சென்னை மீனம்பாக்கம் விமான நிலையத்தில் நேற்று மாலை மனதை உலுக்கும் சம்பவம் ஒன்று நடைபெற்றது. துபாயிலிருந்து எமிரேட்ஸ் விமானம் மூலம் கென்யாவைச் சேர்ந்த 36 வயது வென்ஜிரா பெனிசூலா என்பவர் தனது 3 மாத பெண் குழந்தையுடன் சென்னை வந்தார். பிறந்தது முதல் இருதயக் கோளாறால் பாதிக்கப்பட்டிருந்த குழந்தைக்கு மேல் சிகிச்சை அளிக்கும் நோக்கில் கென்யாவில் இருந்து துபாய் வழியாக சென்னைக்கு அழைத்து வந்துள்ளார்.

குழந்தை பிறந்ததிலிருந்தே சுவாசப் பிரச்சினை உள்ளிட்ட பல்வேறு உடல்நலக் கோளாறுகளால் அவதிப்பட்டு வந்ததாக தெரிவிக்கப்படுகிறது. கென்யாவில் சிகிச்சை பெற்றும் நிலைமை முன்னேற்றம் இல்லாததால், சென்னையில் உள்ள புகழ்பெற்ற மருத்துவமனையில் மேல் சிகிச்சைக்காக இந்தப் பயணம் மேற்கொள்ளப்பட்டது. தாயின் அன்பும் நம்பிக்கையும் நிறைந்த பயணம், சோகத்தில் முடிந்தது.

விமானம் சென்னை விமான நிலையத்தில் தரையிறங்கிய உடனே, நடைமேடை 29-ல் குழந்தைக்கு திடீரென கடுமையான மூச்சுத் திணறல் ஏற்பட்டது. உடனடியாக விமான நிலைய மருத்துவக் குழுவினர் சம்பவ இடத்துக்கு விரைந்து வந்து தீவிர சிகிச்சை அளித்தனர். ஆனால், சிகிச்சை பலனளிக்காமல் சிறிய குழந்தை பரிதாபமாக உயிரிழந்தது. தாய் வென்ஜிரா பெனிசூலா மனமுடைந்து கதறி அழுத காட்சி அங்கிருந்தவர்களை நெகிழ்ச்சியடையச் செய்தது.

இதையும் படிங்க: பெண் போலீசை தனியாக வரவழைத்து பாலியல் அத்துமீறல்!! கூட்டாளிகளுக்கும் விருந்தாக்க நினைத்த கயவன்! மூவர் கைது!

விமான நிலைய போலீசார் உடனடியாக சம்பவ இடத்துக்கு வந்து குழந்தையின் உடலை கைப்பற்றி பிரேதப் பரிசோதனைக்கு அனுப்பி வைத்தனர். இது தொடர்பாக வழக்குப் பதிவு செய்து விசாரணை நடத்தி வருகின்றனர். குழந்தையின் மரணத்துக்கு இயற்கையான காரணங்களா அல்லது வேறு ஏதேனும் காரணங்கள் உள்ளதா என்பதை போலீசார் உறுதி செய்ய முயன்று வருகின்றனர்.

இந்த சம்பவம் விமான நிலைய அதிகாரிகள் மற்றும் மருத்துவக் குழுவினரிடையே பெரும் அதிர்ச்சியை ஏற்படுத்தியுள்ளது. நீண்ட தூரப் பயணத்தின்போது உடல்நலக் கோளாறு உள்ள குழந்தைகளுக்கு தகுந்த முன்னெச்சரிக்கை நடவடிக்கைகள் எடுக்க வேண்டும் என்பது இந்தச் சம்பவம் மூலம் மீண்டும் நினைவூட்டப்படுகிறது. குழந்தையை இழந்த தாயின் துயரத்துக்கு உள்ளூர் மக்களும் பலரும் ஆறுதல் தெரிவித்து வருகின்றனர்.

சென்னை மருத்துவமனைக்கு வரும் வழியில் இந்தச் சோகம் நிகழ்ந்திருப்பது பலரையும் வருத்தத்தில் ஆழ்த்தியுள்ளது. 

இதையும் படிங்க: பிரதமர் மோடியை சந்திக்கும் அதிபர் ட்ரம்ப்! ஜி7 மாநாட்டில் சுவாரஸ்யம்! உறுதிசெய்தது வெள்ளைமாளிகை!