இந்திய கிரிக்கெட் அணியின் மூத்த சுழற்பந்து வீச்சாளர் அமித் மிஸ்ரா, அனைத்து விதமான கிரிக்கெட் போட்டிகளில் இருந்தும் ஓய்வு பெறுவதாக அறிவித்துள்ளார். 42 வயதான இவர், 25 ஆண்டுகள் நீடித்த தனது கிரிக்கெட் வாழ்க்கையை முடித்து, பயிற்சியாளர் மற்றும் வர்ணனையாளர் பணிகளில் கவனம் செலுத்த உள்ளார். 

டெல்லியைச் சேர்ந்த அமித் மிஸ்ரா, 2003இல் இந்திய அணிக்காக அறிமுகமானார். 2008இல் ஆஸ்திரேலியாவுக்கு எதிரான டெஸ்ட் போட்டியில் முதல் ஆட்டத்திலேயே 5 விக்கெட்டுகள் வீழ்த்தி, இந்தியாவின் ஆறாவது வீரராக சாதனை படைத்தார். 22 டெஸ்ட் போட்டிகளில் 76 விக்கெட்டுகளும், 36 ஒருநாள் போட்டிகளில் 64 விக்கெட்டுகளும், 10 டி20 போட்டிகளில் 16 விக்கெட்டுகளும் எடுத்துள்ளார். 

இதையும் படிங்க: கிரிக்கெட்டிற்கு Tata BYEBYE சொன்ன புஜாரா.. நெகிழ்ச்சியுடன் பிரதமர் மோடி வாழ்த்து..!!

2011 ஓவல் டெஸ்டில் நைட் வாட்ச்மேனாக 84 ரன்கள் எடுத்து, இந்தியாவின் அதிகபட்ச ஸ்கோர் அடித்த நைட் வாட்ச்மேன் என்ற பெருமையைப் பெற்றார். 2013 சாம்பியன்ஸ் டிராபி மற்றும் 2014 டி20 உலகக் கோப்பையில் இந்தியாவின் வெற்றிக்கு முக்கிய பங்காற்றினார். ஐபிஎல் தொடரில் லக்னோ சூப்பர் ஜெயிண்ட்ஸ் அணிக்காக 2024 வரை விளையாடிய மிஸ்ரா, மூன்று ஹாட்ரிக் சாதனைகளைப் பதிவு செய்து, இந்தியாவின் முன்னணி சுழற்பந்து வீச்சாளராக திகழ்ந்தார். 2024 ஐபிஎல் அவரது கடைசி போட்டியாக அமைந்தது. 

சமீப காலங்களில் காயங்கள் அவரது ஆட்டத்தைப் பாதித்த போதிலும், அவரது மாறுபட்ட பந்துவீச்சு மற்றும் கட்டுப்பாடு ரசிகர்களால் பாராட்டப்பட்டது. ஓய்வு குறித்து உருக்கமாகப் பேசிய மிஸ்ரா, “கிரிக்கெட் எனக்கு எண்ணற்ற நினைவுகளைத் தந்துள்ளது. இனி இளம் வீரர்களுக்கு வழிகாட்டுவேன்,” என்றார். மேலும் பிசிசிஐ மற்றும் ஹரியானா கிரிக்கெட் வாரியத்துக்கு நன்றி தெரிவித்த மிஸ்ரா, தனது பயணத்தை உணர்ச்சிபூர்வமாக பகிர்ந்தார். அவரது பங்களிப்பு இந்திய கிரிக்கெட்டில் என்றும் நினைவு கூரப்படும்.

இதையும் படிங்க: ஐபிஎல் போட்டிகளில் இருந்து ஓய்வு.. ரசிகர்களுக்கு ஷாக் கொடுத்த அஸ்வின்..!!