உலகளவில் தகவல் தொழில்நுட்பத் துறையில் ஆட்குறைப்பு நடவடிக்கைகள் தொடர்ந்து வரும் நிலையில், ஆன்லைன் வர்த்தக நிறுவனமான அமேசான் மீண்டும் ஊழியர்களை குறைக்கும் நடவடிக்கையை மேற்கொண்டுள்ளது. உலகம் முழுவதும் சுமார் 1,000 பணியிடங்களை குறைக்கும் இந்த நடவடிக்கையில் இந்தியாவில் பணியாற்றி வரும் ஊழியர்களும் பாதிக்கப்பட்டுள்ளதாக தகவல் வெளியாகியுள்ளது.

அமேசான் நிறுவனத்தின் தலைமை செயல் அதிகாரி ஆன்டி ஜாஸி தலைமையிலான செலவுக் குறைப்பு மற்றும் நிர்வாகக் கட்டமைப்பை எளிமைப்படுத்தும் நடவடிக்கைகளின் ஒரு பகுதியாக இந்த பணிநீக்கம் மேற்கொள்ளப்படுவதாக கூறப்படுகிறது.

நிறுவனத்தின் செயல்பாடுகளை மேலும் திறம்பட மாற்றுவதுடன், முக்கியமான பணிகள் மற்றும் முன்னுரிமை திட்டங்களில் அதிக கவனம் செலுத்தும் நோக்கில் இந்த மாற்றங்கள் செய்யப்படுவதாக அமேசான் தரப்பில் விளக்கம் அளிக்கப்பட்டுள்ளது.

இதையும் படிங்க: நரேந்திர மோடி மைதானத்தை குறிவைத்து வெடிகுண்டு மிரட்டல்! அகமதாபாத்தில் பரபரப்பை ஏற்படுத்திய இ-மெயில்!

இந்த ஆட்குறைப்பு நடவடிக்கையில் இந்தியா, இங்கிலாந்து உள்ளிட்ட பல்வேறு நாடுகளில் பணியாற்றும் ஊழியர்கள் பாதிக்கப்பட்டுள்ளதாக கூறப்படுகிறது. குறிப்பாக கஸ்டமர் கேர், மார்க்கெட்டிங் மற்றும் இன்ஜினியரிங் உள்ளிட்ட பிரிவுகளில் பணியாற்றிய சிலருக்கு பணிநீக்கத் தகவல் தெரிவிக்கப்பட்டுள்ளது. இதனால் பாதிக்கப்பட்ட ஊழியர்கள் தங்களது அனுபவங்களை சமூக வலைதளங்களில் பகிர்ந்து வருகின்றனர்.

இதுகுறித்து அமேசான் செய்தித் தொடர்பாளர் கூறுகையில், வாடிக்கையாளர்களுக்கு விரைவான சேவையை வழங்கவும், முக்கியமான பணிகளில் கவனம் செலுத்தவும் நிறுவனத்தில் சில மாற்றங்கள் மேற்கொள்ளப்பட்டுள்ளதாக தெரிவித்தார். இதன் காரணமாக குறைந்த எண்ணிக்கையிலான ஊழியர்களை பணியில் இருந்து விடுவிக்க வேண்டிய கடினமான முடிவு எடுக்கப்பட்டுள்ளதாகவும் அவர் குறிப்பிட்டார்.

அமேசானில் கடந்த சில ஆண்டுகளாகவே ஆட்குறைப்பு நடவடிக்கைகள் தொடர்ந்து வருகின்றன. குறிப்பாக கொரோனா காலத்தில் ஆன்லைன் வர்த்தகம் வேகமாக அதிகரித்ததால், நிறுவனத்தின் தேவையை சமாளிக்க அதிக அளவில் ஊழியர்கள் நியமிக்கப்பட்டனர். பின்னர் சந்தை நிலை மாறியதை தொடர்ந்து பணியாளர்கள் எண்ணிக்கையை சீரமைக்கும் நடவடிக்கைகள் மேற்கொள்ளப்பட்டு வருகின்றன.

தற்போதைய பணிநீக்க நடவடிக்கையும் அந்த நீண்டகால செலவுக் குறைப்பு மற்றும் நிறுவன மறுசீரமைப்பு திட்டத்தின் தொடர்ச்சியாக பார்க்கப்படுகிறது. அமேசானின் இந்த முடிவு, உலகளவில் தொழில்நுட்பத் துறையில் வேலைவாய்ப்பு தொடர்பான அச்சத்தை மீண்டும் ஏற்படுத்தியுள்ளது.

இதையும் படிங்க: 17,000 அடி உயரத்தில் வானில் பறந்தபோது இண்டிகோ விமானத்தை தாக்கிய மின்னல்! சேதமான விமானம்! திக் திக் நிமிடம்!