தலைமை தேர்தல் கமிஷனர் ஞானேஷ் குமார்ஐ பதவியில் இருந்து நீக்கக் கோரி எதிர்க்கட்சிகள் ராஜ்யசபாவில் புதிய தீர்மான நோட்டீஸ் அளித்துள்ளன. காங்கிரஸ், தி.மு.க., திரிணமூல் காங்கிரஸ் உள்ளிட்ட கட்சிகளைச் சேர்ந்த 73 எம்.பி.க்கள் இந்த நோட்டீசில் கையெழுத்திட்டுள்ளனர்.

இந்தியா கூட்டணி கட்சிகள் சார்பில் காங்கிரஸ் எம்.பி. ஜெய்ராம் ரமேஷ் மற்றும் திரிணமூல் காங்கிரஸ் எம்.பி. சாகரிகா கோஸ் ஆகியோர் ராஜ்யசபா பொதுச் செயலரிடம் இந்த நோட்டீசை சமர்ப்பித்தனர். தேர்தல் நடத்தை விதிகளை அமல்படுத்துவதில் ஞானேஷ் குமார் ஒருதலைப்பட்சமாக செயல்படுவதாக எதிர்க்கட்சிகள் குற்றம் சாட்டியுள்ளன.

குறிப்பாக, தமிழகம் மற்றும் மேற்கு வங்காளம் உள்ளிட்ட மாநிலங்களில் முதற்கட்ட சட்டசபைத் தேர்தலுக்கு முன்பு பிரதமர் நரேந்திர மோடி அளித்த உரையில் அரசியல் தொடர்பான கருத்துகள் இருந்ததாகக் கூறி, அவர் மீது நடவடிக்கை எடுக்கக் கோரி தேர்தல் ஆணையத்தை எதிர்க்கட்சிகள் வலியுறுத்தின. ஆனால் தேர்தல் ஆணையம் இதுவரை எந்த நடவடிக்கையும் எடுக்கவில்லை என்று எதிர்க்கட்சிகள் தொடர்ந்து குற்றம்சாட்டி வருகின்றன.

இதையும் படிங்க: தவெகவை தவறவிட்டதால் ராகுல்காந்தி விரக்தி! திமுக கூட்டணியை உறுதி செய்த பா.சிதம்பரத்தை தவிர்க்க முடிவு?!

இந்த நோட்டீசில், “பிரதமர் மோடியின் செயல்பாடுகள் குறித்து எழுப்பப்பட்ட குற்றச்சாட்டுகள் மீது தலைமை தேர்தல் கமிஷனர் எந்த விளக்கமும், அறிவிப்பும் அல்லது அறிவுறுத்தலும் வழங்கவில்லை” என்று குறிப்பிடப்பட்டுள்ளது. மொத்தம் ஒன்பது குற்றச்சாட்டுகளை எதிர்க்கட்சிகள் பட்டியலிட்டுள்ளன. இவை அனைத்தும் “நிரூபிக்கப்பட்ட தவறான நடத்தை” என்ற அடிப்படையில் கொண்டு வரப்பட்டுள்ளன.

ஏற்கனவே மார்ச் மாதம் லோக்சபா மற்றும் ராஜ்யசபாவில் ஞானேஷ் குமார் மீது தீர்மான நோட்டீஸ் அளிக்கப்பட்டது. ஆனால் லோக்சபா சபாநாயகர் ஓம் பிர்லா மற்றும் ராஜ்யசபா தலைவர் சி.பி. ராதாகிருஷ்ணன் ஆகியோர் அந்த நோட்டீசை நிராகரித்தனர். இந்த நிலையில் எதிர்க்கட்சிகள் புதிய நோட்டீசுடன் மீண்டும் முயற்சியைத் தொடங்கியுள்ளன.

இந்த விவகாரம் நாடாளுமன்றத்தில் பெரும் விவாதத்தை ஏற்படுத்தியுள்ளது. தேர்தல் ஆணையத்தின் நடுநிலைத்தன்மை குறித்து எழுந்துள்ள கேள்விகள் அரசியல் களத்தில் பரபரப்பை உருவாக்கியுள்ளன. ராஜ்யசபாவில் இந்த தீர்மான நோட்டீஸ் மீது அடுத்தகட்ட நடவடிக்கை என்ன என்பது அடுத்த சில நாட்களில் தெரியவரும்.

இதையும் படிங்க: குழந்தைதனமா இல்லையா? சாக்கு சொல்லி சிக்கிய செல்வப்பெருந்தகை! விளாசும் அண்ணாமலை!