2025 சாம்பியன்ஸ் டிராபி பாகிஸ்தானில் ஹைபிரிட் முறையில் நடத்தப்படும். இந்தப் போட்டிக்காக இந்திய அணியை பாகிஸ்தானுக்கு அனுப்ப வேண்டாம் என்று பிசிசிஐ முடிவு செய்திருந்தது. ஆகையால், இந்திய அணி தனது அனைத்து போட்டிகளையும் துபாயிலும், மீதமுள்ள அணிகளின் போட்டிகள் பாகிஸ்தானிலும் மட்டுமே விளையாடும். இந்திய அணி இறுதிப் போட்டிக்கு முன்னேறினால், அந்தப் போட்டி துபாயில் மட்டுமே நடைபெறும. இல்லையெனில் பாகிஸ்தான் இறுதிப் போட்டியை நடத்தும். இதற்கெல்லாம் மத்தியில், ரோஹித் சர்மா போட்டி தொடங்குவதற்கு முன்பு பாகிஸ்தான் செல்ல வேண்டியிருக்கும் என்று கூறப்படுகிறது.

சாம்பியன்ஸ் டிராபி பிப்ரவரி 19 ஆம் தேதி கராச்சியில் தொடங்கி மார்ச் 9 ஆம் தேதி வரை நடைபெறும். இந்தப் போட்டியில் இந்திய அணி தனது முதல் போட்டியை 20 ஆம் தேதி துபாயில் விளையாடும். அதே நேரத்தில், ஒவ்வொரு ஐ.சி.சி போட்டிகளுக்கும் முன்பு, போட்டியை நடத்தும் நாடு வழக்கமாக போட்டியில் பங்கேற்கும் அனைத்து கேப்டன்களின் முன்னிலையில் ஒரு பெரிய நிகழ்வை ஏற்பாடு செய்யும். அப்போது கேப்டன்களின் போட்டோஷூட் நடைபெறும். பத்திரிகையாளர் சந்திப்பும் நடைபெறும். இந்த நிகழ்விற்காக ரோஹித் பாகிஸ்தானுக்குச் செல்லலாம் என்று பாகிஸ்தான் ஊடகங்களில் செய்தி வெளியாகி உள்ளது. இருப்பினும், கேப்டன் ரோஹித்தின் பாகிஸ்தான் பயணம் குறித்து அதிகாரப்பூர்வ உறுதிப்படுத்தல் எதுவும் இல்லை.

இதையும் படிங்க: ரோஹித் - கம்பீருக்கும் இடையே விரிசல்..? தெளிவுபடுத்திய பிசிசிஐ..!

சாம்பியன்ஸ் டிராபியில் மொத்தம் 8 அணிகள் விளையாடும், அவை 2 குழுக்களாகப் பிரிக்கப்பட்டுள்ளன. இந்திய அணி பாகிஸ்தான், நியூசிலாந்து மற்றும் வங்கதேசத்துடன் குரூப் ஏ-வில் உள்ளது. இந்தப் போட்டியில் இந்திய அணி பிப்ரவரி 20 ஆம் தேதி வங்கதேசத்திற்கு எதிராக ஆடுகிறது. பின்னர் இந்திய அணி பிப்ரவரி 23 அன்று பாகிஸ்தானுக்கு எதிராக தனது இரண்டாவது போட்டியை விளையாடும். இதன் பிறகு, குழுவின் கடைசி போட்டியில், மார்ச் 2 ஆம் தேதி நியூசிலாந்தை எதிர்கொள்ளும். குழு நிலை முடிந்ததும், அரையிறுதி மற்றும் இறுதிப் போட்டிகள் நடைபெறும்.

2025 சாம்பியன்ஸ் டிராபிக்கான இந்திய அணி இன்னும் அறிவிக்கப்படவில்லை. தேர்வுக் குழு கூட்டம் ஜனவரி 18 அல்லது 19 ஆம் தேதி நடைபெறும் என்றும், அதன் பிறகு அணி அறிவிக்கப்படும் என்றும் நம்பப்படுகிறது. இந்த பெரிய போட்டிக்கு முன், இந்திய அணி இங்கிலாந்துக்கு எதிராக 3 போட்டிகள் கொண்ட ஒருநாள் தொடரிலும் விளையாட உள்ளது. இந்தத் தொடருக்கான இந்திய அணியும் இன்னும் தேர்வு செய்யப்படவில்லை.

இதையும் படிங்க: கேப்டன் பதவியில் நீடிக்க இன்னொரு சான்ஸ் கேட்கும் ரோஹித்.. பிசிசிஐ நிலைப்பாடு என்ன.? புதிய தகவல்