ஜப்பானின் அய்ச்சி-நகோயாவில் நடைபெற்று வரும் 2026 ஆசிய விளையாட்டுப் போட்டியில் இந்தியாவுக்கு இரண்டாவது தங்கப் பதக்கம் கிடைத்துள்ளது. துப்பாக்கி சுடுதல் போட்டியின் 10 மீட்டர் ஏர் பிஸ்டல் கலப்பு அணி பிரிவில் இந்தியாவின் கமல்ஜீத் மற்றும் சுருச்சி சிங் ஜோடி தங்கப் பதக்கத்தை கைப்பற்றி அசத்தியுள்ளது.

வெள்ளிக்கிழமை நடைபெற்ற இறுதிப் போட்டியில் தொடக்கம் முதலே இந்திய ஜோடி ஆதிக்கம் செலுத்தியது. ஒவ்வொரு சுற்றிலும் துல்லியமாக இலக்கை குறிவைத்த கமல்ஜீத் மற்றும் சுருச்சி, இறுதியில் 484.6 புள்ளிகளைக் குவித்து முதலிடம் பிடித்தனர். இந்த ஸ்கோர் ஆசிய விளையாட்டுப் போட்டியில் புதிய சாதனையாக அமைந்துள்ளது.

இந்திய ஜோடிக்கு தென் கொரியா கடும் போட்டியை அளித்தது. இருப்பினும், இறுதிவரை முன்னிலையை தக்கவைத்த கமல்ஜீத் - சுருச்சி இணை, 6.6 புள்ளிகள் வித்தியாசத்தில் தென் கொரிய ஜோடியை பின்னுக்குத் தள்ளியது. தென் கொரியாவுக்கு வெள்ளிப் பதக்கமும், ஈரானுக்கு வெண்கலப் பதக்கமும் கிடைத்தன.

இதையும் படிங்க: AsianGames2026: பளுதூக்குதலில் வெள்ளி வென்ற மீராபாய் சானு..!! வரலாற்று சாதனை..!!

இந்த வெற்றியின் மூலம் 2026 ஆசிய விளையாட்டுப் போட்டியில் இந்தியாவின் தங்கப் பதக்க எண்ணிக்கை இரண்டாக உயர்ந்துள்ளது. முன்னதாக மகளிர் டி20 கிரிக்கெட் இறுதிப் போட்டியில் இந்திய அணி இலங்கையை வீழ்த்தி முதல் தங்கத்தை வென்றிருந்தது.

துப்பாக்கி சுடுதலில் இந்திய வீரர்கள் ஏற்கனவே பல பதக்கங்களைப் பெற்றிருந்த நிலையில், கமல்ஜீத் - சுருச்சி ஜோடியின் தங்கம் அந்த அணிக்கு கிடைத்த முக்கியமான வெற்றியாக அமைந்துள்ளது. குறிப்பாக, ஆசிய சாதனையுடன் தங்கம் வென்றிருப்பது இந்திய ரசிகர்களின் கவனத்தை ஈர்த்துள்ளது.

இந்நிலையில், ஆசிய விளையாட்டுப் போட்டியின் பதக்கப் பட்டியலில் இந்தியாவின் பதக்க எண்ணிக்கை தொடர்ந்து அதிகரித்து வருகிறது. வெள்ளிக்கிழமை நிலவரப்படி இந்தியா 2 தங்கம், 8 வெள்ளி, 9 வெண்கலம் என மொத்தம் 19 பதக்கங்களைப் பெற்றுள்ளது.

கமல்ஜீத் மற்றும் சுருச்சியின் துல்லியமான குறி, பதற்றமான இறுதிப் போட்டியிலும் அவர்களின் தொடர்ச்சியான செயல்பாடு ஆகியவை இந்தியாவின் இரண்டாவது தங்கப் பதக்கத்தை உறுதி செய்துள்ளன. ஆசிய விளையாட்டில் இந்தியாவின் பதக்க வேட்டை தொடர்ந்து வரும் நிலையில், இன்னும் பல போட்டிகளில் பதக்கங்கள் கிடைக்கும் என்ற எதிர்பார்ப்பு அதிகரித்துள்ளது.

இதையும் படிங்க: தொடரும் பதக்க வேட்டை! ஆசிய விளையாட்டில் துப்பாக்கிச்சுடுதலில் அசத்திய இந்திய வீராங்கனைகள்!