இந்திய ஸ்மார்ட்போன் மற்றும் டேப்லெட் சந்தையில் சமீபத்தில் அறிமுகமான சில மாடல்களின் விலைகள் மீண்டும் உயர்த்தப்பட்டுள்ளன. சாம்சங் நிறுவனத்தின் கேலக்ஸி M17 5ஜி, கேலக்ஸி F17 5ஜி, கேலக்ஸி F70e 5ஜி உள்ளிட்ட பட்ஜெட் மற்றும் மிட்-ரேஞ்ச் மாடல்கள் மற்றும் சியோமி நிறுவனத்தின் ஃபிளாக்ஷிப் டேப்லெட் பேட் 8 ஆகியவை இதில் அடங்கும். அறிமுகமான சில மாதங்களுக்குள்ளேயே விலை உயர்த்தப்பட்ட இந்த சாதனங்கள், நுகர்வோருக்கு கூடுதல் செலவை ஏற்படுத்தியுள்ளன.
சாம்சங் கேலக்ஸி M17 5ஜி ஸ்மார்ட்போனின் 4ஜிபி ரேம் மாடல் விலை ரூ.1,000 உயர்ந்துள்ளது. 6ஜிபி மாடல் ரூ.2,000 ஆகவும், 8ஜிபி மாடல் ரூ.3,000 ஆகவும் அதிகரித்துள்ளது. கேலக்ஸி F17 5ஜியில் 6ஜிபி மாடல் ரூ.1,000-ம், 8ஜிபி மாடல் ரூ.2,000-ம் உயர்த்தப்பட்டுள்ளன. அதேபோல் கேலக்ஸி F70e 5ஜி மற்றும் கேலக்ஸி M17e 5ஜி மாடல்களின் 4ஜிபி வகை ரூ.1,000 ஆகவும், 6ஜிபி வகை ரூ.2,000 ஆகவும் விலை உயர்ந்துள்ளது. இதனால் இந்த தொடர் ஸ்மார்ட்போன்களின் தொடக்க விலை தற்போது ரூ.17,499 ஆக மாறியுள்ளது. இவை முன்னதாக ரூ.13,999 விலையில் அறிமுகம் செய்யப்பட்டிருந்தன.
இதேபோன்ற விலை உயர்வு சியோமி பேட் 8 டேப்லெட்டிலும் காணப்படுகிறது. 8ஜிபி ரேம் + 128ஜிபி ஸ்டோரேஜ் மாடல் தற்போது ரூ.38,999 ஆகவும், 12ஜிபி ரேம் + 256ஜிபி மாடல் ரூ.43,999 ஆகவும் விற்பனையாகின்றன. ஜூன் மாதத்தில் இந்த இரு வகைகளின் விலை முறையே ரூ.35,999 மற்றும் ரூ.38,999 ஆக உயர்த்தப்பட்டிருந்த நிலையில், தற்போது கூடுதலாக ரூ.3,000 மற்றும் ரூ.5,000 அதிகரித்துள்ளது. இது கடந்த இரண்டு மாதங்களில் இரண்டாவது முறையாக விலை உயர்த்தப்படுவதாகும்.
இதையும் படிங்க: சந்தைக்கு வருவதற்குள்.. முன்பதிவில் பட்டையைக் கிளப்பிய சாம்சங் ஃபோல்டபிள் போன்கள்!!
சாம்சங் கேலக்ஸி F மற்றும் M தொடர் மாடல்கள் கடந்த ஆறு மாதங்களில் இரண்டு முறை விலை உயர்த்தப்பட்டுள்ளன. உற்பத்தி செலவு அதிகரிப்பு, கூறுகளின் விலை மாற்றம் மற்றும் சந்தை நிலவரங்கள் காரணமாக நிறுவனங்கள் இத்தகைய நடவடிக்கைகளை எடுக்கின்றன எனக் கருதப்படுகிறது. இருப்பினும், போட்டி நிறைந்த இந்திய சந்தையில் இத்தகைய அடிக்கடி விலை உயர்வுகள், வாங்குபவர்களின் முடிவைப் பாதிக்கக்கூடும்.
நுகர்வோர் தற்போதைய சலுகைகள் மற்றும் ஆஃபர்களை ஒப்பிட்டுப் பார்த்து வாங்கும் முன் தெளிவுபடுத்திக்கொள்ள அறிவுறுத்தப்படுகின்றனர். விலை உயர்வுகள் தொடருமா என்பதை சந்தை நிலவரமே தீர்மானிக்கும்.
இதையும் படிங்க: இந்தியாவில் களமிறங்கிய புதிய Galaxy Watch..!! என்ன விலை? என்ன அம்சங்கள்?