அரசு மருத்துவமனையில் இரவு நேரப் பணியில் இருந்த மருத்துவரைத் தூக்கத்திலிருந்து எழுப்பி அறிவுரை கூறுவது போல் ரீல்ஸ் எடுத்து விளம்பரம் தேடிய தவெகவின் ஸ்ரீவைகுண்டம் சட்டமன்ற உறுப்பினர் சரவணனின் செயலுக்கு அதிமுக தகவல் தொழில்நுட்பப் பிரிவு மிகக் கடுமையான கண்டனம் தெரிவித்துள்ளது.

அரசு மருத்துவமனைகளில் இரவு நேரங்களில் மருத்துவர்கள் மற்றும் பணியாளர்களின் செயல்பாடுகள் தொடர்பாக அவ்வப்போது மக்கள் பிரதிநிதிகள் திடீர் ஆய்வுகளை மேற்கொண்டு வருகின்றனர். இந்நிலையில், தூத்துக்குடி மாவட்டம் ஸ்ரீவைகுண்டம் தொகுதி தவெக எம்எல்ஏ சரவணன், அரசு மருத்துவமனை ஒன்றில் இரவு நேரத்தில் ஆய்வு என்ற பெயரில் சென்றபோது, அங்குப் பணியில் இருந்த மருத்துவரை எழுப்பி அறிவுரை வழங்கி ரீல்ஸ் வீடியோ எடுத்து வெளியிட்டதாகக் குற்றச்சாட்டு எழுந்துள்ளது.

இது தொடர்பாக அதிமுக ஐடி விங் தனது அதிகாரப்பூர்வ சமூக வலைதளப் பக்கத்தில் பதிவிட்டுள்ள கண்டன அறிக்கையில், ஆளும் தவெக மற்றும் அக்கட்சியின் எம்எல்ஏ மீது அடுக்கடுக்கான விமர்சனங்களை முன்வைத்துள்ளது. அதில், புறநோயாளிகள் யாரும் இல்லாத நேரத்தில் ஒரு மருத்துவர், அதுவும் இரவு நேரப் பணி பார்க்கும் மருத்துவர் ஓய்வு எடுப்பது இயல்பு என்பது கூடத் தெரியாமல், தனது விளம்பர மோகத்தைக் காட்டுவதற்காக மருத்துவரை எழுப்பி அறிவுரை ரீல்ஸ் எடுத்துள்ளார் தவெக ஸ்ரீவைகுண்டம் எம்எல்ஏ சரவணன் என்று விமர்சிக்கப்பட்டுள்ளது.

இதையும் படிங்க: அ.தி.மு.க.வை விட்டு ஏன் வெளியேறினேன்? தவெகவில் இணைந்த முன்னாள் அமைச்சர் செம்மலை பரபரப்பு பேட்டி!

தொடர்ந்து மக்கள் நலம் குறித்து கேள்வி எழுப்பியுள்ள அதிமுக, மக்கள் மீது அவ்வளவு அக்கறை இருந்தால், இதே மாதிரி சென்று மாலை 5 மணிக்கு மேல் உங்கள் கட்சித் தலைவரை, தமிழக முதல்வரை எழுப்பி ரீல்ஸ் போட முடியுமா? என முதலமைச்சர் விஜய்யின் பணி நேரத்தைக் குறிப்பிட்டுச் சாடியுள்ளது.

மேலும், சுகாதாரத்துறை அமைச்சரின் செயல்பாடுகளையும் அதிமுக கடுமையாக விமர்சித்துள்ளது. "டெங்கு காய்ச்சலுக்கு முழு கை சட்டை அணிய வேண்டும் என்ற அரிய கண்டுபிடிப்பைக் கூறிய சுகாதாரத்துறை அமைச்சர் அருண்ராஜ், அதிமுக பொதுக்குழு விவகாரங்களில் மூக்கை நுழைப்பது போல, மருத்துவர்களை அவமதிக்கும் வகையில் செயல்பட்ட இந்த எம்எல்ஏ-வுக்கு எதிராகக் கண்டனம் தெரிவிப்பாரா?" என்றும் கேள்வி எழுப்பியுள்ளது.

அத்துடன், இந்த எம்எல்ஏ சரவணன் தான் முன்னதாக பாலியல் வழக்கு ஒன்றில் குற்றம் சாட்டப்பட்டு, பின்னர் தவெக அரசால் குற்றமில்லை என்று அறிவிக்கப்பட்டவர் என்பது குறிப்பிடத்தக்கது எனவும் அந்தப் பதிவில் அதிமுக ஐடி விங் சுட்டிக்காட்டியுள்ளது.

இதையும் படிங்க: இடைத்தேர்தலுக்கு காரணமே திமுக - அதிமுக தான்! துரை வைகோ பரபரப்பு குற்றச்சாட்டு!