நீலகிரி மாவட்டம் குன்னூரில் நாம் தமிழர் கட்சி வேட்பாளர்களை ஆதரித்துப் பிரச்சாரம் மேற்கொண்ட அக்கட்சியின் தலைமை ஒருங்கிணைப்பாளர் சீமான், திமுக மற்றும் அதிமுக கட்சிகளின் தேர்தல் வாக்குறுதிகளைக் கடுமையாகச் சாடினார்.

தமிழகச் சட்டமன்றத் தேர்தலில் தற்போது இரண்டே இரண்டு பேருக்குத் தான் போட்டி நடக்கிறது. ஒன்று ₹2,000, மற்றொன்று ₹2,500. மகளிர் உரிமைத் தொகை என்ற பெயரில் மக்களை ஏமாற்ற திமுக-வும் அதிமுக-வும் மாறி மாறி ஏலம் விட்டு வருகின்றன. இது பைத்தியக்காரத்தனமானது" என அவர் விமர்சித்தார்.

நாங்கள் யாருக்கும் இலவசம் தரமாட்டோம். இலவசங்கள் என்பது உழைக்கும் விருப்பத்தையே கொன்றுவிடும். மாறாக, மக்களுக்குத் தேவையான தரமான கல்வி, மருத்துவம் மற்றும் குடிநீர் போன்ற அடிப்படை வசதிகளைச் செய்துகொடுப்போம். அனைத்துப் பட்டதாரிகளுக்கும் அரசு வேலைவாய்ப்பு வழங்குவதே எங்கள் இலக்கு எனத் தனது கொள்கையை விளக்கினார்.

இதையும் படிங்க: விஜய் டாஸ்மாக்கை மூடுவேன் என பேசியதுண்டா? தவெக தலைவரை சீண்டிய சீமான்!

புதிதாகக் கட்சித் தொடங்கிப் போட்டியிடும் நடிகர் விஜய்யை மறைமுகமாகக் குறிப்பிட்டுச் சீமான் பேசியது கூட்டத்தில் சிரிப்பலையை ஏற்படுத்தியது: முன்பெல்லாம் தியேட்டர்களில் விசில் ஊதிக் கொண்டிருந்தவர்கள், இப்போது தெருவில் விசில் ஊதிக் கொண்டு அலைவதைப் பார்க்கிறோம்.

புதிதாக வந்திருக்கும் அந்த நபர், சுற்றிலும் மேடையில் கத்திக் கொண்டே மைக் முன்னால் வந்து, மீண்டும் மீண்டும் பேப்பரைப் பார்த்துப் படித்துப் பிரச்சாரம் செய்வது வேடிக்கையாக உள்ளது" என விஜய்யின் அரசியல் அறிமுகத்தை எள்ளி நகையாடினார்.

அதிமுக மற்றும் திமுக ஆகிய இரு கட்சிகளுமே ஊழல் கட்சிகள் என்றும், அவர்களுக்கு மாற்றாக மக்கள் நாம் தமிழர் கட்சியைத் தேர்ந்தெடுக்க வேண்டும் என்றும் அவர் கேட்டுக்கொண்டார். "மக்களை ஒரு பொருட்டாக நினைக்காமல் காசு கொடுத்து ஓட்டு வாங்கத் துடிப்பவர்களுக்கு இந்தப் தேர்தலில் பாடம் புகட்ட வேண்டும்" என அவர் ஆவேசமாக உரையாற்றினார்.

இதையும் படிங்க: காரைக்குடியில் சீமான் இன்று வேட்புமனு தாக்கல்! புளியால், சறுகிணியில் சூறாவளி பிரசாரம்!