வட இந்தியாவில் கோடை வெயில் தனது உக்கிரத்தை எட்டத் தொடங்கியுள்ளது. டெல்லி, ராஜஸ்தான், பஞ்சாப் உள்ளிட்ட மாநிலங்களில் வெயில் சுட்டெரிக்கும் அளவுக்கு அதிகரித்துள்ள நிலையில், இந்திய வானிலை ஆய்வு மையம் (IMD) பல பகுதிகளுக்கு வெப்ப அலை எச்சரிக்கை விடுத்துள்ளது. தென் மாநிலங்களை விட வடக்கில் வெப்பம் அதிகமாக உணரப்படுவது பொதுமக்களிடையே பெரும் அச்சத்தை ஏற்படுத்தியுள்ளது.தற்போது பல இடங்களில் வெப்பநிலை 40 டிகிரி செல்சியஸைத் தாண்டியுள்ளது. 

சில பகுதிகளில் 45 டிகிரிக்கு மேல் பதிவாகியுள்ளது. மே மாதத்தில் இந்த நிலைமை மேலும் மோசமடையும் என்ற அச்சம் நிலவுகிறது. வட இந்தியாவின் வறண்ட காற்று மற்றும் நேரடி சூரிய ஒளியின் தாக்கம் காரணமாக வெப்பம் உடலை விரைவில் பாதிப்பதாக வல்லுநர்கள் தெரிவிக்கின்றனர்.இந்த கடுமையான வெப்ப அலையால் ஏற்கெனவே உயிரிழப்புகள் ஏற்பட்டுள்ளன. 

ஒடிசாவில் மக்கள்தொகை கணக்கெடுப்புப் பணியில் ஈடுபட்டிருந்த இரு பள்ளி ஆசிரியர்கள் உடல்நிலை பாதிக்கப்பட்டு உயிரிழந்தனர். ராஜ்கபூர் ஹெம்ப்ராம் மற்றும் அனுராக் எக்கா ஆகியோர், வீடு வீடாக சென்று பணியாற்றியபோது கடும் வெப்பத்தால் பாதிக்கப்பட்டதாக கூறப்படுகிறது. ஒடிசா அரசு இத்தகைய சூழலில் பணியாளர்களுக்கு சிறப்பு வழிகாட்டு நெறிமுறைகளை வெளியிட்டுள்ளது. 

இதையும் படிங்க: ஒடிசாவில் 'பூஜ்ஜிய' மின்கட்டணம்! சோலார் திட்டத்தால் 11,000 குடும்பங்கள் பயன்!

மதியம் 11 மணி முதல் மாலை 3 மணி வரை வெளிப்பணியைத் தவிர்க்கவும், நீர்ச்சத்து உட்கொள்ளவும் அறிவுறுத்தியுள்ளது.நாட்டிலேயே அதிக வெப்பம் பதிவான இடமாக மகாராஷ்டிராவின் அகோலா நகரம் திகழ்கிறது. அங்கு 46.9 டிகிரி செல்சியஸ் வெப்பநிலை பதிவாகியுள்ளது. அமராவதியில் 46.8 டிகிரி, வார்தாவில் 46.4 டிகிரி, நாக்பூரில் 45.4 டிகிரி மற்றும் சத்திரபூரில் 45 டிகிரி வரை வெப்பம் எகிறியுள்ளது. 

விதர்பா பகுதியில் அடுத்த சில நாட்களுக்கு வெப்பநிலை மேலும் உயரும் என்று நாக்பூர் வானிலை மையம் எச்சரிக்கை விடுத்துள்ளது. மக்கள் வெளியில் செல்லும்போது தலையில் துணி அல்லது தொப்பி அணிதல், போதிய நீர் அருந்துதல், ORS குடிப்பது போன்ற முன்னெச்சரிக்கை நடவடிக்கைகளை எடுக்க வேண்டும் என்று அறிவுறுத்தப்பட்டுள்ளது.

வெப்ப அலை காரணமாக மின்சார தேவை பெருமளவில் அதிகரித்துள்ளது. விவசாயம், தொழில்துறை மற்றும் அன்றாட வாழ்க்கை பாதிக்கப்படும் அபாயம் உள்ளது. குழந்தைகள், முதியவர்கள் மற்றும் நோயாளிகள் அதிக அளவில் பாதிக்கப்படக்கூடும். மருத்துவ நிபுணர்கள், வெயிலில் நீண்ட நேரம் இருப்பதைத் தவிர்க்கவும், அறிகுறிகள் தென்பட்டால் உடனடியாக மருத்துவ உதவி பெறவும் கேட்டுக்கொண்டுள்ளனர்.

IMD-யின் சமீபத்திய அறிக்கையின்படி, வட மற்றும் மத்திய இந்தியாவில் வெப்ப அலை இன்னும் சில நாட்கள் தொடரலாம் என்றாலும், விரைவில் சற்று தணிவு ஏற்படும் என எதிர்பார்க்கப்படுகிறது. எனினும், மே மாதம் முழுவதும் எச்சரிக்கையுடன் இருக்க வேண்டியது அவசியம். மக்கள் ஒருவருக்கொருவர் உதவி செய்து, வெப்பத்தின் தாக்கத்தை குறைக்க முயற்சிக்க வேண்டும்.

இதையும் படிங்க: "வங்கியில் பணம் எடுக்க ஆள் வரணும்"..! இறந்த அக்காவின் எலும்பு கூட்டோடு சென்ற நபர்..! அதிர்ச்சி..!