தென்னிந்திய திரையுலகை அதிர்ச்சியில் ஆழ்த்திய போதைப்பொருள் வழக்கு தற்போது மேலும் சிக்கலாகி வருகிறது. இந்த வழக்கில் முக்கிய குற்றச்சாட்டுகள் எதிர்கொள்ளும் நடிகர்கள் ஸ்ரீகாந்த் மற்றும் கிருஷ்ணா ஆகியோர் சமீபத்தில் கைது செய்யப்பட்டு சிறையில் அடைக்கப்பட்டிருந்தனர். சில வாரங்களுக்கு முன்பு அவர்கள் இருவரும் ஜாமீனில் வெளியேறினர். ஆனால் தற்போது அவர்கள்மீது அமலாக்கத்துறை புதிய வழக்கையும் பதிவு செய்து விசாரணையை தொடங்கியுள்ளது.

இந்த வழக்கின் ஆரம்பம் சில மாதங்களுக்கு முன் சென்னை போலீசார் நடத்திய திடீர் சோதனையிலிருந்து தொடங்கியது. அப்போது போதைப்பொருள் கடத்தல் மற்றும் பயன்பாட்டில் சில திரைப்பட உலக நபர்கள் தொடர்புடையதாக தகவல் கிடைத்தது. அந்த விசாரணையின் போது, நடிகர்கள் ஸ்ரீகாந்த் மற்றும் கிருஷ்ணா மீது தெளிவான சான்றுகள் கிடைத்ததாக போலீசார் தெரிவித்தனர். இருவரும் போதைப்பொருள் வாங்கியதும், சில நேரங்களில் மற்றவர்களுக்கும் வழங்கியதும் கண்டறியப்பட்டதாக கூறப்பட்டது. இதையடுத்து, போலீசார் அவர்களை கைது செய்து, பல நாட்கள் காவலில் வைத்து விசாரித்தனர். பின்னர் நீதிமன்றத்தில் ஜாமீனில் விடுவிக்கப்பட்டனர். ஆனால் அதோடு முடிவில்லை.. அந்த வழக்கில் பணமோசடி மற்றும் வெளிநாட்டு நிதி பரிமாற்றங்கள் தொடர்பாக சந்தேகம் எழுந்ததால், அமலாக்கத்துறை அதில் தலையிட்டு விசாரணையைத் தொடங்கியது. அமலாக்கத்துறையினர் தரப்பில், “போதைப்பொருள் விற்பனை மற்றும் அதன் மூலம் சம்பாதிக்கப்பட்ட பணம் சட்டவிரோதமாக வங்கிகளில் பரிமாறப்பட்டிருக்கலாம்.

அதில் சிலர் திரையுலக பிரபலர்கள். அந்த நிதி எங்கே சென்றது, யாருக்கு கொடுக்கப்பட்டது என்பது குறித்து தெளிவாக அறிய வேண்டியிருப்பதால், இரு நடிகர்களுக்கும் சம்மன் அனுப்பப்பட்டிருக்கிறது” என்றார். அதன்படி, கடந்த வாரம் நடிகர்கள் ஸ்ரீகாந்த் மற்றும் கிருஷ்ணா இருவருக்கும் ED சம்மன் அனுப்பி, நுங்கம்பாக்கம் சாஸ்திரி பவனில் உள்ள அமலாக்கத்துறை அலுவலகத்தில் ஆஜராகுமாறு அறிவித்தது. அந்த சம்மனை ஏற்று நடிகர் கிருஷ்ணா ஏற்கனவே சில நாட்களுக்கு முன் விசாரணைக்கு ஆஜரானார். அவரிடம் சுமார் 8 மணி நேரம் தொடர்ந்து விசாரணை நடத்தப்பட்டது. அமலாக்கத்துறையினர் அவரிடம் பல ஆவணங்களையும் கேட்டதாக தகவல்கள் வெளியாகின. ஆனால் நடிகர் ஸ்ரீகாந்த் முதல் சம்மனுக்கு ஆஜராகவில்லை. அவரின் வழக்கறிஞர் மூலம் “தற்போது சில உடல்நலக் காரணங்களால் ஆஜராக முடியாது. சில நாட்கள் அவகாசம் வழங்கவும்” எனக் கடிதம் கொடுக்கப்பட்டிருந்தது. இதை ஏற்காமல், அமலாக்கத்துறை மீண்டும் இரண்டாவது சம்மன் அனுப்பியது.

இதையும் படிங்க: நான் வீழ்வேன் என்று நினைத்தாயோ..! மேனியை பளபளப்பாக்கி.. தன்னை மெருகேற்றி.. மீண்டும் சினிமாவில் அமலாபால்..!

அதன்படி, நடிகர் ஸ்ரீகாந்த் காலை 10.30 மணியளவில் நுங்கம்பாக்கம் சாஸ்திரி பவனில் உள்ள ED அலுவலகத்துக்குச் சென்றார். முககவசம் அணிந்திருந்த அவர், பத்திரிகையாளர்களிடம் எந்தக் கருத்தையும் கூறாமல் நேரடியாக உள்ளே சென்றார். அமலாக்கத்துறை அதிகாரிகள் அவரிடம் சுமார் 10 மணி நேரம் தொடர்ந்து விசாரணை நடத்தியதாக கூறப்படுகிறது. மதிய உணவுக்காக கூட அவர் அலுவலகத்திலேயே தங்கியிருந்தார். விசாரணை இரவு 8 மணி வரை நீடித்ததாகவும், சில முக்கிய ஆவணங்கள் அவரிடம் கேட்கப்பட்டதாகவும் தகவல்கள் வெளியாகியுள்ளன. இந்த விசாரணையில், போதைப்பொருள் வாங்கிய பணம் எங்கிருந்து வந்தது?,  அந்தப் பணம் யாரின் வங்கிக் கணக்கில் செலுத்தப்பட்டது?, போதைப்பொருள் கடத்தலில் வெளிநாட்டு நபர்கள் தொடர்புடையவர்களா?, மற்ற நடிகர்களுக்கும், தொழிலதிபர்களுக்கும் அவர் சப்ளை செய்தாரா? போன்ற இந்தக் கேள்விகளுக்கு ஸ்ரீகாந்த் தெளிவான பதில்களை அளித்தாரா என்பது குறித்து ED வட்டாரங்களில் எந்த அதிகாரப்பூர்வ தகவலும் வெளியிடப்படவில்லை.

எனினும், விசாரணை முடிந்த பிறகு அவர் வெளியில் வந்தபோது, பத்திரிகையாளர்கள் கேள்வி எழுப்பியபோதும், எந்தப் பதிலும் அளிக்காமல் காரில் ஏறிச் சென்றார். ED வட்டாரங்கள், “விசாரணை இன்னும் முடிவடையவில்லை. சில நிதி தொடர்பான ஆவணங்கள் மற்றும் மின்னணு பதிவுகள் பரிசோதனைக்காக அனுப்பப்பட்டுள்ளன. அவை கிடைத்த பிறகு மீண்டும் நடிகரை அழைத்து கூடுதல் விசாரணை நடத்தப்படும்” என்கின்றனர்.
இந்த வழக்கு தற்போது சினிமா உலகில் பெரும் பரபரப்பை ஏற்படுத்தியுள்ளது. நடிகர் ஸ்ரீகாந்த் கடந்த இருபது ஆண்டுகளாக தமிழ் மற்றும் தெலுங்கு திரைப்படங்களில் முக்கிய நடிகராக இருந்து வருகிறார். அவரைச் சுற்றியுள்ள இந்த குற்றச்சாட்டு ரசிகர்களிடையே அதிர்ச்சியை ஏற்படுத்தியுள்ளது. அதேபோல, நடிகர் கிருஷ்ணா.. இவர் ஒரு பிரபல நடிகரின் மகனாகவும், சில வெற்றிப் படங்களில் நடித்தவராகவும் இருப்பதால், இந்த வழக்கு மேலும் கவனத்தை ஈர்த்துள்ளது. சமூக வலைத்தளங்களில் பலரும் கருத்து தெரிவித்து வருகின்றனர்.  இதற்கிடையில், சிலர் இந்த வழக்கை ஒரு சொந்த உள்கட்டமைப்பு சண்டை என்று கூறுகின்றனர். சில தயாரிப்பாளர்களுடனான நிதி விவகாரங்கள் காரணமாகவே இந்த விசாரணை தீவிரமாக்கப்பட்டதாகவும் குற்றம் சாட்டப்படுகிறது.

அமலாக்கத்துறை அதிகாரிகள் அதற்கு,  “இது எந்த அரசியல் அல்லது தொழில் சார்ந்த பழிவாங்கல் அல்ல. போதைப்பொருள் மற்றும் பணமோசடி தொடர்பான சர்வதேச விசாரணையின் ஒரு பகுதியாக இதை நடத்துகிறோம்” என்றார். இந்த வழக்கில் ED இன்னும் சில சினிமா பிரபலர்களுக்கு சம்மன் அனுப்பத் தயாராகி வருவதாக தகவல்கள் வெளியாகியுள்ளன. அடுத்த கட்ட விசாரணையில் மேலும் சில பெயர்கள் வெளியாகும் எனவும் கூறப்படுகிறது.
இதற்கிடையில், நடிகர் ஸ்ரீகாந்தின் வழக்கறிஞர் இன்று காலை ஒரு குறிப்பு வெளியிட்டுள்ளார். அதில், “எங்கள் வாடிக்கையாளர் எந்த வித சட்டவிரோத செயல்களிலும் ஈடுபடவில்லை. அவரிடம் கேட்கப்பட்ட அனைத்து ஆவணங்களையும் வழங்கியுள்ளோம். அவர் முழுமையாக விசாரணையில் ஒத்துழைக்கிறார்” என்றார். எதுவாக இருந்தாலும், போதைப்பொருள் வழக்கில் ஆரம்பமான இந்தச் சம்பவம் தற்போது பணமோசடி மற்றும் சர்வதேச நிதி பரிமாற்ற விசாரணை என விரிவடைந்துள்ளது. அடுத்த சில வாரங்களில் ED மேலும் சில முக்கிய வெளிப்பாடுகளை செய்யும் வாய்ப்பு இருப்பதாக கூறப்படுகிறது.

சினிமா உலகில் இதனால் பரபரப்பு அதிகரித்து, பலரும் “திரையுலகில் தூய்மை தேவை” என்று கூறி வருகின்றனர். அமலாக்கத்துறையின் விசாரணை இன்னும் தொடர்கிறது.. நடிகர் ஸ்ரீகாந்த் மீண்டும் ஆஜராக வேண்டிய தேதி விரைவில் அறிவிக்கப்படும் என அதிகாரப்பூர்வ வட்டாரங்கள் தெரிவித்துள்ளன. இதனால், தற்போது தமிழ் சினிமா உலகம் முழுவதும் கவனம் செலுத்தி உள்ளது. “போதைப்பொருள் வழக்கில் அடுத்து யார்?” என்ற கேள்வியே ரசிகர்களிடையே பரவலாக பேசப்படுகிறது.

இதையும் படிங்க: வயசானாலும் ஃபிட்டா இருக்க காரணமே சாப்பாடு தான்..! தனது டயட் குறித்த ரகசியத்தை உடைத்த நடிகர் சரத்குமார்..!