சென்னை: சட்டமன்றத் தேர்தலில் பெரும் பின்னடைவைச் சந்தித்த அதிமுகவில் உட்கட்சி பூசல் தீவிரமடைந்துள்ளது. எதிர்க்கட்சி அந்தஸ்து கூட கிடைக்காத அளவுக்கு குறைந்த இடங்களில் வெற்றி பெற்றதால், அதிமுக பொதுச் செயலாளர் எடப்பாடி பழனிசாமிக்கு எதிராக கட்சியின் மூத்த தலைவர்கள் போர்க்கொடி தூக்கியுள்ளனர்.

முன்னாள் அமைச்சர்களான எஸ்.பி. வேலுமணி, சி.வி. சண்முகம், டாக்டர் சி. விஜயபாஸ்கர் உள்ளிட்டோர் தலைமையில் 25 எம்.எல்.ஏ.க்கள் எடப்பாடி பழனிசாமிக்கு எதிராக நிலைப்பாடு எடுத்துள்ளனர். இதன் எதிரொலியாக, நேற்று முன்தினம் புதிய அரசின் நம்பிக்கை வாக்கெடுப்பின்போது கட்சி கொறடாவின் உத்தரவை மீறி இந்த 25 எம்.எல்.ஏ.க்களும் அரசுக்கு ஆதரவாக வாக்களித்தனர். இதைத் தொடர்ந்து அவர்கள் மீது நடவடிக்கை எடுக்கக் கோரி எடப்பாடி தரப்பினர் சபாநாயகரிடம் மனு அளித்துள்ளனர்.

எடப்பாடி பழனிசாமி தனது இல்லத்தில் ஓ.எஸ். மணியன், தளவாய் சுந்தரம், அக்ரி கிருஷ்ணமூர்த்தி, கே.பி. முனுசாமி, ஆர்.பி. உதயகுமார் உள்ளிட்ட மூத்த நிர்வாகிகளுடன் அவசர ஆலோசனை நடத்தினார். பின்னர் அவர்கள் கவர்னர் மாளிகைக்குச் சென்று மனு அளித்தனர். கவர்னர் ராஜேந்திர விஸ்வநாத் அர்லேகர் தற்போது கேரளாவில் இருப்பதால், அவர் சென்னை திரும்பியதும் எடப்பாடி பழனிசாமி நேரில் சந்தித்து புகாரை முன்வைக்கத் திட்டமிட்டுள்ளார்.

இதையும் படிங்க: அதிமுக உட்கட்சி விவகாரங்கள்ல மூக்கை நுழைக்காதீங்க! பாஜகவினருக்கு கடிவாளம் போட்ட டெல்லி தலைமை!!

இதனிடையே, எஸ்.பி. வேலுமணி தரப்பில் இருந்த கே.சி. வீரமணி எடப்பாடி பழனிசாமிக்கு திடீர் ஆதரவு அளித்துள்ளார். “நேற்று வரை வேலுமணியுடன் இருந்தேன். இன்று எனது நிலைப்பாட்டை மாற்றிக் கொண்டேன்” என்று அவர் அறிவித்துள்ளார். மறுபுறம், வேலுமணி தனது அலுவலகத்தில் நிர்வாகிகளுடன் ஆலோசனை நடத்தி வருகிறார்.

எடப்பாடி பழனிசாமி தரப்பு தொடர்ந்து வழக்கறிஞர்களுடன் ஆலோசனை நடத்தி வருகிறது. மாநிலங்களவை உறுப்பினர்கள் இன்பதுரை, தனபால் உள்ளிட்டோரும் எடப்பாடியை சந்தித்து ஆதரவு தெரிவித்துள்ளனர். அதிமுகவில் ஏற்பட்டுள்ள இந்த பிளவு கட்சியின் எதிர்காலத்தையே பாதிக்கும் அபாயம் உள்ளதாக அரசியல் வட்டாரங்கள் கருத்து தெரிவிக்கின்றன.

தேர்தல் தோல்விக்குப் பிறகு அதிமுகவில் முதல் முறையாக பெரும் உட்கட்சி மோதல் வெளிப்படையாக வெடித்துள்ளது. இந்த நெருக்கடி எப்படி முடிவுக்கு வரும் என்பதை பொறுத்திருந்து பார்க்க வேண்டும்.

இதையும் படிங்க: இரண்டாக உடைந்தது அதிமுக! சட்டசபையில் வெட்ட வெளிச்சம்!! எடப்பாடி பழனிசாமி vs சி.வி.சண்முகம்!