சேலம் மாவட்டத்தில் உள்ள சீலநாயக்கன்பட்டி பகுதியில் நாளை தமிழக வெற்றிக் கழகத்தின் தலைவர் விஜய் பங்கேற்கும் நிர்வாகிகள் சந்திப்பு நிகழ்ச்சியும் தேர்தல் பரப்புரையும் நடைபெறவுள்ளது. இது கழகத்தின் சார்பில் சேலம் மாவட்டத்தில் மேற்கொள்ளப்படும் முக்கியமான நிகழ்வாகும். முன்னதாக, கழக நிர்வாகிகள் இந்த நிகழ்ச்சிக்காக சேலம் மாநகர காவல் ஆணையரிடம் அனுமதி கோரி மனு அளித்திருந்தனர்.

சீலநாயக்கன்பட்டி நெடுஞ்சாலை அருகே உள்ள தாளமுத்து நடராஜன் திடல் அல்லது KVP கார்டன் உள்ளிட்ட இடங்களில் நடத்த திட்டமிட்டிருந்தனர். காவல்துறை பல்வேறு ஆலோசனைகளுக்குப் பிறகு, 51-க்கும் மேற்பட்ட நிபந்தனைகளுடன் அனுமதி வழங்கியுள்ளது. இதன்படி, நிகழ்ச்சி மதியம் 12 மணி முதல் மாலை 3 மணி வரை மட்டுமே நடைபெறும். அதிகபட்சமாக 5,000 பேர் மட்டுமே பங்கேற்க அனுமதி அளிக்கப்பட்டுள்ளது.

குழந்தைகள், முதியோர், கர்ப்பிணிப் பெண்கள், உடல்நிலை சரியில்லாதவர்கள் ஆகியோரை கூட்டத்திற்கு அழைத்து வரக்கூடாது என்று கண்டிப்பாக அறிவுறுத்தப்பட்டுள்ளது. கழகத்தின் தலைமை நிலையச் செயலகம் வெளியிட்ட அறிவிப்பின்படி, இது முழுக்க முழுக்க அனுமதி பெற்ற நிர்வாகிகளுக்கான சந்திப்பாகவே ஏற்பாடு செய்யப்பட்டுள்ளது. QR குறியீட்டுடன் கூடிய நுழைவுச் சீட்டு பெற்ற 4,998 பேர் மட்டுமே உள்ளே அனுமதிக்கப்படுவார்கள். அனுமதிச் சீட்டு இல்லாத கழகத் தோழர்களோ பொதுமக்களோ நேரில் வருவதை தவிர்க்க வேண்டும் என்று கேட்டுக்கொள்ளப்பட்டுள்ளது.

இதையும் படிங்க: ஆணியே புடுங்க வேணாம்... தவெக நிர்வாகிகளுக்கு கடும் எதிர்ப்பு... சத்துணவு ஊழியர்கள் போராட்டத்தில் பரபரப்பு...!

இந்த நிகழ்ச்சியை தொலைக்காட்சி நேரலைகள் மற்றும் சமூக ஊடகங்கள் வழியாக பார்த்து ரசிக்கலாம் என்றும், அனைவரும் ஒத்துழைப்பு தர வேண்டும் என்றும் கழகப் பொதுச் செயலாளர் என். ஆனந்த் தெரிவித்துள்ளார். ஏற்கெனவே மைதானத்தில் பந்தல், தடுப்பு சுவர்கள், பாதுகாப்பு ஏற்பாடுகள் உள்ளிட்டவை தீவிரமாக நடைபெற்று வருகின்றன. காவல்துறை அதிகாரிகள் தளத்தை ஆய்வு செய்து பாதுகாப்பு நடவடிக்கைகளை உறுதி செய்துள்ளனர். கழகத் தொண்டர்கள் மற்றும் தன்னார்வலர்கள் பாதுகாப்பு ஒத்திகை நடத்தி வருகின்றனர். 

இதையும் படிங்க: “நேற்று கமல்... இன்னைக்கு விஜய்... நாளைக்கு சிம்பு... எந்த கொம்பன் வந்தாலும்...” - படு ஓபனாக சவால் விட்ட சி.வி.சண்முகம்...!