நாடாளுமன்ற மக்களவையில் மத்திய உள்துறை அமைச்சர் அமித் ஷா குறித்துப் பேசிய விவகாரத்தில் தான் எக்காரணம் கொண்டும் மன்னிப்பு கேட்கப் போவதில்லை என மக்களவை எதிர்க்கட்சித் தலைவர் ராகுல் காந்தி திட்டவட்டமாகத் தெரிவித்துள்ளார்.

நாடாளுமன்றத்தின் மழைக்காலக் கூட்டத்தொடர் விறுவிறுப்பாக நடைபெற்று வரும் சூழலில், மக்களவையில் விவாதத்தின் போது மத்திய அரசு மற்றும் உள்துறை அமைச்சர் அமித் ஷா மீது எதிர்க்கட்சித் தலைவர் ராகுல் காந்தி பல்வேறு கடுமையான குற்றச்சாட்டுகளை முன்வைத்தார்.

 ராகுல் காந்தியின் இந்தப் பேச்சு ஆளும் பாஜக உறுப்பினர்களிடையே கடும் கொந்தளிப்பை ஏற்படுத்தியது. ராகுல் காந்தி அவையில் தவறானத் தகவல்களைப் பரப்புவதாகவும், தனது பேச்சுக்கு அவர் உடனடியாக மன்னிப்பு கேட்க வேண்டும் என்றும் பாஜக அமைச்சர்கள் மற்றும் எம்.பி.க்கள் அவையில் அமளியில் ஈடுபட்டனர்.

இதையும் படிங்க: தமிழகத்தின் அரசியல் முக்கியத்துவம் குறையும்! தொகுதி மறுசீரமைப்பு குறித்து கார்த்தி சிதம்பரம் எம்.பி. எச்சரிக்கை!

பாஜக-வினரின் இந்த கோரிக்கையை முற்றிலும் நிராகரித்து நாடாளுமன்ற வளாகத்தில் செய்தியாளர்களிடம் பேசிய ராகுல் காந்தி, "அவையில் நான் முன்வைத்த குற்றச்சாட்டுகளுக்காகவோ அல்லது பேசிய கருத்துகளுக்காகவோ எக்காரணம் கொண்டும் மன்னிப்பு கேட்க மாட்டேன் என்பதில் உறுதியாக இருக்கிறேன். எதிர்க்கட்சித் தலைவரான என்னை நாடாளுமன்றத்தில் சுதந்திரமாகப் பேச அனுமதிப்பதில்லை" எனத் தெரிவித்தார்.

மேலும் தொடர்ந்த அவர், "மத்திய உள்துறை அமைச்சர் அமித் ஷாவின் நிர்வாகத் தவறுகள் குறித்தும், அரசு மீதான குற்றச்சாட்டுகள் குறித்தும் நான் பேசத் தொடங்கிய உடனேயே, திட்டமிட்டு எனது மைக் அணைக்கப்பட்டது. மக்களால் தேர்ந்தெடுக்கப்பட்ட எதிர்க்கட்சித் தலைவரின் குரலையே அவையில் ஒடுக்க நினைப்பது ஜனநாயகத்திற்குப் பேரபாயமாகும். 

என்னதான் நெருக்கடி கொடுத்தாலும் மக்கள் சார்ந்த பிரச்சினைகளையும் அரசின் தவறுகளையும் அவையில் தொடர்ந்து ஆணித்தரமாக எழுப்புவேன்" எனக் காரசாரமாகக் குற்றம்சாட்டினார். ராகுல் காந்தியின் இந்த அதிரடி பேச்சு நாடாளுமன்றத்திலும் தேசிய அரசியலிலும் பெரும் பரபரப்பை மூட்டியுள்ளது.

இதையும் படிங்க: ஆகஸ்ட் 4-இல் வைகோவின் புத்தக வெளியீடு! ராகுல் காந்தி வெளியிட அகிலேஷ் பெற்றுக்கொள்கிறார்!