ஐபிஎல் 2026 கிரிக்கெட் தொடரின் 7-வது லீக் ஆட்டத்தில், சென்னை சூப்பர் கிங்ஸ் (CSK) அணியைத் தனது சொந்த மண்ணிலேயே வீழ்த்தி பஞ்சாப் கிங்ஸ் (PBKS) அதிரடி வெற்றி பெற்றுள்ளது. நேற்று (வெள்ளிக்கிழமை) இரவு சேப்பாக்கம் மைதானத்தில் நடைபெற்ற இந்தப் போட்டியில், பஞ்சாப் கேப்டன் ஷ்ரேயஸ் ஐயரின் நேர்த்தியான அரைசதம் அந்த அணியின் வெற்றிக்கு வித்திட்டது.

முதலில் பேட்டிங் செய்த சென்னை அணி, நிர்ணயிக்கப்பட்ட 20 ஓவர்களில் 5 விக்கெட் இழப்பிற்கு 209 ரன்கள் குவித்தது. இளம் வீரர் ஆயுஷ் மத்ரே வெறும் 43 பந்துகளில் 73 ரன்கள் (6 பவுண்டரி, 5 சிக்ஸர்) விளாசி சிஎஸ்கே-விற்குப் பலமான அடித்தளம் அமைத்துக் கொடுத்தார். ஷிவம் துபே (45*), சர்பராஸ் கான் (12 பந்துகளில் 32) மற்றும் கேப்டன் ருதுராஜ் கெய்க்வாட் (28) ஆகியோர் கணிசமான ரன்களைச் சேர்த்தனர். பஞ்சாப் தரப்பில் வைஷாக் விஜய்குமார் 2 விக்கெட்டுகளை வீழ்த்தினார்.

210 ரன்கள் என்ற இமாலய இலக்கை நோக்கி ஆடிய பஞ்சாப் கிங்ஸ், 18.4 ஓவர்களிலேயே 5 விக்கெட் இழப்பிற்கு 210 ரன்கள் எடுத்து வெற்றி பெற்றது. கேப்டன் ஷ்ரேயஸ் ஐயர் 29 பந்துகளில் 50 ரன்கள் (4 பவுண்டரி, 3 சிக்ஸர்) எடுத்து அணியை வெற்றிப் பாதைக்கு அழைத்துச் சென்றார். பிரியான்ஷ் ஆர்யா (11 பந்துகளில் 39) மற்றும் பிரப்சிம்ரன் சிங் (43) ஆகியோர் அதிரடியான தொடக்கத்தை அளித்தனர். பிரியான்ஷ் ஆர்யா தனது அதிரடிக்காக ஆட்ட நாயகன் விருதை வென்றார். சிஎஸ்கே தரப்பில் அன்ஷுல் கம்போஜ் மற்றும் மேட் ஹென்றி தலா 2 விக்கெட்டுகளை எடுத்த போதிலும், ரன்களைக் கட்டுப்படுத்த முடியவில்லை.

இதையும் படிங்க: இன்று கோலாகலமாக தொடங்குகிறது IPL திருவிழா..!! 10 அணிகளில் உள்ள வீரர்கள் யார், யார்? முழு லிஸ்ட் இதோ..!!

ஏற்கனவே தனது முதல் போட்டியில் குஜராத் டைட்டன்ஸ் அணியை வீழ்த்தியிருந்த பஞ்சாப் கிங்ஸ், தற்போது பலமான சிஎஸ்கே அணியையும் வீழ்த்திப் புள்ளிப்பட்டியலில் முன்னிலை பெற்றுள்ளது. குறிப்பாக, கடந்த போட்டியில் அறிமுக நாயகனாக ஜொலித்த கூப்பர் கானோலி, இந்தப் போட்டியிலும் தனது பங்களிப்பைச் சிறப்பாக வழங்கினார்.

ஐபிஎல் வரலாற்றில் சேப்பாக்கம் மைதானம் சிஎஸ்கே-வின் கோட்டையாகக் கருதப்படும் நிலையில், பஞ்சாப் அணியின் இந்த வெற்றி சென்னை ரசிகர்களுக்குப் பெரும் ஏமாற்றத்தைத் தந்துள்ளளது. தோனி இல்லாதது மற்றும் ஸ்பின்னர்களின் விக்கெட் வீழ்த்த முடியாத நிலை சிஎஸ்கே-விற்குப் பின்னடைவாக அமைந்தது.

இதையும் படிங்க: IPL 2026: 2ம் கட்ட அட்டவணை வெளியீடு..!! கிரிக்கெட் ரசிகர்கள் உற்சாகம்..!!