மணிப்பூர் மாநிலத்தின் சுராசந்த்பூர் மாவட்டத்தில் பிரதமர் நரேந்திர மோடி பல்வேறு நலத்திட்டங்களைத் தொடங்கி வைத்தார். இந்தத் திட்டங்களின் மதிப்பு 7,300 கோடி ரூபாய்க்கும் மேல் உள்ளது. இவை மணிப்பூர் நகர சாலைகள், வடிகால் மேம்பாடு, தேசிய நெடுஞ்சாலை திட்டங்கள், தகவல் தொழில்நுட்ப வளர்ச்சி திட்டம், பெண்களுக்கான விடுதிகள் என பல உள்ளடங்கியவை. 

சுராசந்த்பூர் என்பது குகி இன மக்கள் அதிகம் வசிக்கும் இடமாகும். 2023 மே மாதம் முதல் மெய்தி மற்றும் குகி இனங்கள் இடையேயான இன வன்முறை காரணமாக இங்கு கடுமையான பாதிப்புகள் ஏற்பட்டுள்ளன. 260-க்கும் மேற்பட்டோர் இறந்துள்ளனர், 60,000-க்கும் மேற்பட்டோர் இடம்பெயர்ந்துள்ளனர். இந்த வன்முறைக்குப் பிறகு மோடியின் முதல் மணிப்பூர் பயணம் இது.

திட்டங்களைத் தொடங்கிய பிறகு, பிரதமர் மோடி பொதுக்கூட்டத்தில் பேசினார். கனமான மழை பெய்தும், ஆயிரக்கணக்கான மக்கள் கூடியிருந்தனர். மோடி அவர்களின் உற்சாகத்தைப் பாராட்டி, "மணிப்பூர் என்பது தைரியமும் வீரமும் கொண்ட நிலமாகும்" என்று தொடங்கினார். 

இதையும் படிங்க: “உங்களுடன் ஸ்டாலின்” திட்டம்.. செயல்பாடுகளை ஆய்வு செய்தார் முதல்வர் ஸ்டாலின்..!!

அவர் தொடர்ந்து, "மணிப்பூர் நம்பிக்கையின் நிலம். துரதிர்ஷ்டமாக, இந்த அழகிய பகுதியில் வன்முறை சூழல் ஏற்பட்டுவிட்டது. சற்றுமுன், நிவாரண முகாம்களில் வசிக்கும் பாதிக்கப்பட்டவர்களை நான் சந்தித்தேன். அவர்களின் கதைகள் என்னை உணர்ச்சிபூர்வமாக்கின. மணிப்பூரில் நம்பிக்கையின் புதிய விடியல் உதயமாகி வருகிறது என்பதை நம்பிக்கையுடன் சொல்கிறேன்" என்று கூறினார்.

வன்முறையைத் தடுக்க அமைதி அவசியம் என்று வலியுறுத்திய மோடி, "வளர்ச்சி வேரூன்ற, அமைதி தேவை. கடந்த 11 ஆண்டுகளில், வடகிழக்குப் பகுதியில் பல மோதல்களுக்கு தீர்வு காணப்பட்டுள்ளது. மக்களும் அமைதிப் பாதையைத் தேர்ந்தெடுத்து வளர்ச்சிக்கு முன்னுரிமை அளித்துள்ளனர். சமீபத்தில் பல்வேறு குழுக்களுடன் அமைதிப் பேச்சுவார்த்தை நடத்தப்பட்டுள்ளது. இது இந்திய அரசின் முயற்சிகளின் ஒரு பகுதியாகும். அமைதியின் பாதையில் முன்னேறிச் செல்ல அனைத்து அமைப்புகளுக்கும் நான் வேண்டுகோள் விடுக்கிறேன்" என்றார்.

மணிப்பூர் மக்களுக்கு ஆதரவாக இருக்கிறோம் என்று உறுதியளித்த மோடி, "நானும் இந்திய அரசும் மணிப்பூர் மக்களுடன் உள்ளன. மணிப்பூர் மக்களின் வாழ்க்கையில் அமைதியை நிலைநாட்ட நான் உறுதிபூண்டுள்ளேன். இது எனது வாக்குறுதியாகும். வன்முறைகளில் வீடுகளை இழந்த மக்களுக்காக 7,000 புதிய வீடுகள் கட்டித் தரப்படும்" என்று அறிவித்தார். பெண்களுக்கு அதிகாரமளிப்பதில் அரசின் உறுதியைத் தெரிவித்து, "பணிபுரியும் பெண்களுக்காக அரசு விடுதிகள் கட்டப்படுகிறது" என்றார்.

இடம்பெயர்ந்த மக்களை மீள்குடியேற்றுவதற்கு அரசு நடவடிக்கை எடுக்கும் என்று சொன்ன மோடி, "வன்முறை காரணமாக இடம்பெயர்ந்த மக்களை விரைவில் பொருத்தமான இடங்களில் மீள்குடியேற்றுவதற்கும், அமைதியை நிலைநாட்டுவதற்கும் அரசு நடவடிக்கை மேற்கொள்ளும் என்று உங்களுக்கு உறுதியளிக்கிறேன்" என்றார். 2014 முதல் மணிப்பூரை மேம்படுத்த தீவிர கவனம் செலுத்தி வருவதாகவும், சாலைகள், ரயில் திட்டங்களில் முதலீடு செய்யப்பட்டதாகவும் கூறினார்.

மணிப்பூரில் வளர்ச்சி திட்டங்களை விவரித்த மோடி, "கடந்த சில ஆண்டுகளில், மணிப்பூரில் தேசிய நெடுஞ்சாலைகளுக்கு ரூ. 3,700 கோடி செலவிடப்பட்டது. புதிய நெடுஞ்சாலை பணிகளுக்காக ரூ. 8,700 கோடி செலவிடப்படுகிறது. ஜிரிபாம் - இம்பால் ரயில் பாதை விரைவில் இந்திய ரயில்வேவுடன் மணிப்பூர் தலைநகரை இணைகும். இதற்காக ரூ.22,000 கோடி செலவிடப்படுகிறது. ரூ.400 கோடி செலவில் கட்டப்பட்ட புதிய இம்பால் விமான நிலையம், விமான இணைப்பை மேம்படுத்தும்" என்றார்.

நாட்டின் பொருளாதார வளர்ச்சியைப் பற்றியும் பேசிய மோடி, "நாம் மிக விரைவில் உலகின் மூன்றாவது பெரிய பொருளாதாரமாக மாறப் போகிறோம். நமது மணிப்பூர், நாட்டின் பிற பகுதிகளுடன் சேர்ந்து முன்னேறி வருகிறது. மணிப்பூரில் ஏற்கெனவே 60,000 வீடுகள் கட்டித் தரப்பட்டுள்ளது. மணிப்பூர், 7 - 8 ஆண்டுகளுக்கு முன்பு வரை, 25 - 30 ஆயிரம் வீடுகளில் மட்டுமே தண்ணீர் குழாய்கள் இருந்தன. இன்று, 3.5 லட்சத்திற்கும் மேற்பட்ட வீடுகளில் தண்ணீர் குழாய்கள் உள்ளன" என்று முடிவிட்டார்.

இந்தப் பயணம் மழைக்கு இடையில் நடந்தது. இம்பாலில் தரையிறங்கிய மோடி, சுராசந்த்பூருக்கு 65 கி.மீ. தரை வழியாகப் பயணித்தார். வன்முறை பாதிப்பு இடங்களைச் சந்தித்து, அமைதிக்கு வேண்டுகோள் விடுத்த இந்தப் பயணம், மாநிலத்தில் அமைதியை மீட்டெடுக்கும் முயற்சியாகக் கருதப்படுகிறது. இது 2023 வன்முறைக்குப் பிறகு மோடியின் முதல் மணிப்பூர் பயணமாகும்.

இதையும் படிங்க: வாக்கு திருட்டு பத்தி பேசுறாரு! ஆனா அவரும் திருடுறாரு! ராகுல்காந்தியை வெளுத்து வாங்கும் கே.டி.ராமராவ்!