ஓட்டு வங்கி அரசியலின் மீதான பேராசையால் காங்கிரஸ் கட்சி தேசியப் பாடலான 'வந்தே மாதரம்' பாடலையே மறந்துவிட்டது என்றும், தேசியப் பாடலை அவமதித்த இந்த வரலாற்றுப் பிழையை நாட்டின் 140 கோடி மக்களும் ஒருபோதும் மன்னிக்க மாட்டார்கள் என்றும் காங்கிரஸ் மூத்த தலைவர் சோனியா காந்தி மீது மத்திய உள்துறை அமைச்சர் அமித்ஷா கடுமையான அரசியல் தாக்குதலைத் தொடுத்துள்ளார்.

ராஜஸ்தான் மாநிலம் சித்தோர்காரில் நடைபெற்ற மறைந்த முன்னாள் பிரதமர் அடல் பிகாரி வாஜ்பாயின் நினைவு தினப் பொதுக்கூட்டத்தில் பங்கேற்று உரையாற்றிய மத்திய உள்துறை அமைச்சர் அமித்ஷா, சுதந்திர தின விழாவின் போது காங்கிரஸ் தலைமை அலுவலகத்தில் நடந்ததாகக் கூறப்படும் விவகாரம் குறித்துப் பகிரங்கக் குற்றச்சாட்டுகளை முன்வைத்தார். அப்போது பேசிய அவர், "சுதந்திர தினத்தை முன்னிட்டு காங்கிரஸ் தலைமை அலுவலகத்தில் 'வந்தே மாதரம்' பாடல் பாடப்பட்டுக் கொண்டிருந்த வேளையில், காங்கிரஸ் கட்சியின் தலைவர் மல்லிகார்ஜுன கார்கேவை பாடலை பாதியிலேயே நிறுத்துமாறு சோனியா காந்தி அறிவுறுத்திய காட்சிகளை நாடே தொலைக்காட்சிகளில் நேரலையாகப் பார்த்தது. நாட்டின் தேசியப் பாடலை முழுமையாகப் பாடாமல் பாதியிலேயே நிறுத்துவதை யாராவது நினைத்துப் பார்க்க முடியுமா? இதற்காக காங்கிரஸ் கட்சியினர் வெட்கித் தலைகுனிய வேண்டும்" எனச் சாடினார்.  

மேலும் சோனியா காந்தியை நேரடியாக எச்சரிக்கும் தொனியில் பேசிய அவர், "சோனியா அவர்களே, இந்த நாட்டின் 140 கோடி மக்களும் உங்களது ஒவ்வொரு அசைவையும் கவனித்துக் கொண்டிருக்கிறார்கள். வெறும் ஓட்டு வங்கி அரசியலுக்காகவும், சிறுபான்மையினரின் வாக்கு வேட்டைக்காகவும் நமது தேசத்தின் விடுதலை முழக்கமான 'வந்தே மாதரம்' பாடலை காங்கிரஸ் வேண்டுமென்றே அவமதித்துள்ளது. சுதந்திரப் போராட்டத்தின் போது ஆயிரக்கணக்கான தியாகிகள் லத்தி அடிகளையும் துப்பாக்கிச் சூடுகளையும் தாங்கிக்கொண்டு முழங்கிய புனிதமான பாடல் இது. 

இதையும் படிங்க: காங்கிரஸ் மூத்த தலைவர் எம். கிருஷ்ணசாமிக்கு 'தகைசால் தமிழர்' விருது அறிவிப்பு!

தேசியப் பாடலை அவமதித்த இந்த மாபெரும் தவறுக்காக காங்கிரஸ் கட்சி தேச மக்களிடமும், இப்பாடலை இயற்றிய பங்கிம் சந்திர சட்டோபாத்யாயாவின் ஆன்மாவிடமும் பகிரங்கமாக மன்னிப்புக் கேட்க வேண்டும்" என்று திட்டவட்டமாக வலியுறுத்தினார்.காங்கிரஸ் தலைமை அலுவலகத்தில் சுதந்திர தின நிகழ்வின் போது சோனியா காந்தி 'வந்தே மாதரம்' பாடுவதைத் தடுத்ததாக பாஜக வெளியிட்டுள்ள வீடியோ சமூக வலைத்தளங்களில் வைரலாகி பெரும் அரசியல் புயலைக் கிளப்பியுள்ள நிலையில், அமித்ஷாவின் இந்த நேரடிச் சாடல் தேசிய அரசியலில் புதிய விவாதத்தையும் பரபரப்பையும் ஏற்படுத்தியுள்ளது.  

இதையும் படிங்க: அமித்ஷா- சுதீஷ் திடீர் சந்திப்பு..! "தமிழக அரசியலில் புதிய சஸ்பென்ஸ்..! பரபரப்பு களம்..!!