தி.மு.க. கூட்டணியில் பா.ம.க. சேர்வது தொடர்பான விவகாரம், காங்கிரஸ் – விடுதலை சிறுத்தைகள் இடையே பெரும் மோதலாக மாறியுள்ளது. இது தி.மு.க. தலைமைக்கு பெரும் தலைவலியாக அமைந்துள்ளது.

பா.ம.க. நிறுவனர் டாக்டர் ராமதாஸ் தி.மு.க. கூட்டணியில் இணைய முயற்சி செய்து வருகிறார். ஆனால் விடுதலை சிறுத்தைகள் கட்சி தலைவர் திருமாவளவன் “பா.ம.க. வந்தால் வி.சி.க. இருக்காது” என திட்டவட்டமாக அறிவித்தார். இதனால் தி.மு.க. தயக்கம் காட்டி வருகிறது.

இந்நிலையில், தமிழக காங்கிரஸ் கமிட்டி தலைவர் கே. செல்வப்பெருந்தகை நேற்று முன்தினம் செய்தியாளர்களிடம் பேசியபோது, “ராமதாஸ் வன்னியர் சங்க கொடியை ஏற்றியுள்ளார். திருமாவளவன் விடுதலை சிறுத்தைகள் கொடியை ஏற்றியுள்ளார். இருவரும் இணக்கமாக இருந்தவர்கள் தான். தேவைப்பட்டால் ஒருவரையொருவர் சந்தித்து பேசி சரிசெய்து விடுவர்” என்றார்.

இதையும் படிங்க: ஆட்சியில் பங்கு வேணாம்! அதிக தொகுதி கொடுங்க!! திமுக - காங்கிரஸ் தொகுதி பங்கீட்டில் நீடிக்கும் இழுபறி!

இந்த கருத்துக்கு விடுதலை சிறுத்தைகள் – எம்.எல்.ஏ. பாலாஜி கடும் கண்டனம் தெரிவித்தார். “ஜாதியவாத, மதவாத சக்திகள் இருக்கும் இடத்தில் வி.சி.க. இருக்காது என்ற நிலைப்பாட்டை மாற்றிக் கொள்ளும் என்ற தோற்றத்தை திணிப்பது நாகரிகமற்ற அரசியல்” என அவர் விமர்சித்தார்.

இதற்கு உடனடியாக காங்கிரஸ் சமூக ஊடகப் பிரிவு தலைவர் நபில் அகமது அறிக்கை வெளியிட்டார். “உண்மையை முழுமையாக அறியாமல் வி.சி.க. எம்.எல்.ஏ. பாலாஜி விமர்சிப்பது கடும் கண்டனத்திற்குரியது. இது தி.மு.க. கூட்டணியின் ஒற்றுமைக்கு பாதிப்பை ஏற்படுத்தும் செயல்” என்று தெரிவித்தார்.

ராமதாஸை கூட்டணியில் சேர்க்கும் முயற்சியால் ஏற்பட்ட இந்த மோதல், தி.மு.க. தலைமைக்கு பெரும் அதிர்ச்சியை ஏற்படுத்தியுள்ளது. கூட்டணி கட்சிகளுக்கிடையேயான இந்த பகைமை 2026 சட்டமன்றத் தேர்தல் தயாரிப்புகளில் பெரும் சவாலாக மாறியுள்ளது.

திருமாவளவன் தனது நிலைப்பாட்டில் உறுதியாக இருக்கிறார். செல்வப்பெருந்தகையின் கருத்து காங்கிரஸ் தரப்பில் இருந்து வந்ததால், இது தி.மு.க. – காங்கிரஸ் – வி.சி.க. இடையேயான உறவில் புதிய பிளவை ஏற்படுத்தியுள்ளது. தி.மு.க. தலைமை இப்போது இரு தரப்பையும் சமநிலைப்படுத்தி கூட்டணியை தக்க வைக்க முயலும் நிலையில் உள்ளது.

இந்த சர்ச்சை தமிழக அரசியலில் பெரும் பரபரப்பை ஏற்படுத்தியுள்ளது. கூட்டணி உறுதியாகுமா? அல்லது புதிய மாற்றங்கள் வருமா? என்பது அடுத்த சில வாரங்களில் தெரியவரும்.

இதையும் படிங்க: திமுகவா? தவெகவா? யாரோடு கூட்டணி வைப்பது? டெல்லியில் காங்கிரஸ் தலைமை தீவிர ஆலோசனை!!