சென்னை: தமிழகத்தின் பல்வேறு பகுதிகளில் தொடர் மின்வெட்டு மற்றும் மின்தடை தொடர்பாக புகார்கள் எழுந்து வரும் நிலையில், சென்னை அண்ணா சாலையில் உள்ள மின்வாரிய தலைமையகமான மின்னகத்திற்கு முதல்வர் விஜய் திடீரென சென்று ஆய்வு மேற்கொண்டார்.

தமிழகத்தில் கடந்த சில நாட்களாக சில பகுதிகளில் அறிவிக்கப்படாத மின்தடை, மின்விநியோகத்தில் இடையூறு மற்றும் மின்னழுத்த ஏற்ற இறக்கம் தொடர்பாக பொதுமக்களிடம் இருந்து புகார்கள் வந்துள்ளன. இதனிடையே, மின்வாரியத்தின் செயல்பாடுகள் குறித்து எதிர்க்கட்சிகளும் கேள்வி எழுப்பி வருகின்றன. அதே நேரத்தில், பராமரிப்பு பணிகளுக்காக பல மாவட்டங்களில் திட்டமிட்ட மின்தடைகளும் தொடர்ந்து அறிவிக்கப்பட்டு வருகின்றன.

இந்த சூழலில், மின்னகத்திற்கு சென்ற முதல்வர் விஜய், மாநிலத்தின் தற்போதைய மின் தேவை, மின் உற்பத்தி மற்றும் விநியோக நிலவரம் குறித்து அமைச்சர் நிர்மல் குமார் மற்றும் மின்வாரிய அதிகாரிகளிடம் கேட்டறிந்தார். மேலும், மின்தடை தொடர்பாக பொதுமக்களிடம் இருந்து பெறப்படும் புகார்கள் குறித்தும் அதிகாரிகளிடம் அவர் தகவல்களை கேட்டதாக அமைச்சர் தெரிவித்தார்.

இதையும் படிங்க: தவெக வேட்பாளர்களுக்கு எதிர்ப்பு? நான் பிரசாரத்துக்கு வந்தால் எல்லாம் சரியாகிடும்! முதல்வர் விஜய் நம்பிக்கை!

ஆய்வுக்குப் பிறகு செய்தியாளர்களிடம் பேசிய அமைச்சர் நிர்மல் குமார், தமிழகத்தில் 600 புதிய துணை மின் நிலையங்கள் தேவைப்படுவதாகவும், அவற்றை உருவாக்குவது தொடர்பாக முதல்வருடன் ஆலோசனை நடத்தப்பட்டதாகவும் கூறினார். மேலும், மாநிலம் முழுவதும் சுமார் 6,000 மின்மாற்றிகளை சீரமைக்க நடவடிக்கை எடுக்கப்பட்டு வருவதாகவும் அவர் தெரிவித்தார்.

பராமரிப்பு பணிகள் மேற்கொள்ளப்படாமல் இருந்த பகுதிகளில் தற்போது மின்மாற்றிகள் அதிக சுமையை தாங்க முடியாமல் பழுதடைவதாக அமைச்சர் கூறினார். தேர்தல் காரணமாக சில பராமரிப்பு பணிகள் தாமதமானதாகவும், அதன் விளைவாக தற்போது பழுதுகள் ஏற்படுவதாகவும் அவர் விளக்கம் அளித்தார்.

மேலும், சுமார் 20 ஆண்டுகள் பழமையான துணை மின் நிலையங்களை மேம்படுத்துவதற்கான திட்டம் முதல்வரிடம் அளிக்கப்பட்டுள்ளதாகவும் அமைச்சர் தெரிவித்தார். மின்தடை ஏற்படும் நேரங்களில் பொதுமக்கள் கோபப்படாமல், சீரமைப்பு பணிகளை மேற்கொள்ள மின்வாரியத்திற்கு அவகாசம் வழங்க வேண்டும் என்றும் அவர் கேட்டுக்கொண்டார்.

இதற்கிடையில், மின்வாரியம் பராமரிப்பு பணிகளை விரைவுபடுத்தி செப்டம்பர் 30-க்குள் நிலுவையில் உள்ள பணிகளை முடிக்க அதிகாரிகளுக்கு உத்தரவிட்டுள்ளது.

தொடர் மின்வெட்டு புகார்களுக்கு மத்தியில் முதல்வர் விஜய் மேற்கொண்ட இந்த திடீர் ஆய்வு, மின்வாரியத்தின் அடுத்தகட்ட நடவடிக்கைகள் மீது கவனத்தை திருப்பியுள்ளது.

இதையும் படிங்க: ஜனநாயகன் படம் லீக் வழக்கில் திடீர் திருப்பம்! கைதான படத்தொகுப்பாளருக்கு நிம்மதி கொடுத்த நீதிமன்றம்!