சென்னை: தமிழக வெற்றிக் கழகம் (தவெக) தலைவர் நடிகர் சி.ஜோசப் விஜய் இன்று காலை சென்னை நேரு உள்விளையாட்டு அரங்கில் தமிழ்நாட்டின் 13ஆவது முதலமைச்சராக பதவியேற்றார். ஆளுநர் ராஜேந்திர விஸ்வநாத் அர்லேகர் அவருக்கு பதவிப் பிரமாணம் செய்து வைத்தார். 

ஆனால், இந்த வரலாற்றுச் சிறப்புமிக்க பதவியேற்பு விழாவில் முன்னாள் முதலமைச்சர்கள் மு.க.ஸ்டாலின், எடப்பாடி கே. பழனிச்சாமி மற்றும் ஓ. பன்னீர்செல்வம் ஆகியோர் பங்கேற்கவில்லை. இது அரசியல் வட்டாரத்தில் பரபரப்பை ஏற்படுத்தியுள்ளது.

தேர்தல் பிரசாரத்தில் திமுக மீது விஜய் கடுமையான குற்றச்சாட்டுகளை முன்வைத்தார். “திமுகவுக்கும் தவெகவுக்கும் தான் போட்டி” என விஜய் கூறியதற்கு, ஸ்டாலின் “டில்லிக்கும் எங்களுக்கும் தான் போட்டி” என பதிலடி கொடுத்திருந்தார். 

இதையும் படிங்க: 50 ஆண்டுகள் தவெக நிலைத்திருக்கும்!! இளம் வயது அமைச்சர் கீர்த்தனா ஆரூடம்!!

இந்த கசப்பான பிரசாரத்துக்குப் பிறகு விஜய் பெரும் வெற்றி பெற்ற நிலையில், ஸ்டாலின் பெயர் குறிப்பிடாமல் பொதுவாக வாழ்த்து தெரிவித்திருந்தார். அதேபோல் எடப்பாடியும் பெயர் குறிப்பிடாமல் வாழ்த்து அளித்திருந்தார். இருப்பினும் இருவரும் இன்றைய விழாவில் கலந்துகொள்ளவில்லை.

திமுக சார்பில் இரண்டாம் கட்ட நிர்வாகிகள் சிலரும், அதிமுக சார்பிலும் சில முக்கிய நிர்வாகிகளும் விழாவில் பங்கேற்றனர். பாஜக சார்பில் முன்னாள் அமைச்சர் நயினார் நாகேந்திரன் மற்றும் முன்னாள் மாநிலத் தலைவர் தமிழிசை சௌந்தரராஜன் ஆகியோர் கலந்துகொண்டனர்.

விஜய் தலைமையிலான புதிய அரசு கூட்டணி ஆதரவுடன் அமைந்துள்ள நிலையில், முன்னாள் முதலமைச்சர்களின் வருகையின்மை அரசியல் கவனத்தை ஈர்த்துள்ளது. புதிய அரசு தமிழ்நாட்டின் வளர்ச்சிக்காக அனைத்து கட்சிகளுடனும் ஒத்துழைப்புடன் செயல்படும் என எதிர்பார்ப்பு நிலவுகிறது.

விழாவில் ராகுல் காந்தி உள்ளிட்ட கூட்டணித் தலைவர்கள், விஜயின் குடும்பத்தினர் மற்றும் நடிகை திரிஷா உள்ளிட்டோர் பங்கேற்றனர். முதலமைச்சர் விஜய் பதவியேற்ற உடனேயே மக்கள் நலன் சார்ந்த முக்கிய அறிவிப்புகளை வெளியிட்டார்.

தமிழக அரசியலில் புதிய அத்தியாயம் தொடங்கியுள்ள நிலையில், எதிர்காலத்தில் அனைத்து கட்சிகளிடையேயும் உறவுகள் எப்படி மாறும் என்பதை மக்கள் உன்னிப்பாகக் கவனித்து வருகின்றனர்.

இதையும் படிங்க: தற்காலிக சபாநாயகர் கருப்பையா தேர்வு!! உத்தரவில் கையெழுத்திட்டார் முதல்வர் விஜய்!!