மதுராந்தகம் சட்டமன்றத் தொகுதி இடைத்தேர்தல் பிரசாரம் தீவிரமடைந்து வரும் நிலையில், திமுக வேட்பாளர் பரந்தாமனை ஆதரித்து திமுக தலைவர் மு.க.ஸ்டாலின் பிரம்மாண்ட பொதுக்கூட்டத்தில் பங்கேற்று உரையாற்றினார். இந்தத் தேர்தல் மக்கள் மீது தேவையில்லாமல் திணிக்கப்பட்ட ஒன்று என்றும், தவிர்த்திருக்க வேண்டிய தேர்தல் என்றும் அவர் குறிப்பிட்டார். 

குறுக்கு வழியில் எம்.எல்.ஏக்களை வாங்குவதே முதலமைச்சர் விஜயின் அணுகுமுறை எனக் குற்றம்சாட்டிய அவர், பெரும்பான்மை இல்லாத ஒரு கட்சிக்கு முட்டுக்கொடுப்பதற்காகவே முன்னாள் எம்.எல்.ஏ மரகதம் தனது பதவியை ராஜினாமா செய்துள்ளார் என்று தெரிவித்தார். அப்பட்டமாக நடைபெற்ற குதிரை பேரத்தின் காரணமாகவே இந்த இடைத்தேர்தல் நடப்பதாக ஸ்டாலின் சுட்டிக்காட்டினார். 

ராஜினாமா செய்துவிட்டுத்தான் கட்சி மாறியதாக கூறும் விஜயின் வாதத்தை “மிகப்பெரிய கண்டுபிடிப்பு” என எள்ளி நகையாடிய அவர், ராஜினாமா செய்யாவிட்டால் கட்சித்தாவல் தடைச் சட்டத்தின் கீழ் நடவடிக்கை எடுக்கப்படும் என்பதாலேயே அவ்வாறு செயல்பட்டதாகக் குறிப்பிட்டார். தவெக தலைவர்களின் பேச்சை மேற்கோள் காட்டிய ஸ்டாலின், “உங்கள் பயம் எனக்குப் பிடித்திருக்கிறது” என்று கூறி, அவர்களின் திமிரையும் அகம்பாவத்தையும் இந்தத் தேர்தல் மூலம் மக்கள் அடக்க வேண்டும் எனக் கேட்டுக்கொண்டார்.

இதையும் படிங்க: தாராபுரத்தில் அக்.2ல் மு.க.ஸ்டாலின் ரோடு ஷோ பிரச்சாரம்: திமுக வேட்பாளருக்கு வாக்கு சேகரிப்பு!

“நாயை நிற்க வைத்தால் கூட வெற்றி பெறுவோம்” என்று ஆளுங்கட்சியினர் திமிராகப் பேசுவதாகவும், மக்களை ஏமாற்றும் தவெகவுக்கு வாக்காளர்கள் தகுந்த பாடம் புகட்ட வேண்டும் என்றும் வலியுறுத்தினார். தேர்தலுக்கு முன்பாக தவெகவை ஒரு பொருட்டாகக் கருதாமல் விட்டதே திமுகவின் தவறு என ஒப்புக்கொண்ட ஸ்டாலின், “கொள்கை எதிரிகளை எதிர்கொண்ட எங்களுக்கு இந்த கோமாளிக் கூட்டம் ஒரு பொருட்டே அல்ல. எங்களை வழக்குப் போட்டும் மிரட்ட முடியாது; சூட்கேஸ் காட்டியும் விலைக்கு வாங்க முடியாது” என்று உறுதியாகத் தெரிவித்தார். 

திமுக கூட்டணியில் இருந்த கட்சிகளின் ஆதரவுடன் தான் தவெக ஆட்சி நடைபெறுவதாகச் சுட்டிக்காட்டிய அவர், குதிரை பேரத்தை “கழுதை பேரம் இல்லை” என முதலமைச்சர் உத்தமர் போல் கூறுவதாக விமர்சித்தார். “விஜயின் பேச்சை சில தற்குறிகள் நம்புகிறார்கள். வாழ்க்கை ஒரு வட்டம் என்பது முதலமைச்சருக்கு சூப்பராகப் பொருந்துகிறது” என்று சாடினார். மாநிலத்தின் சட்ட ஒழுங்கு நிலைமை குறித்து கவலை தெரிவித்த ஸ்டாலின், தமிழ்நாட்டில் தினந்தோறும் கொத்துக்கொத்தாகக் கொலைகளும் அரிவாள் வெட்டுகளும் நடைபெற்று வருவதாகக் குறிப்பிட்டார். 

போதைப்பொருள் தொடர்பாக துப்புக் கொடுத்தவர்களைக் கூட காப்பாற்ற இந்த அரசுக்குத் துப்பில்லை என்றும், குற்றச் செயல்களில் ஈடுபடுபவர்களில் பாதியளவிற்கும் மேல் தவெகவைச் சேர்ந்தவர்களே உள்ளனர் என்றும் பகிரங்கமாகக் குற்றம்சாட்டினார். தவெகவை நம்பியவர்கள் நட்டாற்றில் நிற்கப் போகிறார்கள் என எச்சரித்த அவர், பச்சைக் குழந்தைகள் குடிக்கும் ஆவின் பாலைக் கூட ஒழுங்காக விநியோகிக்க முடியாமல், விலைவாசி உயர்வையும் கட்டுப்படுத்த முடியாமல் அரசு திணறி வருவதாகச் சாடினார்.

முதலமைச்சர் விஜயை “சீப் மினிஸ்டர்” என்று அழைப்பதாக அறிவித்த ஸ்டாலின், டீ குடிப்பது போல மதுராந்தகத்தில் வந்து ஷூட்டிங் நடத்திய விஜய்க்கு ஒரு டீயின் நிஜ விலை என்னவென்று தெரியுமா எனக் கேள்வி எழுப்பினார். ஒரு டீக்கு 500 ரூபாய் கொடுத்து பந்தா செய்யும் முதல்வருக்கு மக்களின் கஷ்டம் புரியாது என்றும் கூறினார். 

கருநாடகத்தில் பாட்டுபாடிய விஜய் அங்கு ஏன் வெற்றி பெறவில்லை எனக் கேட்ட அவர், டெல்லியில் விஜய் யாருடன் ரகசியக் கூட்டணியில் இருக்கிறார் என்பது விரைவில் வெளிச்சத்திற்கு வரும் என்றும், திமுக ஜெயித்தாலும் தோற்றாலும் கெத்தாக மக்களுக்குத் தொடர்ந்து பாடுபடும் என்றும் உறுதியளித்தார். இந்த உரை மூலம் இடைத்தேர்தலை அரசியல் ஆதிக்கத்திற்கான போட்டியாக மாற்றியுள்ளதாக அரசியல் வட்டாரங்கள் கருதுகின்றன.

இதையும் படிங்க: நல்ல வேளை தப்பிச்சிட்டேன்!! கொளத்தூர் மக்களே.. கோடான கோடி நன்றி!! கும்பிடு போட்ட மு.க ஸ்டாலின்!!