ஆப்பிள் நிறுவனத்தின் அடுத்த தலைமுறை ஐபோன் தொடர் அறிமுக நிகழ்ச்சி வரும் செப்டம்பர் 9ஆம் தேதி நடைபெறவுள்ளது. உலகளாவிய தொழில்நுட்ப ஆர்வலர்கள் இந்நிகழ்வை மிகுந்த எதிர்பார்ப்புடன் எதிர்நோக்கியுள்ளனர்.

முன்னாள் சிஇஓ டிம் குக் செப்டம்பர் 1ஆம் தேதி பதவி விலகி நிர்வாகத் தலைவராக மாறிய பின்னர், புதிய சிஇஓவாக ஜான் டெர்னஸ் பொறுப்பேற்றுள்ளார். இது அவரது தலைமையில் நடைபெறும் முதல் பெரிய தயாரிப்பு அறிமுக நிகழ்ச்சியாக இருப்பதால், அதிரடி அறிவிப்புகள் வெளியாகலாம் என கருதப்படுகிறது.

வழக்கமாக புதிய ஐபோன் தொடர் அறிமுகத்திற்கு முன் பழைய மாடல்களின் விலை குறைக்கப்படுவது ஆப்பிளின் நடைமுறை. அதன்படி ஐபோன் 17 தொடர் உலகெங்கிலும் விலை குறைப்பை சந்தித்துள்ளது. பிரிட்டனில் ஐபோன் 17 ப்ரோ மற்றும் ப்ரோ மேக்ஸ் மாடல்கள் 150 பவுண்ட் வரை குறைந்துள்ளன. அடிப்படை ஐபோன் 17 மாடல் 100 பவுண்ட் குறைந்துள்ளது. 

இதையும் படிங்க: ஆண்டு விழா ஸ்பெஷல் ஆஃபர்.. ஜியோவின் புதிய வருடாந்தர சலுகை அறிவிப்பு..!!

ஐபோன் ஏர் 512ஜிபி மாடல் 200 பவுண்ட் வரை தள்ளுபடி பெற்றுள்ளது. இதே போன்ற விலை குறைப்பு பல ஐரோப்பிய நாடுகளிலும் காணப்படுகிறது. இந்தியாவில் ஆப்பிளின் அதிகாரப்பூர்வ இணையதளத்தில் பெரிய மாற்றம் இல்லாவிட்டாலும், பிளிப்கார்ட் போன்ற தளங்களில் ஐபோன் 17 ப்ரோ மாடல் 2,000 ரூபாய் குறைத்து 80,900 ரூபாய்க்கு கிடைக்கிறது. கிரெடிட் கார்டு சலுகைகள், பழைய ஐபோன் பரிமாற்ற ஆஃபர் மற்றும் வங்கி சலுகைகளை இணைத்துப் பார்த்தால், சிலருக்கு இது சுமார் 53,817 ரூபாய் வரை குறைய வாய்ப்புள்ளது.

ஆப்பிள் நேரடியாக பெரிய தள்ளுபடி அளிக்காவிட்டாலும், புதிய மாடல்கள் அறிமுகமான பிறகு மேலும் விலை குறையலாம் என எதிர்பார்க்கப்படுகிறது. இந்த நிகழ்ச்சியில் ஐபோன் 18 ப்ரோ மற்றும் ப்ரோ மேக்ஸ் மாடல்களுடன் ஆப்பிளின் முதல் மடிக்கக்கூடிய ஃபோல்ட் மாடலும் அறிமுகமாகும் என பெரும் எதிர்பார்ப்பு நிலவுகிறது. இது ஐபோன் அல்ட்ரா என பெயரிடப்படலாம் என்றும் கருத்துகள் உள்ளன. அடிப்படை ஐபோன் 18 மாடல்கள் அடுத்த ஆண்டு வசந்த காலத்திற்கு தள்ளிவைக்கப்பட்டுள்ளன. 

ஆப்பிள் இன்டலிஜென்ஸ் உள்ளிட்ட புதிய செயற்கை நுண்ணறிவு அம்சங்களில் மேம்பட்ட புதுமைகள் அறிவிக்கப்படலாம். ஹூவாய் மற்றும் சாம்சங் போன்ற போட்டியாளர்கள் பல தொழில்நுட்ப முன்னேற்றங்களை அடைந்துள்ள நிலையில், ஆப்பிள் தனது சந்தை ஆதிக்கத்தை தக்கவைக்க புதிய புதுமைகளை அறிமுகப்படுத்த வேண்டிய தேவையில் உள்ளது. இந்த அறிமுகம் ஆப்பிளின் எதிர்கால திசையை தீர்மானிக்கும் முக்கிய நிகழ்வாக அமையும்.
 

இதையும் படிங்க: ஜிடிஏ 6 ரசிகர்களுக்கு குட் நியூஸ்: பிரத்யேக பிஎஸ்5 டூயல்சென்ஸ் கன்ட்ரோலர்கள் அறிமுகம்!!