ஜப்பானின் அய்ச்சி–நகோயாவில் நடைபெற்று வரும் 20-வது ஆசிய விளையாட்டுப் போட்டியில் இந்தியாவுக்கு பதக்கங்கள் குவிந்து வருகின்றன. மகளிர் கபடியில் இந்திய அணி தங்கப் பதக்கம் வென்று அசத்தியுள்ள நிலையில், ஆடவர் மாரத்தானில் சாவன் பர்வால் வெள்ளிப் பதக்கமும், கலப்பு இரட்டையர் ஸ்குவாஷில் தமிழகத்தைச் சேர்ந்த ஜோஷ்னா சின்னப்பா–வேலவன் செந்தில்குமார் ஜோடி வெண்கலப் பதக்கமும் வென்று இந்தியாவின் பதக்க எண்ணிக்கையை உயர்த்தியுள்ளனர்.

மகளிர் கபடி இறுதிப்போட்டியில் இந்திய அணி ஈரானை எதிர்கொண்டது. பரபரப்பாக நடைபெற்ற இந்த ஆட்டத்தில் இந்திய வீராங்கனைகள் தொடக்கம் முதலே சிறப்பாக செயல்பட்டனர். இரு அணிகளும் விடாமல் போராடிய நிலையில், இறுதியில் இந்தியா 34–31 என்ற புள்ளிகள் கணக்கில் வெற்றி பெற்று தங்கப் பதக்கத்தை கைப்பற்றியது. இதன்மூலம் ஆசிய விளையாட்டில் மகளிர் கபடியில் இந்தியாவின் ஆதிக்கம் மீண்டும் தொடர்ந்துள்ளது.

முன்னதாக, ஆடவர் மாரத்தான் போட்டியில் இந்தியாவின் சாவன் பர்வால் வெள்ளிப் பதக்கம் வென்று வரலாறு படைத்தார். 2 மணி 11 நிமிடங்கள் 37 வினாடிகளில் இலக்கை கடந்த அவர் இரண்டாவது இடத்தை பிடித்தார். இதன்மூலம் ஆசிய விளையாட்டு மாரத்தானில் இந்தியா 44 ஆண்டுகளுக்குப் பிறகு பதக்கம் வென்றுள்ளது. 1982-ம் ஆண்டு டெல்லியில் நடைபெற்ற ஆசிய விளையாட்டுக்குப் பிறகு இந்தப் போட்டியில் இந்தியாவுக்கு கிடைத்த முதல் பதக்கம் இதுவாகும்.

இதையும் படிங்க: ஆசிய விளையாட்டு: ஜப்பானை வீழ்த்தி அரையிறுதிக்கு முன்னேறிய இந்தியா! மேலும் 2 பதக்கங்கள் உறுதி!

இதனிடையே, கலப்பு இரட்டையர் ஸ்குவாஷ் பிரிவிலும் இந்தியாவுக்கு பதக்கம் கிடைத்துள்ளது. தமிழகத்தைச் சேர்ந்த ஜோஷ்னா சின்னப்பா மற்றும் வேலவன் செந்தில்குமார் ஜோடி அரையிறுதியில் ஹாங்காங் ஜோடியிடம் கடுமையான போட்டிக்குப் பிறகு 1–2 என்ற கணக்கில் தோல்வியடைந்தது. இதனால் இந்திய ஜோடிக்கு வெண்கலப் பதக்கம் கிடைத்தது.

இதையடுத்து ஆசிய விளையாட்டில் இந்தியாவின் பதக்க எண்ணிக்கை 27 ஆக உயர்ந்துள்ளது. இதில் 3 தங்கம், 11 வெள்ளி, 13 வெண்கலம் என பதக்கங்கள் இடம்பெற்றுள்ளன.

தொடர்ந்து பல்வேறு விளையாட்டுகளில் இந்திய வீரர், வீராங்கனைகள் பதக்க வேட்டையில் ஈடுபட்டு வரும் நிலையில், போட்டியின் அடுத்தடுத்த நாட்களிலும் இந்தியாவுக்கு மேலும் பதக்கங்கள் கிடைக்கும் என்ற எதிர்பார்ப்பு ரசிகர்கள் மத்தியில் அதிகரித்துள்ளது.

இதையும் படிங்க: குறி தப்பாது! ஆசிய விளையாட்டு போட்டியில் இந்தியாவுக்கு 2வது தங்கம்; கமல்ஜீத் - சுருச்சி ஜோடி அபாரம்!