செயின்ட் லூயிஸ்: அமெரிக்காவில் நடைபெற்று வரும் கிராண்ட் செஸ் டூர் இறுதிப்போட்டியில் இந்தியாவின் நட்சத்திர வீரர் ஆர்.பிரக்ஞானந்தாவுக்கு மீண்டும் பின்னடைவு ஏற்பட்டுள்ளது. அமெரிக்க கிராண்ட்மாஸ்டர் ஃபேபியானோ கருவானாவுக்கு எதிரான 2-வது கிளாசிக்கல் ஆட்டத்தை பிரக்ஞானந்தா டிரா செய்தார். இதனால் கருவானா 9-3 என்ற புள்ளிக் கணக்கில் முன்னிலை பெற்றுள்ளார்.
கிராண்ட் செஸ் டூர் இறுதிப்போட்டியின் பட்டத்துக்காக பிரக்ஞானந்தாவும் கருவானாவும் மோதுகின்றனர். முதல் கிளாசிக்கல் ஆட்டத்தில் கருவானா வெற்றி பெற்று 6 புள்ளிகளைப் பெற்றிருந்தார். இதனால் இரண்டாவது ஆட்டம் பிரக்ஞானந்தாவுக்கு மிகவும் முக்கியமானதாக இருந்தது.
இரண்டாவது ஆட்டத்தில் வெள்ளைக் காய்களுடன் விளையாடிய பிரக்ஞானந்தா ஆரம்பத்தில் சிறப்பான வாய்ப்புகளை உருவாக்கினார். குறிப்பாக ஆட்டத்தின் பிற்பகுதியில் வெற்றிக்கான வாய்ப்புகள் அவருக்கு இருந்ததாக தெரிவிக்கப்பட்டுள்ளது. ஆனால், அந்த வாய்ப்புகளை முழுமையாக பயன்படுத்த முடியவில்லை. சுமார் 5½ மணி நேரம் நீடித்த ஆட்டம் 95 நகர்த்தல்களுக்குப் பிறகு டிராவில் முடிந்தது.
இதையும் படிங்க: அமெரிக்காவில் அசத்திய பிரக்ஞானந்தா! கடைசி சுற்றே தேவையில்லை! ஒரு ஆட்டம் மீதமிருக்கும்போதே சாம்பியன்!
டிரா முடிவில் இரு வீரர்களுக்கும் தலா 3 புள்ளிகள் வழங்கப்பட்டன. முதல் ஆட்டத்தில் பெற்ற 6 புள்ளிகளுடன் கருவானா மொத்தம் 9 புள்ளிகளுடன் முன்னிலையில் உள்ளார். பிரக்ஞானந்தா 3 புள்ளிகளுடன் பின்தங்கியுள்ளார்.
இதனால் கிளாசிக்கல் சுற்றுகள் முடிவடைந்துள்ளன. இனி பட்டத்தை தீர்மானிக்க ராபிட் மற்றும் பிளிட்ஸ் ஆட்டங்கள் நடைபெற உள்ளன. தற்போதைய 6 புள்ளிகள் இடைவெளி கருவானாவுக்கு சாதகமாக இருந்தாலும், போட்டி முழுமையாக முடிவுக்கு வரவில்லை.
இந்த தொடரின் புள்ளி முறையில் ராபிட் ஆட்டத்தில் வெற்றிக்கு 4 புள்ளிகளும், டிராவுக்கு 2 புள்ளிகளும் வழங்கப்படுகின்றன. பிளிட்ஸ் ஆட்டத்தில் வெற்றிக்கு 2 புள்ளிகளும், டிராவுக்கு 1 புள்ளியும் கிடைக்கும். எனவே, மீதமுள்ள ஆட்டங்களில் பிரக்ஞானந்தா தொடர்ச்சியாக வெற்றிகளைப் பதிவு செய்தால் புள்ளி வித்தியாசத்தை குறைத்து பட்டத்துக்கான போட்டிக்கு மீண்டும் திரும்ப முடியும்.
முதல் கிளாசிக்கல் ஆட்டத்தில் ஏற்பட்ட தோல்விக்குப் பிறகு இரண்டாவது ஆட்டத்தில் வெற்றி பெறும் வாய்ப்பை பிரக்ஞானந்தா உருவாக்கியிருந்தாலும், அதை வெற்றியாக மாற்ற முடியாதது அவருக்கு பின்னடைவாக அமைந்துள்ளது. மறுபுறம், கடினமான சூழலிலும் துல்லியமாக விளையாடி டிராவை தக்கவைத்த கருவானா, பட்டத்தை நோக்கி வலுவான நிலையில் உள்ளார்.
இந்நிலையில், மீதமுள்ள ராபிட் மற்றும் பிளிட்ஸ் ஆட்டங்களில் பிரக்ஞானந்தாவின் ஆட்டம் எப்படி அமையும் என்பதே ரசிகர்களின் எதிர்பார்ப்பாக உள்ளது. 6 புள்ளிகள் பின்தங்கியிருக்கும் நிலையில் இந்திய வீரர் அதிரடி கம்பேக் கொடுப்பாரா என்பதற்கு அடுத்த சுற்றுகள் பதில் சொல்லும்.
இதையும் படிங்க: அமெரிக்காவில் அசத்திய பிரக்ஞானந்தா! கடைசி சுற்றே தேவையில்லை! ஒரு ஆட்டம் மீதமிருக்கும்போதே சாம்பியன்!