சென்னை அடையாறில் அரங்கேறிய அந்தப் பயங்கரமான மூவர் கொலை வழக்கில், உயிரிழந்த பீகார் மாநிலத்தைச் சேர்ந்த இளம்பெண் மற்றும் அவரது கைக்குழந்தையின் உடல்கள் இன்று பிரேதப் பரிசோதனைக்குப் பிறகு அவர்களது உறவினர்களிடம் ஒப்படைக்கப்பட்டன. தமிழக அரசு சார்பில் ஏற்பாடு செய்யப்பட்ட சிறப்பு ஆம்புலன்ஸ் மூலம், அவர்தம் உடல்கள் சாலை மார்க்கமாகப் பீகாருக்குக் கொண்டு செல்லப்பட்டன.

சென்னை அடையாறு பகுதியில் கடந்த சில தினங்களுக்கு முன்பு ஒரே குடும்பத்தைச் சேர்ந்த மூவர் கொடூரமாகக் கொலை செய்யப்பட்ட சம்பவம் மாநகரையே உலுக்கியது. இந்தப் படுகொலை தொடர்பாகக் காவல் துறையினர் தீவிர விசாரணை மேற்கொண்டு, பீகாரைச் சேர்ந்த 5 பேரைக் கைது செய்துள்ளனர். கொலை செய்யப்பட்ட பீகார் இளம்பெண், அவரது பச்சிளம் குழந்தை மற்றும் மற்றொருவரின் உடல்கள் பிரேதப் பரிசோதனைக்காக ராயப்பேட்டை அரசு மருத்துவமனையில் வைக்கப்பட்டிருந்தன.

இன்று மதியம் பிரேதப் பரிசோதனை நடவடிக்கைகள் அனைத்தும் நிறைவடைந்ததைத் தொடர்ந்து, இளம்பெண் மற்றும் அவரது குழந்தையின் உடல்கள் அவர்களது குடும்பத்தினரிடம் முறைப்படி ஒப்படைக்கப்பட்டன. நீண்ட தூரப் பயணம் என்பதால், மனிதாபிமான அடிப்படையில் தமிழக அரசு சார்பில் இலவச ஆம்புலன்ஸ் வசதி செய்து தரப்பட்டது. பலத்த போலீஸ் பாதுகாப்புடன் அந்த ஆம்புலன்ஸ் பீகார் நோக்கித் தனது பயணத்தைத் தொடங்கியது.

இதையும் படிங்க: யாருக்கும் பாதுகாப்பு இல்லை! அடையாறு படுகொலை மற்றும் நந்தனம் வன்கொடுமைக்கு தவெக தலைவர் கண்டனம்

இந்த வழக்கில் கைதான 5 பேரிடமும் அடையாறு தனிப்படை போலீசார் தொடர்ந்து ரகசிய இடத்தில் வைத்து விசாரணை நடத்தி வருகின்றனர். முன்விரோதம் காரணமாக இந்தக் கொலை நடந்ததா அல்லது பண விவகாரமா என்பது குறித்த திடுக்கிடும் தகவல்கள் விரைவில் வெளியாகும் என எதிர்பார்க்கப்படுகிறது. உயிரிழந்தவர்களின் உடல்களைப் பெற்றுக் கொண்ட உறவினர்கள், கண்ணீர் மல்கத் தமிழக அரசுக்கும் காவல்துறைக்கும் நன்றி தெரிவித்தனர்.

இதையும் படிங்க: சமூக வலைதள கணக்கு தொடங்கணுமா..?? பீகார் அரசு ஊழியர்களுக்கு பறந்த கட்டுப்பாடு..!!