2025 ஐசிசி மகளிர் உலகக் கோப்பை கிரிக்கெட் தொடர் செப்டம்பர் 30ம் தேதி முதல் நவம்பர் 2ம் தேதி வரை இந்தியா மற்றும் இலங்கையில் நடைபெற உள்ளது. இது 13வது பதிப்பாகும், இந்தியா நான்காவது முறையாகவும், இலங்கை முதல் முறையாகவும் இணைந்து இந்தத் தொடரை நடத்துகின்றன. எட்டு அணிகள் பங்கேற்கும் இந்தத் தொடரில் இந்தியா, ஆஸ்திரேலியா, இங்கிலாந்து, தென்னாப்பிரிக்கா, நியூசிலாந்து, இலங்கை, பாகிஸ்தான் மற்றும் வங்கதேசம் ஆகியவை பங்கேற்கின்றன. 

ஆஸ்திரேலியா, 2022இல் தனது ஏழாவது பட்டத்தை வென்று, தற்போது நடப்பு சாம்பியனாக உள்ளது. தொடர் குவஹாத்தி, இந்தூர், விசாகப்பட்டினம், நவி மும்பை மற்றும் கொழும்பு ஆகிய இடங்களில் நடைபெறும். முதலில் பெங்களூரு நகரமும் இடம்பெற்றிருந்தது, ஆனால் சின்னசாமி மைதானத்தில் ஏற்பட்ட கூட்ட நெரிசல் சம்பவத்தால், நவி மும்பை மாற்று இடமாக அறிவிக்கப்பட்டது. 

இதையும் படிங்க: ICC ஜூலை மாத சிறந்த வீரர் விருது.. பரிந்துரை பட்டியலில் இந்திய கேப்டன் சுப்மன் கில்..!

செப்டம்பர் 30இல் இந்தியா-இலங்கை இடையே குவஹாத்தியில் தொடக்க ஆட்டம் நடைபெறும், ஆஸ்திரேலியா-நியூசிலாந்து ஆட்டம் இந்தூரில் அக்டோபர் 1இல் நடைபெறும். இந்தியா-பாகிஸ்தான் இடையேயான முக்கிய ஆட்டம் அக்டோபர் 5இல் நடைபெற உள்ளது. இந்தத் தொடரில் பரிசுத் தொகை நான்கு மடங்கு உயர்த்தப்பட்டுள்ளது, இது மகளிர் கிரிக்கெட்டுக்கு மிகப்பெரிய ஊக்கமாகும். 

அரையிறுதிப் போட்டிகள் அக்டோபர் 29 மற்றும் 30இல் நடைபெறும், இறுதிப் போட்டி நவம்பர் 2இல் நவி மும்பை அல்லது கொழும்பில் நடைபெறும். பாகிஸ்தான் அணி இறுதிப் போட்டிக்கு முன்னேறினால், கொழும்பு இடமாக இருக்கும். இந்தத் தொடர் மகளிர் கிரிக்கெட்டின் வளர்ச்சிக்கு புதிய உத்வேகத்தை அளிக்கும் என்று எதிர்பார்க்கப்படுகிறது.

இந்நிலையில் சர்வதேச கிரிக்கெட் கவுன்சில் (ஐசிசி) 2025 மகளிர் ஒருநாள் உலகக் கோப்பை கிரிக்கெட் தொடருக்கான பரிசுத்தொகையை இன்று அறிவித்தது. இந்தியா மற்றும் இலங்கையில் நடைபெறவுள்ள இந்த எட்டு அணிகள் கொண்ட தொடருக்கு மொத்தம் 13.88 மில்லியன் அமெரிக்க டாலர் (தோராயமாக 122.5 கோடி ரூபாய்) பரிசுத்தொகையாக ஒதுக்கப்பட்டுள்ளது. இது 2022 ஆம் ஆண்டு நியூசிலாந்தில் நடந்த முந்தைய தொடரின் 3.5 மில்லியன் டாலருடன் ஒப்பிடுகையில் 297 சதவீத உயர்வைக் குறிக்கிறது. 

இந்தப் பரிசுத்தொகை 2023ஆம் ஆண்டு ஆடவர் உலகக் கோப்பையின் 10 மில்லியன் டாலர் பரிசுத்தொகையை விஞ்சுவதாக அமைந்துள்ளது, இது மகளிர் கிரிக்கெட்டுக்கு முக்கிய மைல்கல்லாகும். வெற்றி பெறும் அணிக்கு 4.48 மில்லியன் டாலர் (தோராயமாக 39.55 கோடி ரூபாய்) வழங்கப்படும், இது 2022 இல் ஆஸ்திரேலியா பெற்ற 1.32 மில்லியன் டாலரை விட 239 சதவீதம் அதிகம். இரண்டாம் இடம் பெறும் அணிக்கு 2.24 மில்லியன் டாலர், அரையிறுதியில் தோல்வியடையும் அணிகளுக்கு தலா 1.12 மில்லியன் டாலர் வழங்கப்படும். ஒவ்வொரு குழு நிலை வெற்றிக்கும் 34,314 டாலர் கிடைக்கும், மேலும் அனைத்து பங்கேற்கும் அணிகளுக்கும் குறைந்தபட்சம் 250,000 டாலர் உறுதி செய்யப்பட்டுள்ளது. 

ஐசிசி தலைவர் ஜெய் ஷா இந்த அறிவிப்பை மகளிர் கிரிக்கெட்டின் வளர்ச்சியில் ஒரு முக்கிய தருணமாக விவரித்தார். “இந்த நான்கு மடங்கு உயர்வு மகளிர் கிரிக்கெட்டுக்கு ஒரு வரலாற்று மைல்கல். இது ஆண்களுக்கு இணையாக பெண் கிரிக்கெட் வீரர்களுக்கு மதிப்பு வழங்கப்படும் என்பதை உறுதி செய்கிறது,” என்று அவர் கூறினார்.  

இதையும் படிங்க: கிரிக்கெட்டிற்கு Tata BYEBYE சொன்ன புஜாரா.. நெகிழ்ச்சியுடன் பிரதமர் மோடி வாழ்த்து..!!