கர்நாடகாவில் பிறந்த சரோஜா தேவி தனது தாத்தாவிடம் நடனம் மற்றும் பாட்டும் கற்று கொண்டு இரண்டிலும் கை தேர்ந்தவரானார். சரோஜாதேவிக்கு பி.ஆர்.கிருஷ்ணமூர்த்தி என்பவர் மூலம் சினிமா வாய்ப்பு கிடைத்தது. அதன் மூலம் மகாகவி காளிதாஸ் எனும் கன்னட படத்தின் மூலம் அறிமுகமானார் சரோஜாதேவி. தனது முதல் படத்திலேயே தேசிய விருதை பெற்ற இவர், அதை தொடர்ந்து, தமிழில் 1958ம் ஆண்டு எம்ஜிஆரின் நாடோடி மன்னன் படத்தில் அறிமுகம் ஆனார். தொடர்ந்து 1959ல் இயக்குநர் ஸ்ரீதரின் கல்யாணபரிசு படத்தில் நடித்தார்.

அடுத்தடுத்து அப்போதைய தமிழ் சினிமாவின் உச்சநட்சத்திரமாக இருந்த நடிகர்கள் எம்ஜிஆர், சிவாஜி கணேசன், ஜெமினி கணேசனுடன் பிஸியாக நடித்த நடிகையென்றால் அது சரோஜா தேவிதான். பார்த்திபன் கனவு, அன்பே வா, ஆசைமுகம், ஆலையமணி , கல்யாணபரிசு, எங்கள் வீட்டுப்பிள்ளை என அடுத்தடுத்து சரோஜா தேவி நடித்த படங்கள் அனைத்தும் அவருக்கு வெற்றியை தான் கொடுத்தன. 

சரோஜா தேவியின் கோபால் வசனமும், லவ் பேர்ட்ஸ் லவ் பேர்ட்ஸ் பாடலும் இன்றும் மக்கள் மத்தியில் பேசப்படும் ஒன்று என்றே கூறலாம். ஒரு நாளில் 18 மணி நேரம் நடிப்பாராம் சரோஜா தேவி. காலையில் சிவாஜியுடனும் மாலையில் எம்ஜியாருடனும் நடிப்பாராம் சரோஜா தேவி. இதில் எம்ஜியாருடன் 26 படங்களிலும், சிவாஜியுடன் 22 படங்களிலும் நடித்துள்ளார்.

நடிகை சரோஜா தேவி இந்திய அரசின் உயரிய விருதான பத்ம ஸ்ரீ, பத்ம பூஷன், மற்றும் வாழ்நாள் சாதனையாளர்களுக்கான விருதுகளையும் பெற்றுள்ளார். மேலும் பல அரசு விருதுகளையும் பெற்றுள்ளார். தமிழ், தெலுங்கு, கன்னடம், இந்தி என மொத்தம் 200 படங்களில் நடித்துள்ள சரோஜா தேவி, கடைசியாக 2009-ம் ஆண்டு சூர்யா நடிப்பில் வெளியான ‘ஆதவன்’ படத்தில் நடித்தார். 

தமிழில் கன்னடத்து பைங்கிளி, அபிநய சரஸ்வதி என ரசிகர்களால் அன்போடு அழைக்கப்படும் சரோஜா தேவிக்கு மற்ற மொழிகளிலும் செல்லப்பெயர் உள்ளது. அதாவது தெலுங்கில் சலபாசுந்தரி என்றும், கன்னடத்தில் அபிநய காஞ்சனா மாலா என்றும், ஹிந்தியில் அபிநய பாரதி என்றும் அழைக்கப்படுவாராம் சரோஜா தேவி. 

இந்நிலையில் 87 வயதான சரோஜா தேவி, வயது மூப்பின் காரணமாகவும், உடல்நலக்குறைவு காரணமாகவும் பெங்களூருவில் இன்று காலமானார். அவரது மறைவு தமிழ் திரையுலகினரை பெரும் சோகத்தில் ஆழ்த்தியுள்ளது. மேலும் சினிமாத்துறையினர் அவரது மறைவிற்கு இரங்கல் தெரிவித்து வருகின்றனர். 

இதையும் படிங்க: 'சனியன் சகடை' புகழ் கோட்டா ஸ்ரீனிவாசன் இன்று காலமானார்.. திரையுலகினர் இரங்கல்..!