நகைகள் என்றாலே பெண்களுக்கு ஒரு அலாதி பிரியம். தங்க நகை விலை ஏறினாலும் சரி, இறங்கினாலும் சரி அதை வாங்க மட்டும் பெண்கள் மறப்பதில்லை. எவ்வளவு விலை ஏறினாலும் அதை வாங்க ஒரு கூட்டம் உள்ளது. இது ஒருபுறம் இருக்க, மறுபக்கம் தங்கம் வாங்குவது கனவில் தான் என்று இருக்கின்றனர் நடுத்தர மக்கள்.
சர்வதேச பொருளாதார நிலைக்கு ஏற்ப தங்கம் விலை நாள்தோறும் நிர்ணயம் செய்யப்பட்டு வருகிறது. சர்வதேச பொருளாதார சூழல், அமெரிக்க டாலருக்கு நிகரான இந்திய ரூபாயின் மதிப்பு உள்ளிட்ட பல்வேறு காரணிகள் தங்கம் விலையை நிர்ணயிப்பதில் முக்கிய பங்கு வகிக்கின்றன.
சமீபகாலமாக தங்கம் விலை ஏற்ற இறக்கத்தில் உள்ளது. 74 ஆயிரம் ரூபாயை கடந்து ஒரு சவரன் தங்கம் விற்பனை செய்யப்படுவது ஏழை எளிய மற்றும் நடுத்தர மக்களை கவலை அடையச் செய்துள்ளது. அது மட்டுமில்லாமல் தங்கம் வாங்க வேண்டும் என்ற கனவையே இந்த விலையேற்றம் கலைத்து விடுகிறது. பல்வேறு நாடுகளுக்கு இடையே திடீரென ஏற்படும் போர் பதற்றம் காரணமாகவும் தங்கம் விலை ஜெட் வேகத்தில் உயர்ந்து பின்னர் கணிசமாக குறைந்தது.
இதையும் படிங்க: தொடர் சரிவில் தங்கம் விலை.. நிம்மதி பெருமூச்சு விடும் நகைப்பிரியர்கள்..!!
தங்கம் விலை நிலவரம் (26/07/2025):
இந்நிலையில் ஏறுமுகத்தில் இருந்த வந்த தங்கம் விலை, இன்று (சனிக்கிழமை) 3வது நாளாக சற்று குறைந்துள்ளது. அதன்படி சென்னையில் 22 கேரட் ஆபரணத் தங்கத்தின் விலை சவரனுக்கு ரூ.400 குறைந்து ஒரு சவரன் ரூ.73,280-க்கு விற்பனை செய்யப்படுகிறது. தங்கம் விலை கிராமுக்கு ரூ.50 குறைந்து ஒரு கிராம் ரூ.9,160-க்கு விற்பனை செய்யப்படுகிறது. இரண்டு நாட்களுக்கு முன்பு ரூ.75 ஆயிரத்தை தாண்டிய தங்கம் விலை, இன்று ரூ.74 ஆயிரத்திற்கு கீழ் இறங்கியுள்ளது இல்லத்தரசிகளுக்கு சற்று நிம்மதியை ஏற்படுத்தியுள்ளது.
இன்றைய வர்த்தகத்தின் போது 24 காரட் சுத்த தங்கத்தின் விலை கிராமுக்கு ரூ.55 குறைந்து ஒரு கிராம் 9 ஆயிரத்து 993 ரூபாய்க்கும், சவரனுக்கு ரூ.440 குறைந்து ஒரு சவரன் 79 ஆயிரத்து 944 ரூபாய்க்கும் விற்பனையாகி வருகிறது.
வெள்ளி விலை நிலவரம்:
தங்கம் விலை குறைந்த நிலையில், வெள்ளியின் விலையும் குறைந்துள்ளது. அதன்படி கிராமுக்கு ரூ.2 குறைந்து ஒரு கிராம் ரூ.126க்கும், கிலோவுக்கு ரூ.2000 குறைந்து ஒரு கிலோ ரூ.1 லட்சத்து 26 ஆயிரத்திற்கும் விற்பனை செய்யப்பட்டு வருகிறது.
சரிவுக்கான காரணம் என்ன?
அமெரிக்க டாலரின் மதிப்பு உயர்ந்துள்ளதால் சர்வதேச சந்தையில் தங்கத்தின் மீதான முதலீடு குறைந்துள்ளது.
இதையும் படிங்க: நேற்று ஏற்றம்.. இன்று இறங்குமுகம்.. ஒரு சவரன் தங்கம் விலை எவ்வளவு தெரியுமா..??