உலக செஸ் அரங்கில் இந்தியாவின் இளம் நட்சத்திரமாக உருவெடுத்துள்ள தமிழக வீரர் பிரக்ஞானந்தா மீண்டும் ஒரு முறை தனது திறமையை நிரூபித்துள்ளார். நார்வே செஸ் தொடரின் எட்டாவது சுற்றில் உலகின் நம்பர் ஒன் வீரரான மேக்னஸ் கார்ல்சனை வீழ்த்தி, 19 ஆண்டுகளாக நீடித்து வந்த ஒரு முக்கிய சாதனையை சமன் செய்து புதிய கவனத்தை ஈர்த்துள்ளார்.
நார்வேயில் நடைபெற்று வரும் உயர்மட்ட செஸ் தொடரில் கருப்பு காய்களுடன் களமிறங்கிய பிரக்ஞானந்தா, தொடக்கம் முதல் நிதானமான மற்றும் துல்லியமான ஆட்டத்தை வெளிப்படுத்தினார். உலகின் தலைசிறந்த வீரர்களில் ஒருவராக கருதப்படும் கார்ல்சனுக்கு எதிராக எந்த அழுத்தத்தையும் வெளிக்காட்டாமல் விளையாடிய அவர், இறுதியில் வெற்றியைப் பதிவு செய்தார்.
இந்த தொடரில் கார்ல்சனை பிரக்ஞானந்தா வீழ்த்துவது இது முதல் முறை அல்ல. கடந்த மே 27ஆம் தேதி நடைபெற்ற மூன்றாவது சுற்றிலும் அவர் கார்ல்சனை தோற்கடித்திருந்தார். இதன் மூலம், ஒரே தொடரில் கார்ல்சனை இரண்டு முறை வென்ற வீரர் என்ற பெருமையை மீண்டும் பெற்றுள்ளார்.
இதையும் படிங்க: டென்னிஸ் ரசிகர்களுக்கு இன்ப அதிர்ச்சி: ஓய்வு முடிவைத் திரும்பப் பெற்று மீண்டும் விளையாட வரும் செரீனா வில்லியம்ஸ்!
இதற்கு முன்பு, 2007ஆம் ஆண்டு நடைபெற்ற லினாரெஸ் சர்வதேச செஸ் தொடரில் இந்திய செஸ் ஜாம்பவான் விஸ்வநாதன் ஆனந்த் மட்டுமே கார்ல்சனை ஒரே தொடரில் இரண்டு முறை வீழ்த்தியிருந்தார். தற்போது அந்த சாதனையை பிரக்ஞானந்தாவும் சமன் செய்துள்ளார்.
இந்த வெற்றி இந்திய செஸ் உலகிற்கு மிகப்பெரிய உற்சாகத்தை அளித்துள்ளது. குறிப்பாக, உலகின் முன்னணி வீரர்களுக்கு எதிராக தொடர்ந்து சிறப்பான ஆட்டத்தை வெளிப்படுத்தி வரும் பிரக்ஞானந்தா, எதிர்கால உலக சாம்பியன் பட்டத்திற்கான முக்கிய போட்டியாளராக பார்க்கப்படுகிறார்.
எட்டாவது சுற்று முடிவில் பிரக்ஞானந்தா 12 புள்ளிகளுடன் மூன்றாவது இடத்தில் உள்ளார். பிலிப்பைன்ஸைச் சேர்ந்த வெஸ்லி சோ 14 புள்ளிகளுடன் முதலிடத்தில் நீடித்து வருகிறார். கார்ல்சன் 9 புள்ளிகளுடன் ஐந்தாவது இடத்தில் உள்ளார்.
தொடரின் அடுத்த சுற்றில் பிரக்ஞானந்தா, நடப்பு உலக சாம்பியனான இந்திய வீரர் குகேஷை எதிர்கொள்ள உள்ளார். இறுதிச் சுற்றில் ஜெர்மனியின் வின்சென்ட் கெய்மருடன் மோதவுள்ளார். தொடர்ச்சியான வெற்றிகளால் உலக செஸ் ரசிகர்களின் கவனத்தை ஈர்த்துள்ள பிரக்ஞானந்தா, தற்போது பட்டம் வெல்லும் முக்கிய போட்டியாளர்களில் ஒருவராக உருவெடுத்துள்ளார்.