தமிழ் சினிமாவில் குழந்தை நட்சத்திரமாக அறிமுகமாகி, பின்னர் முன்னணி நடிகராக உயர்ந்து, அதன் பின் அரசியலிலும் வெற்றிக் கொடி நாட்டி தமிழ்நாட்டின் முதலமைச்சராக உயர்ந்துள்ள விஜய் இன்று தனது 52வது பிறந்தநாளைக் கொண்டாடுகிறார். கடந்த மூன்று தசாப்தங்களுக்கும் மேலாக திரையுலகில் தனக்கென ஒரு சாம்ராஜ்யத்தை உருவாக்கிய அவர், பின்னர் அந்த புகழையும், வசதிகளையும் தாண்டி அரசியலுக்குள் நுழைந்து மக்கள் ஆதரவுடன் மாநிலத்தின் உயர்ந்த நிர்வாகப் பொறுப்பை அடைந்திருப்பது, தமிழக அரசியல் மற்றும் சினிமா வரலாற்றில் முக்கிய அத்தியாயமாக பார்க்கப்படுகிறது.
இயக்குநர் எஸ்.ஏ. சந்திரசேகர் மற்றும் பின்னணிப் பாடகி ஷோபாவின் மகனாக 1974ம் ஆண்டு ஜூன் 22ம் தேதி பிறந்த விஜய், சிறு வயதிலேயே கலை உலகின் சூழலில் வளர்ந்தார். தனது தந்தை இயக்கிய பல படங்களில் குழந்தை நட்சத்திரமாக நடித்த அவர், அப்போது தமிழ் சினிமாவின் முன்னணி நட்சத்திரங்களான ரஜினிகாந்த், விஜயகாந்த் உள்ளிட்டோருடன் திரையைப் பகிர்ந்து கொண்டார். அந்த அனுபவங்கள் பின்னாளில் அவரது நடிகர் வாழ்க்கைக்கு வலுவான அடித்தளமாக அமைந்தன.
கதாநாயகனாக விஜய் அறிமுகமானது அவரது தந்தை இயக்கிய நாளைய தீர்ப்பு திரைப்படத்தின் மூலம். ஆரம்ப காலங்களில் அவரது படங்கள் கலவையான விமர்சனங்களையும் வரவேற்பையும் பெற்றாலும், தனது தனித்துவமான நடிப்பு, நடனத் திறன் மற்றும் விடாமுயற்சியால் ரசிகர்களின் கவனத்தை ஈர்த்தார். குறிப்பாக இளம் தலைமுறையினரிடம் அவருக்கு தனி ரசிகர் பட்டாளம் உருவாகத் தொடங்கியது. விஜயின் திரை வாழ்க்கையில் மிகப்பெரிய திருப்புமுனையாக அமைந்த படம் பூவே உனக்காக.
இதையும் படிங்க: முதலமைச்சராக கொண்டாடும் முதல் பிறந்தநாள்...!! அன்று சினிமா நாயகன்.. இன்று மாநிலத்துக்கே மன்னன்.. விஜயின் வரலாறு தெரியுமா..!
இயக்குநர் விக்ரமன் இயக்கிய அந்த திரைப்படம் குடும்ப ரசிகர்களிடையே மிகப்பெரிய வரவேற்பைப் பெற்று, விஜயை அடுத்த கட்டத்துக்கு கொண்டு சென்றது. அதன்பிறகு லவ் டுடே, காதலுக்கு மரியாதை, துள்ளாத மனமும் துள்ளும் உள்ளிட்ட படங்கள் தொடர்ந்து வெற்றி பெற்று, அவரை தமிழ் சினிமாவின் முன்னணி நடிகர்கள் பட்டியலில் இணைத்தன. 2000களில் விஜயின் திரைப்பயணம் புதிய உச்சத்தை எட்டியது. காதல் நாயகனாக அறியப்பட்ட அவர், ஆக்ஷன் மற்றும் மாஸ் ஹீரோவாக மாறத் தொடங்கினார். அதில் முக்கிய மைல்கல்லாக அமைந்தது கில்லி திரைப்படம். அந்தப் படத்தின் வெற்றி தமிழ் சினிமா பாக்ஸ் ஆபீஸில் புதிய சாதனைகளை உருவாக்கியதோடு, விஜயை மாஸ் ஹீரோக்களின் முதல் வரிசையில் நிறுத்தியது.
ரசிகர்கள் அவரை “இளைய தளபதி” என்று அழைக்கத் தொடங்கினர். அதன்பிறகு போக்கிரி, துப்பாக்கி, கத்தி, மெர்சல், சர்கார், மாஸ்டர், லியோ உள்ளிட்ட பல படங்கள் வசூல் சாதனைகளை படைத்தன. குறிப்பாக அவரது திரைப்படங்கள் வெளியாகும் நாட்கள் தமிழகத்தில் திருவிழா நாட்களைப் போல மாறின. திரையரங்குகள் முன்பு ஆயிரக்கணக்கான ரசிகர்கள் கூடுவது, கட்-அவுட்களுக்கு பால் அபிஷேகம் செய்வது, சமூக சேவைகளை முன்னெடுப்பது போன்றவை வழக்கமான நிகழ்வுகளாக மாறின.
விஜயின் சந்தை மதிப்பு உயர்ந்ததோடு, அவரது சம்பளமும் தொடர்ந்து அதிகரித்தது. தமிழ் சினிமாவில் அதிக சம்பளம் பெறும் நடிகர்களில் ஒருவராக உருவெடுத்த அவர், தனது கடைசி திரைப்படமான ஜன நாயகன் படத்திற்காக ரூ.250 கோடி வரை சம்பளம் பெற்றதாக கூறப்பட்டது. இதன் மூலம் இந்திய திரைப்படத் துறையிலேயே அதிக சம்பளம் பெறும் நடிகர்களில் ஒருவராக அவர் உயர்ந்தார்.
திரையுலகில் உச்சத்தில் இருந்தபோதும், அரசியல் மீதான ஆர்வத்தை வெளிப்படையாகக் காட்டிய விஜய், இறுதியில் தனிக்கட்சியைத் தொடங்கி நேரடி அரசியலுக்குள் குதித்தார். ஆரம்பத்தில் அவரது அரசியல் முயற்சிகள் பல்வேறு விமர்சனங்களையும் கேள்விகளையும் எதிர்கொண்டன. குறிப்பாக, எம்.ஜி.ஆருக்குப் பிறகு ஒரு சினிமா நடிகர் தனிக்கட்சியைத் தொடங்கி தமிழக அரசியலில் வெற்றி பெற முடியுமா என்ற கேள்வி பல தரப்பில் எழுந்தது.
ஆனால், மக்கள் மத்தியில் நீண்டகாலமாக உருவாக்கியிருந்த ஆதரவு, ரசிகர் மன்றங்களின் வலிமை மற்றும் தனது அரசியல் பிரசாரங்கள் மூலம் விஜய் படிப்படியாக அரசியல் செல்வாக்கை வளர்த்துக் கொண்டார். பல சவால்கள் மற்றும் அரசியல் தாக்குதல்களை எதிர்கொண்டபோதும், தனது இலக்கை நோக்கி நகர்ந்த அவர், தேர்தலில் வெற்றி பெற்று தமிழ்நாட்டின் முதலமைச்சராக பதவியேற்றார். “கப்பு முக்கியம் பிகிலு” என்ற தனது பிரபல வசனத்தை ரசிகர்கள் மீண்டும் நினைவுகூரும் வகையில், இறுதியில் வெற்றிக் கோப்பையை கைப்பற்றியதாக அவரது ஆதரவாளர்கள் கூறுகின்றனர்.
இந்த நிலையில், முதலமைச்சராக பதவியேற்ற பிறகு வரும் அவரது முதல் பிறந்தநாள் என்பதால், இந்த ஆண்டின் கொண்டாட்டங்களுக்கு தனி முக்கியத்துவம் ஏற்பட்டுள்ளது. மாநிலம் முழுவதும் கட்சியினர் மற்றும் ரசிகர்கள் பல்வேறு நலத்திட்ட உதவிகளை ஏற்பாடு செய்துள்ளனர். இரத்ததான முகாம்கள், அன்னதானம், கல்வி உதவித்தொகை வழங்குதல், மரக்கன்றுகள் நடுதல் உள்ளிட்ட சமூகப் பணிகள் பல இடங்களில் நடைபெற உள்ளதாக தகவல்கள் வெளியாகியுள்ளன.
இதற்கிடையே, நடிகர் ஜெய் மற்றும் அமைச்சர் கீர்த்தனா ஆகியோர் நேற்று நள்ளிரவு 12 மணியளவில் விஜயின் பிறந்தநாளை முன்னிட்டு வாணவேடிக்கைகள் வெடித்து கொண்டாடிய வீடியோ சமூக வலைதளங்களில் வைரலாகி வருகிறது. அந்தக் காட்சிகளை ரசிகர்கள் பரவலாக பகிர்ந்து வருகின்றனர். மேலும், சினிமா பிரபலங்கள், அரசியல் தலைவர்கள் மற்றும் பல்வேறு தரப்பினரும் சமூக வலைதளங்கள் வழியாக விஜய்க்கு பிறந்தநாள் வாழ்த்துகளை தெரிவித்து வருகின்றனர்.
எனினும், இந்த மகிழ்ச்சியான சூழலுக்கு மத்தியில் ஒரு சோக நிகழ்வும் மாநிலத்தை உலுக்கியுள்ளது. பெரியபாளையம் பகுதியில் உள்ள இறால் பதப்படுத்தும் நிறுவனத்தில் அமோனியா வாயு கசிவு ஏற்பட்டதாக கூறப்படும் சம்பவத்தில் உயிரிழப்புகள் ஏற்பட்டுள்ளன. பலர் மருத்துவமனைகளில் சிகிச்சை பெற்று வருவதாகவும் தகவல்கள் வெளியாகியுள்ளன. இந்தச் சம்பவத்தைத் தொடர்ந்து அரசு மீட்பு மற்றும் சிகிச்சைப் பணிகளில் தீவிரமாக ஈடுபட்டு வருகிறது.
அந்த சூழ்நிலையை கருத்தில் கொண்டு, முதலமைச்சர் விஜய் இன்று நடைபெறவிருந்த சில பிறந்தநாள் நிகழ்ச்சிகளில் நேரடியாக பங்கேற்பாரா என்பது குறித்து அதிகாரப்பூர்வ தகவல் எதுவும் வெளியாகவில்லை. பாதிக்கப்பட்ட மக்களின் நிலையை தொடர்ந்து கண்காணித்து வருவதாக அரசு வட்டாரங்கள் தெரிவிக்கின்றன. இதனால் வழக்கமான பிரம்மாண்ட கொண்டாட்டங்களுக்கு பதிலாக, நலத்திட்ட உதவிகள் மற்றும் சமூக சேவைகளுக்கு முக்கியத்துவம் அளிக்கப்படலாம் என்ற எதிர்பார்ப்பும் நிலவுகிறது.
குழந்தை நட்சத்திரமாக தொடங்கிய பயணம், தமிழ் சினிமாவின் உச்ச நட்சத்திரமாக உயர்வு, பின்னர் அரசியல் தலைவராக மாறி மாநிலத்தின் முதலமைச்சர் பதவியை அடைந்தது வரை விஜயின் வாழ்க்கை பல்வேறு திருப்பங்களால் நிரம்பியுள்ளது. அவரது 52வது பிறந்தநாள், ஒரு நடிகரின் பிறந்தநாளாக மட்டுமல்லாமல், தமிழக அரசியல் மற்றும் திரையுலகில் முக்கிய தாக்கத்தை ஏற்படுத்திய ஒரு ஆளுமையின் பயணத்தை நினைவுகூரும் நாளாகவும் மாறியுள்ளது. ரசிகர்கள் கொண்டாட்டத்தில் ஈடுபட்டிருக்கும் இந்த தருணத்தில், பொறுப்பும் சேவையும் இணைந்த புதிய அத்தியாயத்தை அவர் தொடர்ந்து எழுதிக் கொண்டிருக்கிறார்.
இதையும் படிங்க: ‘பாரதி கண்ணம்மா’ நடிகை நினைவிருக்கா..!! திருமண வாழ்க்கையில் நுழையும் வினுஷா தேவி..!