கடலூர் அரசு தலைமை மருத்துவமனையில் முறையான சிகிச்சை அளிப்பதில்லை மருத்துவர்கள் இல்லை என ஆய்வுக்கு வந்த வீட்டு வசதி துறை அமைச்சரிடம் நோயாளிகளின் உறவினர்கள் கடும் வாக்குவாதம் பரபரப்பு

கடலூர் அரசு தலைமை மருத்துவமனையில் டெங்கு காய்ச்சலால் பாதிக்கப்பட்டு சிகிச்சை பெற்று வரும் நோயாளிகளின் எண்ணிக்கை 45 ஆக அதிகரித்துள்ள நிலையில், வீட்டுவசதி மற்றும் நகர்ப்புற வளர்ச்சித் துறை அமைச்சர் பி. ராஜ்குமார்  மருத்துவமனையில் ஆய்வு மேற்கொண்டார்.

தமிழகத்தில் பருவநிலை மாற்றம் மற்றும் மழைக்காலத்தைத் தொடர்ந்து டெங்கு பாதிப்பு அதிகரித்து வருகிறது. சுகாதாரத்துறை தகவலின்படி, செப். 19-ஆம் தேதி வரை மாநிலத்தில் 17,083 பேர் டெங்கு காய்ச்சலால் பாதிக்கப்பட்டுள்ளனர். இதுவரை 9 பேர் உயிரிழந்துள்ளனர்.

இதையும் படிங்க: "வேலியே பயிரை மேய்ந்தது போல"..! வளர்ப்பு மகளை சீரழித்த போலீஸ்... வெட்கக்கேடு.! விளாசிய வானதி சீனிவாசன்..!

இதையடுத்து, டெங்கு பாதிப்பு அதிகம் பதிவாகும் மாவட்டங்களில் தடுப்பு நடவடிக்கைகளை தீவிரப்படுத்தவும், அரசு மருத்துவமனைகளில் சிறப்பு டெங்கு வார்டுகள், போதிய மருந்துகள் மற்றும் ரத்தத் தட்டணுக்கள் இருப்பதை உறுதி செய்யவும் சுகாதாரத்துறை அறிவுறுத்தியுள்ளது.

கடலூர் அரசு தலைமை மருத்துவமனையில் சிகிச்சை பெற்று வரும் டெங்கு நோயாளிகளை சந்தித்த அமைச்சர், அவர்களின் உடல்நிலை மற்றும் அளிக்கப்பட்டு வரும் சிகிச்சை குறித்து கேட்டறிந்தார். தொடர்ந்து மருத்துவர்களிடம் டெங்கு நோயாளிகளுக்கான சிகிச்சை முறைகள், மருந்துகள், அவசர சிகிச்சை வசதிகள் உள்ளிட்டவை குறித்து ஆய்வு செய்தார்.

நோயாளிகளுக்கு தேவையான மருத்துவ வசதிகள் தடையின்றி கிடைப்பதை உறுதி செய்ய வேண்டும். நோயாளிகளின் உடல்நிலையை தொடர்ந்து கண்காணித்து, அவசர சிகிச்சை தேவைப்படுவோருக்கு முன்னுரிமை அளிக்க வேண்டும். மருத்துவமனையில் போதிய படுக்கைகள், மருந்துகள் உள்ளிட்ட அடிப்படை வசதிகள் இருப்பதையும் உறுதி செய்ய வேண்டும் என அதிகாரிகளுக்கு அமைச்சர் அறிவுறுத்தினார்.

 வீட்டுவசதி மற்றும் நகர்ப்புற வளர்ச்சித் துறை அமைச்சர் பி. ராஜ்குமார்  ஆய்வு செய்தபோது, நெய்வேலி டவுன்ஷிப்பைச் சேர்ந்த ஷீலா என்பவர் சிறுநீரகக் கோளாறு காரணமாக டயாலிசிஸ் சிகிச்சைக்காக அரசு மருத்துவமனையில் ஒரு மாதமாக அனுமதிக்கப்பட்டிருந்ததாகவும்ஆனால் கடந்த மூன்று நாள்களாக அவருக்கு டயாலிசிஸ் சிகிச்சை அளிக்கப்படவில்லை என்றும் அவரது உறவினர்கள் அமைச்சரிடம் தெரிவித்தனர்.

மேலும், டயாலிசிஸ் சிகிச்சை அளிப்பதற்கான மருத்துவர் இல்லாததால் சிகிச்சை தாமதமாகி வருவதாகவும், தற்போது சிகிச்சை அளிக்க முடியாது என்றும், வேறு மருத்துவமனைக்குச் செல்லுமாறு மருத்துவமனை நிர்வாகம் அறிவுறுத்தியதாகவும் அவர்கள் அமைச்சரிடம் புகார் தெரிவித்தனர்.

இதனால் ஆத்திரமடைந்த நோயாளியின் உறவினர்கள், அரசு மருத்துவமனையில் சிகிச்சைக்காக வரும் நோயாளிகளுக்கு தேவையான மருத்துவர்கள், உபகரணங்கள் மற்றும் கட்டமைப்பு வசதிகள் இல்லாததால் தொடர்ந்து சிரமம் ஏற்படுவதாகக் கூறி நோயாளியின் உறவினர்கள் அமைச்சரிடம் வாக்குவாதத்தில் ஈடுபட்டனர்.

அப்போது, அவர்களிடம் அமைச்சர் பி. ராஜ்குமார் விவரங்களைக் கேட்டறிந்தார். தொடர்ந்து, சம்பந்தப்பட்ட மருத்துவர்களிடம் விசாரித்த அமைச்சர், ஷீலாவுக்கு தேவையான சிகிச்சையை உடனடியாக வழங்குவதற்கான நடவடிக்கைகளை மேற்கொள்ளுமாறு அறிவுறுத்தினார். ஆனால் அவர்கள் சிகிச்சை எடுக்காமல் மருத்துவமனையை விட்டு வெளியேறினர் 

இதுகுறித்து நோயாளியின் உறவினர்கள் கூறியதாவது: “எங்கள் உறவினர் ஷீலாவுக்கு சிறுநீரகக் கோளாறு உள்ளது. டயாலிசிஸ் சிகிச்சை பெறுவதற்காக அவரை கடலூர் அரசு தலைமை மருத்துவமனையில் அனுமதித்தோம். ஆனால், டயாலிசிஸ் சிகிச்சை அளிப்பதற்கான மருத்துவர் இல்லாததால் கடந்த மூன்று நாள்களாக சிகிச்சைக்காக காத்திருக்கிறோம்.

சிகிச்சை அளிக்க முடியாது என்றும், வேறு மருத்துவமனைக்குச் செல்லுமாறும் மருத்துவர்கள் தெரிவித்தனர். அரசு மருத்துவமனையில் சிகிச்சைக்காக அனுமதிக்கப்பட்ட நோயாளியை, போதிய மருத்துவர்கள் மற்றும் உபகரணங்கள் இல்லை என்பதற்காக வேறு மருத்துவமனைக்குச் செல்லுமாறு கூறுவது வேதனை அளிக்கிறது.

அரசு மருத்துவமனைகளில் போதிய மருத்துவர்கள், டயாலிசிஸ் உள்ளிட்ட சிகிச்சை உபகரணங்கள் மற்றும் அடிப்படை கட்டமைப்பு வசதிகளை ஏற்படுத்த வேண்டும். நோயாளிகள் சிகிச்சைக்காக அலைய வேண்டிய நிலை ஏற்படக்கூடாது” என்றனர்.

மேலும், தமிழகத்தில் உள்ள அனைத்து அரசு மருத்துவமனைகளிலும் நோயாளிகளின் தேவைக்கேற்ப மருத்துவர்கள் மற்றும் மருத்துவ உபகரணங்களை அதிகரித்து, கட்டமைப்பு வசதிகளை மேம்படுத்த அரசு உரிய நடவடிக்கை எடுக்க வேண்டும் என்றும் அவர்கள் கோரிக்கை விடுத்தனர்.

டயாலிசிஸ் போன்ற தொடர் சிகிச்சை தேவைப்படும் நோயாளிகளுக்கு சிகிச்சை தாமதமின்றி கிடைப்பதை உறுதி செய்ய வேண்டும் என்பதே நோயாளிகளின் உறவினர்களின் முக்கிய கோரிக்கையாக இருந்தது.
 

இதையும் படிங்க: அடம்பிடிக்கும் ஆட்சியாளர்கள் இல்லை நாங்கள்! புதிய தலைமைச் செயலகம்! அமைச்சர் ராஜ்மோகன் பதில்!