டிடிவி தினகரனுக்கும் சசிகலாவுக்கும் இடையேயான உறவு கடந்த சில ஆண்டுகளாகவே பதற்றமான நிலையில் இருந்து வருகிறது. ஜெயலலிதா மறைவுக்குப் பிறகு அரசியல் அதிகாரப் போட்டியில் இருவரும் ஒரே குடும்பத்தில் இருந்தாலும் வெவ்வேறு பாதைகளைத் தேர்ந்தெடுத்தனர். சசிகலா சிறைத் தண்டனை அனுபவித்த காலகட்டத்தில் தினகரன் அம்மா மக்கள் முன்னேற்றக் கழகத்தைத் தொடங்கி தனியாகப் பயணிக்கத் தொடங்கினார்.

அப்போதே இருவருக்கும் இடையே மறைமுகமான முரண்பாடுகள் தொடங்கின. தினகரன் தனது கட்சியை அதிமுகவுடன் இணைக்க முயற்சிகள் மேற்கொண்டாலும், எடப்பாடி பழனிசாமி தலைமையிலான அதிமுக அதை ஏற்கவில்லை. சமீபத்தில் தினகரன் தேசிய ஜனநாயகக் கூட்டணியில் இணைந்தது சசிகலாவுக்கு கடும் அதிருப்தியை ஏற்படுத்தியுள்ளது. சசிகலா தனது பழைய அதிமுகவை மீட்டெடுக்கும் முயற்சியில் இருக்கும் நிலையில், தினகரனின் இந்த முடிவு அவரை மேலும் கோபப்படுத்தியது.

இருவரும் பொதுவெளியில் சந்திப்பதைத் தவிர்த்து வருகின்றனர். அண்ணா நினைவு நாளன்று மெரினா கடற்கரையில் தினகரன் அஞ்சலி செலுத்திக் கொண்டிருந்தபோது சசிகலா வருவதை அறிந்ததும் அவசரமாக அங்கிருந்து கிளம்பிச் சென்ற சம்பவம் இதற்கு உதாரணமாக அமைந்தது. அந்த நிமிடத்தில் இருவரும் ஒரே இடத்தில் இருந்தாலும் நேருக்கு நேர் சந்திக்காமல் தவிர்த்தது அரசியல் வட்டாரத்தில் பரபரப்பை ஏற்படுத்தியது.இந்தப் பின்னணியில்தான் சமீபத்தில் அம்மா மக்கள் முன்னேற்றக் கழகத்தின் மாணவியர் அணி செயலாளராக இருந்த ஜீவிதா நாச்சியார் என்ற பெண் நிர்வாகியை தினகரன் கட்சியிலிருந்து நீக்கியுள்ளார்.

இதையும் படிங்க: NDA- வில் உறவாடும் TTV... தனிக்கட்சி தொடங்கும் சசிகலா..? ஆதரவாளர்களை களம் இறக்கத்திட்டம்...!

ஜீவிதா நாச்சியார் சசிகலாவை சந்தித்துப் பேசியதாகத் தகவல் வெளியானது. இது தினகரனுக்கு கடும் அதிருப்தியை ஏற்படுத்தியது. கட்சியின் கொள்கை குறிக்கோள்களுக்கு முரணாகவும், கட்டுப்பாட்டை மீறியும், கழகத்தின் கண்ணியத்திற்கு மாசு ஏற்படுத்தும் வகையிலும் செயல்பட்டதாகக் கூறி அவரை அடிப்படை உறுப்பினர் பொறுப்பு உள்ளிட்ட அனைத்துப் பொறுப்புகளிலிருந்தும் நீக்கியதாக அம்மா மக்கள் முன்னேற்றக் கழகம் சார்பில் அறிக்கை வெளியிடப்பட்டது.

கழக உடன்பிறப்புகள் அவருடன் எவ்விதத் தொடர்பும் வைத்துக்கொள்ளக்கூடாது என்றும் அதில் தெரிவிக்கப்பட்டது. இந்த நீக்கத்திற்கு முக்கிய காரணமாக சசிகலாவுடனான தொடர்பு கருதப்படுகிறது. தினகரன் தனது கட்சியில் சசிகலாவுடன் தொடர்பு கொள்ளும் எந்த நடவடிக்கையையும் கடுமையாக எதிர்க்கிறார் என்பது தெளிவாகத் தெரிகிறது. இது இருவருக்கும் இடையேயான விரிசலை மேலும் ஆழப்படுத்தியுள்ளது. 

இதையும் படிங்க: டாஸ்மாக் ஊழியர்கள் காத்திருப்பு போராட்டம்..! பணிச்சுமை கூடாது... மீண்டும் பேச்சுவார்த்தை நடத்த டிடிவி வலியுறுத்தல்..!