தெலுங்கு சினிமா பிரபலம் அக்கினேனி நாகார்ஜுனாவின் பெயர், படங்கள், குரல் உள்ளிட்ட தனிப்பட்ட அடையாளங்களை அனுமதியின்றி வணிக நோக்கத்திற்காகப் பயன்படுத்துவதைத் தடுக்க டெல்லி உயர்நீதிமன்றம் இடைக்கால உத்தரவு பிறப்பிக்க உள்ளது. இன்று (செப்டம்பர் 25) நடந்த விசாரணையில், நீதிபதி தேஜாஸ் காரியா இந்த உத்தரவை வழங்குவதாகத் தெரிவித்தார். இது பாலிவுட் பிரபலங்கள் போல தெலுங்கு நட்சத்திரங்களுக்கும் சமமான பாதுகாப்பை உறுதி செய்யும் நடவடிக்கையாகும்.

நாகார்ஜுனா தாக்கல் செய்த வழக்கில், அவரது படங்கள் போர்னோகிராஃபி வலைத்தளங்களில் மார்ஃபிங் செய்யப்பட்டு பரவுவது, அனுமதியின்றி டி-ஷர்ட்கள், பைகள் போன்ற பொருட்களில் அவரது பெயரைப் பயன்படுத்தி விற்பனை செய்வது, யூடியூப் சேனல்களில் AI தொழில்நுட்பம் மூலம் உருவாக்கப்பட்ட போலி வீடியோக்கள் பரவுவது ஆகியவற்றை எதிர்த்து நடவடிக்கை கோரப்பட்டது. இவை அவருக்கும், அவரது குடும்பத்திற்கும் மன அழுத்தத்தை ஏற்படுத்துவதாகவும், அவரது நற்பெயரைத் தாண்டுவதாகவும் வாதிடப்பட்டது.

இதையும் படிங்க: அபிஷேக் பச்சனின் பெயர், போட்டோக்களை பயன்படுத்தக்கூடாது.. டெல்லி ஐகோர்ட் அதிரடி..!!

நாகார்ஜுனாவின் வழக்கறிஞர் பிரவின் ஆனந்த், "இது மூன்று வகை மீறல்கள்: போர்னோ வலைத்தளங்கள், அங்கீகாரமற்ற வணிகம், யூடியூப் வீடியோக்கள். இவை ஹேஷ்டேக்கள் மூலம் பரவி, AI பயிற்சிக்கும் பயன்படுத்தப்படுகின்றன" என்று கூறினார். மேலும் அவர், ஐஸ்வர்யா ராய், அபிஷேக் பச்சன், அமிதாப் பச்சன், கரன் ஜோஹர் போன்றோரின் வழக்குகளை மேற்கோள் காட்டி, அந்த உத்தரவுகளை வலியுறுத்தினார். இதனையடுத்து மனுவை விசாரித்து உரிய உத்தரவு பிறப்பிக்கப்படும் என நீதிபதி உறுதியளித்தார்.

இந்த வழக்கு, டிஜிட்டல் உலகத்தில் பிரபலங்களின் 'பெர்சனாலிட்டி ரைட்ஸ்' (தனிப்பட்ட உரிமைகள்) மீதான அனுமதியின்றி பயன்பாட்டை எதிர்க்கும் தொடர்ச்சியான போராட்டத்தின் பகுதியாகும். இதற்கு முன்னதாக ஐஸ்வரியா ராய், அபிஷேக் பச்சன் உள்ளிட்டோருக்கும் இதே போன்ற பாதுகாப்பு அளிக்கப்பட்டது. தெலுங்கு மற்றும் தமிழ் திரையுலகில் பட்டையை கிளப்பி வரும் நடிகர் நாகார்ஜுனாவுக்கு இந்த மோசடிகள் அவரது தொழில் மற்றும் தனிப்பட்ட வாழ்க்கையை அச்சுறுத்துவதாக வாதிடப்பட்டது.

இந்த வழக்கு, இந்திய சினிமா உலகில் டிஜிட்டல் துஷ்பிரயோகத்திற்கு எதிரான புதிய அத்தியாயத்தைத் தொடங்குகிறது. நாகார்ஜுனாவின் ரசிகர்கள் இதை வரவேற்றுள்ளனர், ஆனால் AI தொழில்நுட்பத்தின் வளர்ச்சியில் சட்டங்கள் தாமதமாக இருப்பதாக விமர்சனமும் எழுந்துள்ளது.

இதையும் படிங்க: டெல்லி ஐகோர்ட் படியேறிய நடிகர் அபிஷேக் பச்சன்.. காரணம் இதுதான்..!!