உத்தரப் பிரதேசத்தின் ஜேவார் (Jewar) பகுதியில் அமைந்துள்ள நொய்டா சர்வதேச விமான நிலையத்தின் முதல் கட்டத்தை பிரதமர் நரேந்திர மோடி இன்று (மார்ச் 28) பிரம்மாண்டமாக திறந்து வைத்தார். இந்த நிகழ்ச்சியில் சிவில் விமானப் போக்குவரத்து அமைச்சர் கிஞ்சரபு ராம் மோகன் நாயுடு, உத்தரப் பிரதேச ஆளுநர் ஆனந்திபென் படேல் மற்றும் முதலமைச்சர் யோகி ஆதித்யநாத் உள்ளிட்டோர் கலந்துகொண்டனர்.
ரூ.11,200 கோடி முதலீட்டில் பொது-தனியார் கூட்டாண்மை (PPP) முறையில் உருவாக்கப்பட்ட இந்த விமான நிலையம், டெல்லி தேசிய தலைநகர் பிராந்தியத்தின் (NCR) இரண்டாவது பெரிய சர்வதேச விமான நிலையமாக உருவெடுத்துள்ளது. இந்திரா காந்தி சர்வதேச விமான நிலையத்துக்கு (IGI) துணையாக செயல்படும் இந்த புதிய விமான நிலையம், டெல்லி-என்சிஆர் பகுதியின் விமானப் போக்குவரத்து நெரிசலை கணிசமாகக் குறைக்கும் என்று எதிர்பார்க்கப்படுகிறது.
பிரதமர் அலுவலகம் வெளியிட்ட அறிக்கையில், “இந்த விமான நிலையம் நாட்டின் விமான உள்கட்டமைப்பை வலுப்படுத்தும் முக்கிய படியாகும். பிராந்திய மற்றும் சர்வதேச இணைப்புகளை மேம்படுத்தும்” என்று தெரிவிக்கப்பட்டுள்ளது. முதல் கட்டத்தில் ஆண்டுக்கு 1.2 கோடி பயணிகளை கையாளும் திறன் கொண்ட இந்த விமான நிலையம், முழுமையாக முடிவடைந்த பிறகு ஆண்டுக்கு 7 கோடி பயணிகளை கையாளும் வல்லமை பெறும்.
இதையும் படிங்க: ரூ.11,200 கோடி மதிப்பில் சர்வதேச ஏர்போர்ட்!! உ.பி நொய்டாவில் இன்று திறந்து வைக்கிறார் பிரதமர் மோடி!
சாலை, ரயில், மெட்ரோ மற்றும் பிராந்திய போக்குவரத்து அமைப்புகளுடன் தடையற்ற இணைப்பு கொண்ட பலமுனை போக்குவரத்து மையமாக இந்த விமான நிலையம் திட்டமிடப்பட்டுள்ளது. பயணிகள் மற்றும் சரக்கு போக்குவரத்துக்கு இது பெரும் வசதியை ஏற்படுத்தும். டெல்லி-என்சிஆர் பகுதியை உலகின் முன்னணி விமானப் போக்குவரத்து மையங்களில் ஒன்றாக மாற்றும் என்று எதிர்பார்க்கப்படுகிறது.
இந்த திட்டம் உத்தரப் பிரதேசத்தின் மேற்குப் பகுதியின் பொருளாதார வளர்ச்சிக்கு பெரும் உந்து சக்தியாக அமையும். வர்த்தகம், சுற்றுலா, தொழில் முதலீடு ஆகியவை வேகமாக அதிகரிக்கும் என முதலமைச்சர் யோகி ஆதித்யநாத் தெரிவித்தார்.
பிரதமர் மோடி இந்த நிகழ்ச்சியில் உரையாற்றியபோது, இந்த விமான நிலையம் இந்தியாவின் வளர்ச்சி பாதையில் ஒரு முக்கிய மைல்கல் என்று வலியுறுத்தினார். நவீன வசதிகள், சுற்றுச்சூழல் நட்பு தொழில்நுட்பங்கள் என பல சிறப்புகளுடன் கட்டப்பட்டுள்ள இந்த விமான நிலையம், பயணிகளுக்கு உலகத் தரம் வாய்ந்த அனுபவத்தை வழங்கும் என்று எதிர்பார்க்கப்படுகிறது.
இதையும் படிங்க: ரூ.11,200 கோடி மதிப்பில் சர்வதேச ஏர்போர்ட்!! உ.பி நொய்டாவில் இன்று திறந்து வைக்கிறார் பிரதமர் மோடி!