட்ட பெருவெள்ளத்தை விட அதிக மழைப்பொழிவு ஏற்படக்கூடும் என்ற அச்சத்தை வெளிப்படுத்தினார்.

சென்னையைக் காப்பாற்ற அரசு உடனடியாக முன்வர வேண்டும் என அவர் வலியுறுத்தினார். பருவமழைக்கு முன்னதாக கால்வாய்களை முழுமையாகத் தூர்வாரி சுத்தப்படுத்த வேண்டும் என்றார். நகரில் உள்ள பல்வேறு கால்வாய்கள் குப்பைகள், சாக்கடைக் கழிவுகள் மற்றும் வண்டல் மண்ணால் அடைபட்டுள்ளன. இதனால் மழைநீர் சீராக வெளியேற முடியாமல் பல பகுதிகளில் வெள்ள அபாயம் அதிகரித்துள்ளது. டி.நகர், நுங்கம்பாக்கம், அண்ணா நகர், விருகம்பாக்கம், வேளச்சேரி உள்ளிட்ட முக்கிய பகுதிகளில் இப்பிரச்சினை கடுமையாக உள்ளது.

முந்தைய ஆட்சியில் சென்னையில் ஆயிரக்கணக்கான கிலோமீட்டர் மழைநீர் வடிகால் கால்வாய்கள் அமைக்கப்பட்டதாக சேகர் பாபு குறிப்பிட்டார். ஆனால் அவற்றை முறையாகப் பராமரிக்காவிட்டால் பயனில்லை என எச்சரித்தார். தூர்வாரும் பணிகளை விரைந்து முடிக்க வேண்டும். இல்லையெனில் மீண்டும் வெள்ளம் ஏற்பட்டு மக்கள் அவதிப்படுவார்கள் எனக் கூறினார்.மாநகராட்சி மாமன்ற உறுப்பினர்களுக்கு வார்டு மேம்பாட்டு நிதி விடுவிக்கப்படவில்லை என்றும் அவர் புகார் தெரிவித்தார். ஒவ்வொரு உறுப்பினருக்கும் ஆண்டுக்கு அறுபது லட்சம் ரூபாய் ஒதுக்கப்பட்டிருந்தாலும், தேர்தல் நடத்தை விதிமுறைகள் நீக்கப்பட்ட பிறகும் நிதி வழங்கப்படவில்லை.

இதையும் படிங்க: விறுவிறு சட்டசபை..! எகிறும் விலைவாசி... கவன ஈர்ப்பு தீர்மானத்தை கொண்டு வந்த உறுப்பினர்கள்..!!

இதனால் உள்ளூர் மேம்பாட்டுப் பணிகள் முடங்கியுள்ளன. சாலைப் பழுது, குடிநீர் வசதி, சுகாதாரப் பணிகள் போன்ற அத்தியாவசிய வேலைகள் பாதிக்கப்பட்டுள்ளன.ஒப்பந்ததாரர்களுக்கு நிதி வெளியிடப்படாததையும் அவர் சுட்டிக்காட்டினார். மாநகராட்சியில் பல நூறு கோடி ரூபாய் அளவுக்கு நிலுவைத் தொகை உள்ளது. பணிகள் முடிந்தும் பில்ஸ் அனுமதிக்கப்பட்டும் பணம் வழங்கப்படாததால் ஒப்பந்ததாரர்கள் சிரமப்படுகின்றனர்.

இது புதிய பணிகளைத் தொடங்குவதையும் தாமதப்படுத்துகிறது. நிதி நெருக்கடி காரணமாக மாநகராட்சி பல திட்டங்களை முன்னெடுக்க முடியாத நிலையில் உள்ளது.சேகர் பாபு, அரசு போதிய நிதி ஒதுக்கி முன்னெச்சரிக்கை நடவடிக்கைகளை மேற்கொள்ள வேண்டும் எனக் கோரினார். கால்வாய்த் தூர்வாருதல், குறைவான பகுதிகளில் பம்ப் அமைத்தல், நிவாரண மையங்கள் தயார் செய்தல் போன்ற பணிகளை உடனடியாகச் செய்ய வேண்டும். சென்னை மக்களின் உயிர் மற்றும் சொத்துக்களைக் காப்பாற்றுவதே முதன்மைக் கடமை என அவர் வலியுறுத்தினார்.

இதையும் படிங்க: பட்ஜெட் கூட்டத்தொடரில் இன்று பரபரப்பு... 3 முக்கிய துறைகளுக்கு அமைச்சர்கள் பதில்!