புதுச்சேரி, காரைக்கால் மற்றும் ஏனாம் பகுதிகளில் நிலவி வரும் கடும் வெயில் மற்றும் வெப்ப அலையின் (Heat Wave) தாக்கத்தைக் கருத்தில் கொண்டு, அனைத்துப் பள்ளிகளுக்கும் வரும் ஏப்ரல் 27-ஆம் தேதி முதல் கோடை விடுமுறை அறிவிக்கப்பட்டுள்ளது. இதற்கான அதிகாரப்பூர்வ சுற்றறிக்கையைப் புதுச்சேரி பள்ளிக்கல்வித் துறை இணை இயக்குநர் டாக்டர் வி.ஜி. சிவகாமி இன்று வெளியிட்டுள்ளார்.

ஏப்ரல் 27, 2026 (திங்கட்கிழமை) முதல் கோடைகால விடுமுறை தொடங்கும் விடுமுறையானது மே 31, 2026 (ஞாயிற்றுக்கிழமை) வரை நீடிக்கும் என்றும், கோடை விடுமுறை முடிந்து மீண்டும் அனைத்து வகுப்புகளும் ஜூன் 01, 2026 (திங்கட்கிழமை) அன்று வழக்கம் போல் திறக்கப்படும் என்றும் அந்த அறிவிப்பில் தெரிவிக்கப்பட்டுள்ளது. மாணவர்களின் நலன் கருதி இந்த விடுமுறை அறிவிக்கப்பட்டுள்ளதால், ஜூன் முதல் வாரத்தில் பள்ளிகள் புதிய கல்வி ஆண்டிற்காகச் செயல்படத் தொடங்கும்.

புதுச்சேரி, காரைக்கால் மற்றும் ஏனாம் பிராந்தியங்களில் உள்ள அனைத்து அரசுப் பள்ளிகள், அரசு உதவி பெறும் பள்ளிகள் மற்றும் தனியார் பள்ளிகளுக்கும் (CBSE உட்பட) இந்த விடுமுறை பொருந்தும். கோடை விடுமுறை காலத்தில் மாணவர்களுக்கு எந்தவிதமான சிறப்பு வகுப்புகளோ (Special Classes) அல்லது இதர வகுப்புகளோ நடத்தக்கூடாது எனத் திட்டவட்டமாக உத்தரவிடப்பட்டுள்ளது. வெப்ப அலையின் தீவிரத்திலிருந்து மாணவர்களைப் பாதுகாக்கவே இந்த நடவடிக்கை எடுக்கப்பட்டுள்ளதாகக் கல்வித் துறை தெரிவித்துள்ளது.

இதையும் படிங்க: தமிழகத்தில் வெப்பம் மேலும் அதிகரிக்கும்! உள் மாவட்டங்களில் 3°C வரை உயர வாய்ப்பு!

ஏப்ரல் 27 முதல் ஏப்ரல் 30 வரையிலான 4 விடுமுறை நாட்களை ஈடு செய்யும் வகையில், ஜூன் மாதம் பள்ளிகள் திறக்கப்பட்ட பின்னர் சனிக்கிழமைகளில் வகுப்புகள் நடத்தப்பட்டு ஈடு செய்யப்படும் எனச் சுற்றறிக்கையில் தெரிவிக்கப்பட்டுள்ளது.

தற்போது நிலவும் வெப்ப அலையினால் பொதுமக்களும், குறிப்பாக மாணவர்களும் பாதிக்கப்படாமல் இருக்க இந்த முன்கூட்டிய விடுமுறை அறிவிப்பு பெரும் உதவியாக இருக்கும் எனப் பெற்றோர்கள் வரவேற்பு தெரிவித்துள்ளனர்.

இதையும் படிங்க: மாணவர்களுக்கு மகிழ்ச்சி செய்தி! ஏப்ரல் 17 முதல் கோடை விடுமுறை ஆரம்பம்!